പേരാവൂർ : നേപ്പാളിൽ നടക്കുന്ന അന്തർ ദേശീയ ലങ്കാഡി ചാമ്പ്യൻഷിപ്പിൽ പങ്കെടുക്കാൻ പേരാവൂർ നിന്ന് ഒൻപത് പേർ യോഗ്യത നേടി. കഴിഞ്ഞ മാസം നടന്ന ദേശിയ ചാമ്പ്യൻഷിപ്പിലെ മിന്നുന്ന പ്രകടനമാണ് ഇന്ത്യൻ ടീമിലേക്ക് ഇവർക്ക് സെലക്ഷൻ നേടിക്കൊടുത്തത്. തൊണ്ടിയിൽ സെയ്ന്റ് ജോൺസ് യു.പി സ്കൂൾ ഏഴാം ക്ലാസ്സ്‌ വിദ്യാർത്ഥികളായ എം.അമയ, തനയ ദാസ്, കാതറിൻ ബിജു, നിയ റോസ് ബിജു, അമർനാഥ്‌ അനീഷ്, പി. പാർഥിവ്,പേരാവൂർ സെയ് ന്റ് ജോസഫ് ഹൈസ്കൂൾ പത്താം ക്ലാസ് വിദ്യാർത്ഥിനി നിവേദിത സി. സതീഷ്, എട്ടാം ക്ലാസ്സ്‌ വിദ്യാർത്ഥിനി ദിയ ആൻ ഡെന്നി,മണത്തണ ഗവ ഹയർ സെക്കൻഡറി സ്കൂൾ പ്ലസ്ടു വിദ്യാർത്ഥിനി ചൈതന്യ വിനോദ് എന്നിവരാണ് കേരളത്തിൽ നിന്ന് ഇന്ത്യൻ ലങ്കാഡി ടീമിൽ തിരഞ്ഞെടുക്കപ്പെട്ടത്.

പേരാവൂർ : സി.പി.ഐ ഇരുപത്തഞ്ചാം പാർട്ടി കോൺഗ്രസ്സിന്റെ ഭാഗമായി പേരാവൂർ ലോക്കൽ സമ്മേളനം മാർച്ച്‌ 15,16 (ശനി, ഞായർ) ദിവസങ്ങളിൽ അയോത്തുംചാലിൽ നടക്കും. 15ന് വൈകുന്നേരം അഞ്ചിന് മണത്തണയിൽ നടക്കുന്ന പ്രകടനവും പൊതുയോഗവും സംസ്ഥാന കൗൺസിലംഗം സി.എൻ ചന്ദ്രനും 16ന് അയോത്തുംചാലിൽ പ്രതിനിധി സമ്മേളനം ജില്ലാ അസി. സെക്രട്ടറി കെ.ടി ജോസും ഉദ്ഘാടനം ചെയ്യും.

യുണൈറ്റഡ് മർച്ചൻറ്സ് ചേംബർ പേരാവൂർ യൂണിറ്റ് സംഘടിപ്പിച്ച സമൂഹ നോമ്പുതുറ മൂസ മൗലവി വയനാട് ഉദ്ഘാടനം ചെയ്യുന്നു

പേരാവൂർ: യുണൈറ്റഡ് മർച്ചൻറ്സ് ചേംബർ പേരാവൂർ യൂണിറ്റ് ടൗണിൽ സമൂഹ നോമ്പുതുറ സംഘടിപ്പിച്ചു. മൂസ മൗലവി വയനാട് ഉദ്ഘാടനവും ഇഫ്ത്താർ സന്ദേശവും നല്കി. യൂണിറ്റ് പ്രസിഡൻറ് ഷിനോജ് നരിതൂക്കിൽ അധ്യക്ഷനായി. ബ്ലോക്ക് പഞ്ചായത്ത് പ്രസിഡൻറ് കെ.സുധാകരൻ, പഞ്ചായത്ത് പ്രസിഡൻ്റ് പി.പി.വേണുഗോപാലൻ, ജില്ലാ പഞ്ചായത്തംഗങ്ങളായ ജൂബിലി ചാക്കോ, വി.ഗീത, പഞ്ചായത്തംഗങ്ങളായ എം.ശൈലജ, റജീന സിറാജ് , പേരാവൂർ ഫൊറോനാ അസി.വികാരി ഫാ.പോൾ മുണ്ടക്കൽ, ശ്രീകൃഷ്ണ ക്ഷേത്രം ട്രസ്റ്റി ബോർഡ് മുൻ ചെയർമാൻ ഡോ.വി.രാമചന്ദ്രൻ, കെ.എം.ബഷീർ, പ്രവീൺ കാറാട്ട് എന്നിവർ സംസാരിച്ചു.വിവിധ വ്യാപാര സംഘടനാ നേതാക്കൾ, ഓട്ടോ- ടാക്സി തൊഴിലാളി ഭാരവാഹികൾ എന്നിവരും സംബന്ധിച്ചു.