ആലപ്പുഴ: മലയാളികളെ കംപ്യൂട്ടര്‍ സാക്ഷരരാക്കുന്നതില്‍ നിര്‍ണായക പങ്കുവഹിച്ച അക്ഷയയ്ക്ക് തിങ്കളാഴ്ച 22 വര്‍ഷം തികയും. സര്‍ക്കാരിന്റെ വിവിധ ഓണ്‍ലൈന്‍ സേവനങ്ങള്‍ നല്‍കുന്ന ഔദ്യോഗികകേന്ദ്രമായി അക്ഷയ മാറിയെങ്കിലും അതിന്റെ പ്രയോജനം സംരംഭകര്‍ക്കു ലഭിക്കുന്നില്ല. വര്‍ഷങ്ങളായിട്ടും പരിഷ്‌കരിക്കാത്ത സേവനനിരക്കും ആധാര്‍ സേവനങ്ങള്‍ നല്‍കിയ തുക ഒരുവര്‍ഷത്തിലേറെയായി ലഭിക്കാത്തതുംമൂലം സംരംഭകര്‍ തളര്‍ച്ചയിലാണ്.

സേവനങ്ങളുടെ എണ്ണം കൂടിയതോടെ പല കേന്ദ്രങ്ങള്‍ക്കും കൂടുതല്‍ ജീവനക്കാരെ നിയോഗിക്കേണ്ടിവന്നു. ഏഴും എട്ടും ജീവനക്കാരുള്ള കേന്ദ്രങ്ങളുണ്ട്. കെട്ടിടവാടക, വൈദ്യുതി നിരക്ക്, ജീവനക്കാരുടെ വേതനം എന്നിവയുമായി നോക്കുമ്പോള്‍ ലഭിക്കുന്ന വരുമാനം കുറവായതാണു പ്രതിസന്ധിക്കുകാരണം. 2018-ലെ സേവന നിരക്കാണിപ്പോഴും. നിരക്ക് ഉയര്‍ത്തണമെന്നാവശ്യത്തില്‍ അനുകൂല തീരുമാനമുണ്ടായില്ല. അനധികൃത സേവനകേന്ദ്രങ്ങളുടെ കടന്നുകയറ്റവും തിരിച്ചടിയായി.

ബാങ്കിങ് ഉള്‍പ്പെടെ സര്‍ക്കാര്‍-സ്വകാര്യ മേഖലകളിലായി നൂറിലേറെ സേവനങ്ങള്‍ സംസ്ഥാനത്തെ 2600-ലേറെ വരുന്ന അക്ഷയകേന്ദ്രങ്ങളിലൂടെ നല്‍കുന്നുണ്ട്. കിടപ്പുരോഗികള്‍ക്കു വീട്ടിലെത്തിയും സേവനം നല്‍കുന്നു. കിടപ്പുരോഗികളുടെ മസ്റ്ററിങ്ങുമായി ബന്ധപ്പെട്ട് വീട്ടുപടിക്കല്‍ സേവനം നല്‍കുന്നതിന് നേരത്തേ 150 രൂപയുണ്ടായിരുന്നു. അത് പിന്നീട് സര്‍ക്കാര്‍ 50 രൂപയായി കുറച്ചു.

2002 നവംബര്‍ 18-ന് മലപ്പുറം ജില്ലയിലാണ് അക്ഷയയുടെ തുടക്കം. പിന്നീട് മറ്റു ജില്ലകളിലേക്കും വ്യാപിപ്പിക്കുകയായിരുന്നു. കംപ്യൂട്ടര്‍ സാക്ഷരതയായിരുന്നു ആദ്യം ലക്ഷ്യമിട്ടിരുന്നതെങ്കിലും പിന്നീട് മറ്റുസേവനങ്ങളും അതിന്റെ ഭാഗമായി. സംസ്ഥാന ഐ.ടി. മിഷന്റെ നിയന്ത്രണത്തിലാണ് അക്ഷയയുടെ പ്രവര്‍ത്തനം.

തിരുവനന്തപുരം: കെ.എസ്ഇബിയുടെ പുതിയ കണക്ഷൻ എടുക്കുന്നതുൾപ്പെടെ എല്ലാ ഉപഭോക്തൃ സേവനങ്ങളും ഓൺലൈൻ ആക്കുന്നു. ഓൺലൈൻ സേവനങ്ങൾ ഡിസംബർ 1 മുതൽ പ്രാബല്യത്തിൽ വരും. പുതിയതായി ഉപഭോക്തൃ സേവന വിഭാഗം രൂപീകരിക്കാനും തീരുമാനമായി.

ഏതെങ്കിലും ഓഫീസിൽ നേരിട്ട് അപേക്ഷ സ്വീകരിച്ചാൽ കർശന നടപടിയെന്നാണ് ചെയർമാൻ ബിജു പ്രഭാകറിന്റെ മുന്നറിയിപ്പ്. ആദ്യം ലഭിക്കുന്ന അപേക്ഷ ആദ്യം പരിഗണിക്കണം. വിതരണ വിഭാഗം ഡയറക്ടർ ഇത് കൃത്യമായി നിരീക്ഷിച്ച് ഉറപ്പാക്കണം. ഇംഗ്ലീഷിലുള്ള കെഎസ്ഇബിയുടെ വെബ്‌സൈറ്റിൽ മലയാളവും പറ്റുമെങ്കിൽ തമിഴും കന്നട ഭാഷയും ഉൾപ്പെടുത്തണം.

അപേക്ഷകൾ സ്വീകരിച്ചാൽ രണ്ട് പ്രവൃത്തി ദിവസത്തിനുള്ളിൽ തുകയെത്രയെന്ന് അറിയിക്കണം. തുടർ നടപടികൾ വാട്ട്‌സ്ആപ്പിലും എസ്എംഎസ്സായും ഉപഭോക്താവിന് ലഭിക്കുന്നതാണ്. ജനങ്ങളുടെ സേവനത്തിനും പരാതിപരിഹാരത്തിനുമായി വിതരണ വിഭാഗം ഡയറക്ടറുടെ കീഴിൽ കസ്റ്റമർ കെയർ സെല്ല് തുടങ്ങാനും തീരുമാനിച്ചിട്ടുണ്ട്. പരീക്ഷണാടിസ്ഥാനത്തിൽ തിരുവനന്തപുരത്തും എറണാകുളത്തും കോഴിക്കോടും ഓരോ കസ്റ്റമർ കെയർ സെന്റർ വീതം തുടങ്ങും. ഐടി വിഭാഗത്തിന്റെ കീഴിലായിരുന്ന കെഎസ്ഇബിയുടെ 1912 കാൾ സെന്റർ ഇനി കസ്റ്റമർ കെയർ സെല്ലിന്റെ ഭാഗമാവും.

കൊച്ചി : ഇതര വിഭാഗത്തിൽപ്പെട്ടവർ എതിർപ്പുന്നയിച്ചതിൻ്റെ പേരിൽ മതസ്ഥാപനങ്ങൾ തുടങ്ങുന്നതിന് അനുമതി നിഷേധിക്കാനാകില്ലെന്ന് ഹൈക്കോടതി. കടലുണ്ടി വില്ലേജിൽ കെ.ടി. മുജീബിൻ്റെ ഉടമസ്ഥതയിലുള്ള സ്ഥലത്ത് മുസ്‌ലിം പ്രാർഥനാ ഹാൾ നടത്തുന്നത് തടഞ്ഞ കോഴിക്കോട് കളക്ടറുടെ ഉത്തരവ് റദ്ദാക്കിയാണ് ജസ്റ്റിസ് സി.പി. മുഹമ്മദ് നിയാസിൻ്റെ നിരീക്ഷണം.

സ്വന്തം വിശ്വാസം അനുഷ്ഠിക്കാനും പ്രഖ്യാപിക്കാനുമുള്ള സ്വാതന്ത്ര്യം മൗലികാവകാശമാണ്. സമീപത്ത് മറ്റൊരു മോസ്‌കുണ്ടെന്നതും മറ്റൊന്ന് സ്ഥാപിക്കാനുള്ള അപേക്ഷ നിഷേധിക്കാൻ കാരണമല്ല. ഭൂമി നിയമപരമായി ഉപയോഗിക്കാനുള്ള മൗലികാവകാശം ഭരണകൂടം സംരക്ഷിക്കണമെന്നും കോടതി പറഞ്ഞു.

ഹർജിക്കാരൻ്റെ അപേക്ഷ വീണ്ടും പരിഗണിച്ച് ബന്ധപ്പെട്ടവരുമായി ചർച്ചനടത്തി മൂന്നു മാസത്തിനുള്ളിൽ തീരുമാനമെടുക്കാനും കോടതി നിർദേശിച്ചു. മതസ്ഥാപനമായി പ്രവർത്തിക്കാനുള്ള അനുമതി ലഭിക്കുംവരെ മതപരമായ ചടങ്ങുകൾ നടത്തരുതെന്നും നിർദേശമുണ്ട്

2004 മുതൽ ഹർജിക്കാരൻ തൻ്റെ സ്ഥലത്തുള്ള കെട്ടിടത്തിൽ പ്രാർഥനാ ഹാൾ നടത്തിയിരുന്നു. പരാതിയുയർന്നതോടെയാണ് കളക്ടർ 2020-ൽ അനുമതി നിഷേധിച്ചത്. കൊയിലാണ്ടി നഗരസഭയും നോട്ടീസ് നൽകി യിരുന്നു.