ലാ ആർട്ട്ഫെസ്റ്റ് നാളെ തുടങ്ങും
പേരാവൂർ : ചിത്ര-ശിൽപ കലാപ്രവർത്തകരുടെയും കരകൗശല കലാകാരന്മാരുടെയും ആധുനിക സാങ്കേതിക വിദ്യാകാരന്മാരുടെയും ഒത്തുചേരൽ വേദിയാവുന്ന ‘ലാ ആർട്ട്ഫെസ്റ്റിന് ‘ ശനിയാഴ്ച മണത്തണ കോട്ടക്കുന്നിൽ തുടക്കമാവും. ഫെസ്റ്റിൻ്റെ കർട്ടൻ റൈസർ പ്രോഗ്രാമായ ജോയി ചാക്കോയുടെ 50 വർഷത്തിലധികമായി തുടരുന്ന സർഗാത്മക കലാജീവിതത്തെ ആദരിക്കൽ ചടങ്ങ് നടക്കും.പതിറ്റാണ്ടുകളായി മേഖലയിലെ കലാസാംസ്കാരിക പ്രവർത്തനങ്ങളോട് ജോയ് ചാക്കോ പുലർത്തിയ സാഹോദര്യത്തേയും ലളിതകലാ അക്കാദമി അവാർഡ് നേടിയ കലാകൃതികളേയും സ്മരിച്ചുകൊണ്ടും ജോയ് ചാക്കോക്ക് നൽകുന്ന ആദരവാണ് ഈ ഫെസ്റ്റിവൽ. മുപ്പതോളം ചിത്ര-ശിൽപ കലാകാരന്മാർ ആർട്ട് ക്യാമ്പിൽ പങ്കെടുക്കും.
ശനിയാഴ്ച രാവിലെ ഒൻപതിന് ജോയി ചാക്കോയുടെ ചിത്ര പ്രദർശനം ആരംഭിക്കും. 10ന് “കോട്ടക്കുന്ന് പ്രാചീന ചരിത്രവും , അധിനിവേശചരിത്രവും” എന്ന വിഷയത്തിൽ രാജേഷ് മണത്തണ ചരിത്രാവതരണം നടത്തും. 10.45 ന് ആർട്ട് ക്യാമ്പ് ആരംഭിക്കും. നവാഗതരുടെ ആർട്ട് ക്യാമ്പ് കൊച്ചി ബിനാലെ ‘ആർട്ട് ബൈ ചിൽഡ്രൻ’ പ്രോഗ്രാം ഡയറക്ടറും ആർട്ടിസ്റ്റുമായ ബ്ലെയ്സ് ജോസഫ് നയിക്കും.വൈകിട്ട് സാംസ്കാരിക സമ്മേളനത്തിൽ സണ്ണി ജോസഫ് എം.എൽ.എ ജോയി ചാക്കോയുടെ 50 ലേറെ വർഷത്തെ കലാജീവിതത്തെ ആദരിക്കും.മലയോര കർഷകനായി ജീവിച്ചുകൊണ്ട് ജോയി ചാക്കോ കഴിഞ്ഞ 50 ൽ അധികം വർഷമായി നടത്തിക്കൊണ്ടിരിക്കുന്ന കലാപ്രവർത്തനങ്ങളേയും കലാകൃതികളേയും മുൻനിർത്തിയുള്ള പഠനം ഡോ. ശ്രീലക്ഷ്മി എസ്.ബി അവതരിപ്പിക്കും. എഴിന് ‘ഗസൽ സായാഹ്നം. ഞായറാഴ്ച രാവിലെ ചിത്രകലാ ക്യാമ്പ് .രണ്ടു ദിവസവും നിധി ബുക്സിന്റെ പുസ്തകമേളയും ക്യാമ്പിലുണ്ടാകും.
