താമരശ്ശേരി ചുരത്തിലെ ഗതാഗതക്കുരുക്ക്: അടിയന്തര പരിഹാരമുണ്ടാക്കും
കോഴിക്കോട്: താമരശ്ശേരി ചുരത്തിലെ വൻ ഗതാഗതക്കുരുക്കിന് അടിയന്തര പരിഹാരമുണ്ടാക്കുമെന്ന് ജില്ല കലക്ടർ സ്നേഹിൽ കുമാർ സിങ്. പുതുപ്പാടി ഗ്രാമപഞ്ചായത്ത് ഭരണസമിതി അംഗങ്ങൾ ചൊവ്വാഴ്ച ഉച്ചക്ക് കലക്ടറുമായി നടത്തിയ ചർച്ചയിലാണ് ദ്രുതഗതിയിലുള്ള നീക്കത്തിന് തീരുമാനം.
കഴിഞ്ഞ അവധിദിനങ്ങളിൽ ആഘോഷങ്ങൾക്കായി എത്തിയ വിനോദസഞ്ചാരികളുടെ തിരക്കുമൂലം ചുരത്തിൽ സമീപകാലത്തൊന്നും കാണാത്തവിധമുള്ള ഗതാഗതക്കുരുക്ക് അനുഭവപ്പെട്ടിരുന്നു. മണിക്കൂറോളമാണ് സ്ത്രീകളും കുട്ടികളും കുടിക്കാൻ വെള്ളംപോലും കിട്ടാതെയും പ്രാഥമികാവശ്യം നിറവേറ്റാൻ കഴിയാതെയും ദുരിതമനുഭവിച്ചത്.വാഹനങ്ങൾ ഇഴഞ്ഞു നീങ്ങുന്നതിനാൽ രോഗികളുമായി ആശുപത്രികളിലേക്കു പോകുന്ന ആംബുലൻസുകൾ കുരുക്കിലകപ്പെടുന്നത് ഏറെ ആശങ്കക്കിടയാക്കിയ സാഹചര്യത്തിലാണ് തീരുമാനം.
