മട്ടന്നൂർ : കളറോഡ് പാലത്തിലും പരിസരത്തുമുള്ള വെള്ളക്കെട്ടിന് താത്കാലിക പരിഹാരമായി. മട്ടന്നൂർ നഗരസഭാ അധികൃതരുടെ നേതൃത്വത്തിൽ വെള്ളവും ചെളിയും നീക്കം ചെയ്തു. തലശ്ശേരി-വളവുപാറ റോഡ് നവീകരണത്തിന്റെ ഭാഗമായി നാലുവർഷം മുൻപ്‌ നിർമിച്ച പാലത്തിലാണ് വെള്ളക്കെട്ട് രൂക്ഷമായത്. പാലത്തിന്റെ അശാസ്ത്രീയ നിർമാണമാണ് വെള്ളക്കെട്ടിന് ഇടയാക്കുന്നതെന്ന് ആക്ഷേപമുയർന്നിരുന്നു. നഗരസഭാ സെക്രട്ടറി എസ്.വിനോദ് കുമാറിന്റെ നേതൃത്വത്തിലാണ് പ്രവൃത്തി നടത്തിയത്.

കളറോഡ് റോഡരികിൽ അനധികൃതമായി സ്ഥാപിച്ച ഷെഡ്ഡുകൾ ഇരിട്ടി നഗരസഭാ അധികൃതരുടെ നേതൃത്വത്തിൽ നീക്കി. വെള്ളം കെട്ടിക്കിടന്ന് കൊതുക്‌ പെരുകുന്ന സാഹചര്യത്തിലാണ് ഇവ നീക്കം ചെയ്തത്. നഗരസഭാധ്യക്ഷ കെ. ശ്രീലത, സ്ഥിരം സമിതി ചെയർമാൻ കെ.സുരേഷ്, സെക്രട്ടറി രാഗേഷ് പാലേരിവീട്ടിൽ, ക്ലീൻസിറ്റി മാനേജർ കെ.വി. രാജീവൻ, കൗൺസിലർ ബഷീർ എന്നിവരുടെ നേതൃത്വത്തിലാണ് പരിശോധന നടത്തിയത്.

മട്ടന്നൂർ : പഴശ്ശിരാജ എൻ.എസ്.എസ് കോളേജിൽ ബിരുദാനന്തര ബിരുദ തലത്തിൽ (കൊമേഴ്‌സ്, കണക്ക്) കമ്യൂണിറ്റി, സ്പോർട്‌സ് ക്വാട്ട എന്നിവയിൽ പ്രവേശനം നടത്തുന്നു. യോഗ്യരായവർ കണ്ണൂർ സർവകലാശാല ഓൺലൈൻ അപേക്ഷ നൽകിയ ശേഷം 30-ന് വൈകിട്ട് അഞ്ചിന് മുൻപ് കോളേജിൽ അപേക്ഷ നൽകണം. ഫോൺ: 0490 2471747.

മട്ടന്നൂർ : മട്ടന്നൂർ എക്സൈസ് റെയിഞ്ച് ഓഫീസിലെ അസി. എക്സൈസ് ഇൻസ്പെക്ടർ സി. ജയചന്ദ്രനും പാർട്ടിയും നടത്തിയ പരിശോധനയിൽ കുയിലൂർ സ്വദേശി ആർ. വേണുഗോപാൽ (69)എന്നയാളെ അറസ്റ്റ് ചെയ്തു. ഇയാളുടെ കൈവശം നിന്നും രണ്ട് ലിറ്റർ ചാരായം പിടിച്ചെടുത്തു.

എക്സൈസ് സംഘത്തിൽ പ്രിവൻ്റീവ് ഓഫീസർ പി.വി. സുലൈമാൻ, വി.എൻ. സതീഷ്, സിവിൽ എക്സൈസ് ഓഫീസർ കെ.കെ. രാഗിൽ എന്നിവരും ഉണ്ടായിരുന്നു.