റോഡിൽ ബൈക്കുമായി അപകടകരമായ രീതിയിൽ അഭ്യാസം; പൊലീസിനെ വെല്ലുവിളിച്ച് ഇൻസ്റ്റഗ്രാം റീൽസ്; 22കാരൻ അറസ്റ്റിൽ
തിരുവനന്തപുരം: റോഡിൽ ബൈക്കുമായി അപകടകരമായ രീതിയിൽ അഭ്യാസ പ്രകടനം നടത്തുകയും പൊലീസിനെയും മോട്ടോര്‍ വാഹനവകുപ്പിനെയും വെല്ലുവിളിച്ച് ഇതിന്റെ ദൃശ്യങ്ങള്‍ പ്രചരിപ്പിക്കുകയും ചെയ്ത യുവാവ് അറസ്റ്റില്‍. നെയ്യാറ്റിന്‍കര സ്വദേശി അഭിജിത്ത് (22) ആണ് അറസ്റ്റിലായത്. ഇയാളുടെ ബൈക്കും പിടിച്ചെടുത്തിട്ടുണ്ട്.
‘ലിക്വി മോളി 390’ എന്ന ഇന്‍സ്റ്റാഗ്രാം അക്കൗണ്ടിലൂടെയാണ് അഭിജിത്ത് ബൈക്ക് അഭ്യാസത്തിന്റെ റീലുകള്‍ പങ്കുവെച്ചിരുന്നത്. അപകടകരമായരീതിയില്‍ സ്വന്തം ജീവനും മറ്റുള്ളവരുടെ ജീവനും ഭീഷണിയാകുന്നരീതിയില്‍ റോഡിലൂടെ ബൈക്കോടിക്കുന്നതായിരുന്നു ദൃശ്യങ്ങളിലുണ്ടായിരുന്നത്. എതിരെ വരുന്ന കെ.എസ്.ആർ.ടിസി ബസിന്റെയും മറ്റ് വാഹനങ്ങളുടെയും നേർക്ക് ചീറിപായുകയും അടുത്തെത്തി വെട്ടിച്ച് അഭ്യാസം നടത്തുകയും ചെയ്യുന്നതാണ് വീഡ‍ിയോയിൽ കാണുന്നത്.ഇതിനൊപ്പം പൊലീസിനെയും മോട്ടോര്‍വാഹന വകുപ്പിനെയും വെല്ലുവിളിക്കുകയും ചെയ്തിരുന്നു. ഇതേ വീഡിയോ കേരള പൊലീസിനെ ടാഗ് ചെയ്താണ് യുവാവ് വെല്ലുവിളി നടത്തിയത്.
സംഭവം വാര്‍ത്തയാവുകയും വീഡിയോ ശ്രദ്ധയില്‍പ്പെടുകയും ചെയ്തതോടെയാണ് പൊലീസ് യുവാവിനെ പിടികൂടിയത്. അമരവിള- നെയ്യാറ്റിന്‍കര റോഡിലാണ് പ്രതി ബൈക്കില്‍ അഭ്യാസപ്രകടനം നടത്തിയതെന്ന് പൊലീസ് പറയുന്നു.
അപകടകരമായരീതിയില്‍ വാഹനമോടിച്ചതിനും ഇതിന്റെ ദൃശ്യങ്ങള്‍ പങ്കുവെച്ചതിനുമാണ് യുവാവിനെതിരേ കേസെടുത്തിരിക്കുന്നത്. പ്രതിയെ പിന്നീട് സ്റ്റേഷന്‍ ജാമ്യത്തില്‍ വിട്ടയച്ചു. യുവാവിനെതിരേ മോട്ടോര്‍ വാഹനവകുപ്പും നടപടി സ്വീകരിക്കും. പ്രതിയുടെ പിടിച്ചെടുത്ത ബൈക്ക് മോട്ടോര്‍ വാഹനവകുപ്പിന് കൈമാറുമെന്ന് പൊലീസ് അറിയിച്ചു
