തളിപ്പറമ്പ്∙ സംസ്ഥാനാന്തര ചന്ദനക്കടത്ത് സംഘവുമായി ബന്ധമുണ്ടെന്ന് കരുതുന്ന 8 പേരെ തളിപ്പറമ്പ് വനംവകുപ്പ് പിടികൂടി. ഇവരിൽ നിന്ന് 2.600 കിലോഗ്രാം ചെത്തിയൊരുക്കിയ ചന്ദനവും 18 കിലോഗ്രാം ചീളുകളും പിടികൂടി. ചന്ദനം കടത്താൻ ഉപയോഗിച്ച ഓട്ടോറിക്ഷയും പിടികൂടി.ഓലയമ്പാടി പെരുവാമ്പ പി.വി.നസീർ (43), പെരുന്തട്ട വത്സൻ രാമ്പേത്ത് (43) എം.ചിത്രൻ (42), കൂവപ്രത്ത് ശ്രീജിത്ത്(37) എന്നിവരെയുമാണ് റേഞ്ച് ഓഫിസർ പി.രതീശന്റെ നേതൃത്വത്തിൽ അറസ്റ്റ് ചെയ്തത്. ചന്ദനം വിൽക്കാനുള്ള ശ്രമത്തിൽ പിടിയിലായ മറ്റു 4 പേരെ ചോദ്യം ചെയ്ത് വരികയാണ്.ശ്രീജിത്തിന്റെയും ചിത്രന്റെയും കയ്യിൽ നിന്നാണ് ചന്ദനം പിടികൂടിയത്. ജൂൺ 4ന് മലയാളികൾ ഉൾപ്പെടെ 6 പേരെ കണ്ടെയ്നറിൽ കടത്തുകയായിരുന്ന 1650 കിലോഗ്രാം ചന്ദനവുമായി സേലത്തുവച്ച് തമിഴ്നാട് വനംവകുപ്പ് പിടികൂടിയിരുന്നു. ഇതിൽ പ്രതികളായ മലപ്പുറം സ്വദേശി ഐ.ടി.മുഹമ്മദ് അബ്രാൽ, എ.പി.മുഹമ്മദ് മിഷാൽ എന്നിവരെ ചോദ്യം ചെയ്തപ്പോൾ പെരുവാമ്പയിലെ പി.വി.നസീർ മുഖേനെയാണ് ഇവർക്ക് ചന്ദനം ലഭിക്കുന്നതെന്ന് മനസ്സിലായി. തുടർന്ന് നസീറും ഇയാൾക്കുവേണ്ടി പണമിടപാട് നടത്തുന്ന വത്സനും പിടിയിലായി.

മയ്യിൽ:സ്വയം നെയ്‌തെടുത്ത ‘ഓലക്കുട’ ചൂടി, കാലംതെറ്റാതെ പെയ്യുന്ന ഓർമമഴ നനയുകയാണ്‌ കയരളം ഒറപ്പടിയിലെ കെ കെ മാധവി. കാലമൊരുപാട്‌ മാറിയെങ്കിലും മാധവിക്ക്‌ ഈ ഓലക്കുടയെ പിരിഞ്ഞൊരു ജീവിതമില്ല. പലരും ഗൃഹാതുരതയിലേക്ക്‌ മാറ്റിനിർത്തിയെങ്കിലും ഈ അറുപത്തിയെട്ടുകാരിക്ക്‌ ഓലക്കുട പഴയകാലത്തിന്റെ ഓർമമാത്രമല്ല, പാരമ്പര്യ വാസനയിൽ അലിഞ്ഞുചേർന്ന ജീവിതചിത്രംകൂടിയാണത്‌.
അച്ഛൻ കപ്പണപ്പറമ്പിൽ രാമനും അമ്മ കൂവോത്ത് കുനിമ്മൽ പാറുവും ഓലക്കുട നിർമിക്കുന്നത് കണ്ടാണ് മാധവിയും അതിന്റെ രീതികൾ പഠിച്ചു തുടങ്ങിയത്. ആ നിർമാണരീതി അണുകിട മാറാതെ ഇപ്പോഴും തുടരുന്നു. തൊഴിലുറപ്പ് ജോലിക്കുപോകുന്നുണ്ടെങ്കിലും ഓലക്കുട നിർമാണത്തിനും അവർ സമയം കണ്ടെത്തുന്നു. തൃക്കൈകുടയെന്നുകൂടി വിളിക്കുന്ന ഓലക്കുട നിർമാണ രംഗത്ത് അമ്പത്തിയേഴ് വർഷം മാധവി പിന്നിട്ടു.
പണ്ട്‌ ആചാരക്കുട മാത്രമായല്ല, സമ്പന്ന തറവാട്ടുകാർക്കുള്ള ഓലക്കുടയും കന്നുകാലി പൂട്ടുകാരുടെ തലക്കുടയും കർഷക തൊഴിലാളികൾക്ക് നാട്ടിക്കുടകളും തയ്യാറാക്കിയിരുന്നു. ഇന്നിപ്പോൾ ആചാരാനുഷ്ഠാനങ്ങളുടെ ഭാഗമായും ഓണക്കാലത്ത് മാവേലിവേഷം കെട്ടുന്നവർക്കുമാണ് ഓലക്കുട വേണ്ടിവരുന്നത്. ആവശ്യക്കാർ കുറഞ്ഞെങ്കിലും ഓരോ കുടയും ആസ്വദിച്ച് നിർമിക്കുകയാണ് ഈ നാട്ടുകലാകാരി. ഓട, മുള, പനയോല തുടങ്ങിയവയുടെ ലഭ്യതക്കുറവ് ബാധിക്കുന്നുണ്ടെന്ന് മാധവി പരിഭവിക്കുന്നു.പുതിയ തലമുറ ഈ രംഗത്തേക്ക് കടന്നുവരാനായി, കേരള ഗണക കണിശ സഭ കണ്ണൂരിൽ സംഘടിപ്പിച്ച ഓലക്കുട നിർമാണ പരിശീലനക്കളരിയിൽ ‘പരിശീലക’യായി ഇവർ തിളങ്ങിയിരുന്നു. 2019 ൽ തൃശൂരിൽ നാട്ടുകലാകാരക്കൂട്ടം “നാട്ടുപച്ച” അവാർഡു നൽകി. ഉത്തരമലബാറിലെ കനലാട്ട കാവുകളുണരുന്നതോടെ തൃക്കൈക്കുടകൾക്ക് ആവശ്യക്കാരേറും. ഒട്ടുമിക്ക കാവുകളിലും മാധവിയുടെ കൈയൊപ്പ്‌ പതിഞ്ഞ ഓലക്കുടകളുണ്ട്‌. പരേതനായ സി രാഘവനാണ് ഭർത്താവ്. കെ കെ സജേഷ്, കെ കെ നിമിഷ എന്നിവരാണ് മക്കൾ.

അംഗപരിമിതരായ വ്യക്തികള്‍ക്ക് നല്‍കുന്ന 23-ാമത് കാവിന്‍ കെയര്‍ എബിലിറ്റി അവാര്‍ഡിനുള്ള നാമനിര്‍ദ്ദേശങ്ങള്‍ ക്ഷണിച്ചു. വിശേഷ നേട്ടങ്ങള്‍ കൈവരിക്കുന്ന അംഗപരിമിതരില്‍ നിന്നാണ് നാമനിര്‍ദേശം ക്ഷണിക്കുന്നത്. ഇന്ത്യയിലാകമാനമുള്ള അംഗപരിമിതര്‍ക്ക് അപേക്ഷ സമര്‍പ്പിക്കാം. നവംബര്‍ എട്ടാണ് അവസാന തീയതി. നിരവധി വെല്ലുവിളികള്‍ നേരിട്ടിട്ടും ശ്രദ്ധേയമായ കാര്യങ്ങള്‍ ചെയ്ത അംഗപരിമിതരായ വ്യക്തികള്‍ കൈവരിച്ച നേട്ടങ്ങള്‍ ആഘോഷിക്കുന്നതിനും അവ പൊതുജനങ്ങള്‍ക്ക് മുമ്പില്‍ അവതരിപ്പിക്കുന്നതിന്റെയും ഭാഗമായാണ് അവാര്‍ഡ് നല്‍കുന്നത്. ദി കാവിന്‍ കെയര്‍ (CavinKare) എബിലിറ്റി അവാര്‍ഡ് ഫോര്‍ എമിനന്‍സ്, ദി കാവിന്‍ കെയര്‍ (CavinKare) എബിലിറ്റി മാസ്റ്ററി അവാര്‍ഡുകള്‍ എന്നീ രണ്ട് വിഭാഗങ്ങളിലായാണ് മത്സരം. 2003-ല്‍ സ്ഥാപിതമായതു മുതല്‍ ഇതുവരെ 95 വ്യക്തികളെ ആദരിച്ചിട്ടുണ്ട്. ഓണ്‍ലൈന്‍ നാമനിര്‍ദ്ദേശം ഫോമുകള്‍ക്കും കൂടുതല്‍ വിവരങ്ങള്‍ക്കും www.abilityfoundation.org അല്ലെങ്കില്‍ www.cavinkare.com സന്ദര്‍ശിക്കുക.