കണ്ണൂർ:ശുചിത്വ മാലിന്യ സംസ്കരണ രംഗത്തെ പ്രത്യേക ഇടപെടലിലൂടെ 627 ടൗണുകളും പൊതുസ്ഥലങ്ങളും ഹരിത പദവിയിലേക്ക്. ഹരിത ശുചിത്വ സുന്ദര ജില്ലയാകാൻ ആറ് മേഖലകളിൽ പ്രത്യേക കർമപദ്ധതി തയ്യാറായി. ഹരിത ടൗണുകൾ, ഹരിത പൊതുസ്ഥലങ്ങൾ, ഹരിത വിദ്യാലയങ്ങൾ, ഹരിത സ്ഥാപനങ്ങൾ, ഹരിത ടൂറിസം കേന്ദ്രങ്ങൾ ഹരിത കലാലയങ്ങൾ എന്നിങ്ങനെ സമ്പൂർണ ശുചിത്വ ജില്ലയെന്ന ലക്ഷ്യം കൈവരിക്കാനാണ്‌ പദ്ധതി. ജില്ലയിൽ 243 ടൗണുകളെ ഹരിതടൗണുകളാക്കും. 57 ടൗണുകൾ ഇതിനകം ഹരിതപദവിയിലെത്തി. ബാക്കി 186 ടൗണുകൾ 2025 ജനുവരി 26നകം ഹരിത പദവിയിലേക്കെത്തും. മാർക്കറ്റുകളായും പൊതുസ്ഥലങ്ങളായും കണ്ടെത്തിയ 463 എണ്ണത്തിൽ 22 എണ്ണം ഹരിതപദവി നേടി. ബാക്കി 441 എണ്ണം ഡിസംബർ 31നകം ഹരിതപദവിയിലെത്തും. 39 ടൂറിസം കേന്ദ്രങ്ങളെയും ഹരിതടൂറിസം കേന്ദ്രങ്ങളാക്കും. ഇരുപതിനായിരം കുടുംബശ്രീ അയൽക്കൂട്ടങ്ങളിൽ 4,947 ഹരിതപദവി നേടിയിട്ടുണ്ട്. 95 കലാലയങ്ങളിൽ 41 ഹരിതകലാലയ പദവി നേടി. ബാക്കി 54 എണ്ണം ഡിസംബർ 31നകം ഹരിതപദവി നേടും.

1,629 വിദ്യാലയങ്ങളിൽ 980 എണ്ണത്തിന്‌ ഹരിതപദവി ലഭിച്ചു. 649 വിദ്യാലയങ്ങൾ ഡിസംബർ 31നകം ഹരിതപദവി നേടുന്നതിനുള്ള പ്രവർത്തനങ്ങൾക്ക്‌ ശിൽപ്പശാല രൂപംനൽകി. 4,659 സ്ഥാപനങ്ങളിൽ 1,391 എണ്ണത്തിന് ഹരിതസ്ഥാപന പദവി ലഭിച്ചു. ബാക്കിയുള്ളവയെയും ഹരിതപദവിയിലെത്തിക്കാനുള്ള നടപടികൾ ജില്ലാ ശിൽപ്പശാല ചർച്ചചെയ്‌തു. രണ്ടാംദിവസത്തെ ശിൽപ്പശാല തദ്ദേശ സ്വയംഭരണവകുപ്പ് അഡീഷണൽ ഡയരക്ടർ ബി കെ ബലരാജ് ഉദ്ഘാടനംചെയ്തു. ജോ. ഡയറക്ടർ ടി ജെ അരുൺ അധ്യക്ഷനായി.
ശുചിത്വമിഷൻ സംസ്ഥാന പ്രതിനിധികളായ മെൽവിൻ ഡാനിയൽ, പൂജാ മേനോൻ, കെ.എസ്ഡബ്ല്യുഎം.പി എൻജിനിയർ ശ്യാമപ്രസാദ്, ഹരിതകേരളം ജില്ലാ കോ–– ഓഡിനേറ്റർ ഇ.കെ സോമശേഖരൻ, ശുചിത്വ മിഷൻ ജില്ലാ കോ-–-ഓഡിനേറ്റർ കെ എം സുനിൽകുമാർ തുടങ്ങിയവർ പങ്കെടുത്തു.

പരിയാരം:ആയുർവേദത്തിലെ അറിവുകൾ കണ്ടും കേട്ടുമറിയാൻ പൊതുജനങ്ങൾക്കും വിദ്യാർഥികൾക്കും അവസരമൊരുക്കുകയാണ് പരിയാരം ഗവ. ആയുർവേദ കോളേജ്. ആന്തരാവയവങ്ങൾ, മനുഷ്യശരീരം, ഔഷധസസ്യങ്ങൾ, മരുന്നുകൾ, വിവിധതരം ആയുർവേദ ചികിത്സകൾ എന്നിവയെല്ലാം ഉൾപ്പെടുത്തിയാണ് എക്സ്പോ.ദേശീയ ആയുർവേദ ദിനത്തോടനുബന്ധിച്ചാണ് സംഘടിപ്പിക്കുന്നത്. കോളേജിൽ ഒരു മാസമായി നടക്കുന്ന ജനകീയ ആയുർവേദ ബോധവൽക്കരണ പരിപാടികളുടെ സമാപനം കുറിച്ച്‌ രണ്ടുദിവസത്തെ ആയുർവേദ പ്രദർശനം ആശുപത്രി സൂപ്രണ്ട് ഡോ. ഗംഗാധരൻ ഉദ്ഘാടനംചെയ്തു.കോളേജിലെ വിദ്യാർഥികളുടെ ആശയമായ ആയുർ മാസ്ക്, മുടി സംരക്ഷണ മരുന്നുകൾ, കൊതുകിനെ തുരത്താനുള്ള മാർഗം തുടങ്ങി നവീന ആശയങ്ങളും എക്സ്പോയിലുണ്ട്. ഉർസുലിൻ, മേരി മാതാ, കടന്നപ്പള്ളി ഹൈസ്കൂൾ എന്നിവിടങ്ങളിലെ വിദ്യാർഥികൾ ആയുർവേദ കോളേജ് ക്യാമ്പസിലെ ഔഷധത്തോട്ടവും എക്സിബിഷനും സന്ദർശിച്ചു. സൗജന്യമായാണ് പ്രവേശനം. എക്സ്പോ ബുധൻ സമാപിക്കും.

തളിപ്പറമ്പ് : എക്സൈസ് സർക്കിൾ ഇൻസ്പെക്ടർ കെ.കെ.ഷിജിലും സംഘവും നടത്തിയ പരിശോധനയിൽ പയ്യന്നൂർ പെരിങ്ങോം മടക്കാംപൊയിലിലെ മേപ്രത്ത് വീട്ടിൽ എം. വി. സുഭാഷ് (43) 25 കിലോ കഞ്ചാവുമായി അറസ്റ്റിലായി. കാറിൽ പ്ലാറ്റ്ഫോമിന് അടിയിലായി നിർമ്മിച്ച രഹസ്യ അറയിൽ കടത്തി കൊണ്ടുവരുകയായിരുന്ന കഞ്ചാവാണ് പിടികൂടിയത്. അസി.എക്സൈസ് ഇൻസ്പെക്ടർ ഗ്രേഡ് മാരായ കെ.കെ.രാജേന്ദ്രൻ, പി. വി. ശ്രീനിവാസൻ, പ്രിവൻ്റീവ് ഓഫീസർ ഗ്രേഡ് കെ. കെ. കൃഷ്ണൻ, സിവിൽ എക്സൈസ് ഓഫീസർമാരായ ടി. വി. ശ്രീകാന്ത്, കെ.വിനോദ്, പി. വി. സനേഷ്, പി.സൂരജ്, സിവിൽ എക്സൈസ് ഓഫീസർ ഡ്രൈവർ സി. വി. അനിൽകുമാർ എന്നിവരും സംഘത്തിലുണ്ടായിരുന്നു.