ട്രെയിനിൽ സ്ത്രീക്ക് നേരെ ലൈംഗികാതിക്രമം: യുവാവ് അറസ്റ്റിൽ
പരപ്പനങ്ങാടി: ഓടുന്ന ട്രെയിനിൽ വെച്ച് യാത്രക്കാരിയോട് ലൈംഗികാതിക്രമം നടത്തിയ യുവാവ് പിടിയിൽ. പരപ്പനങ്ങാടി സദ്ദാം ബീച്ചിലെ അങ്കമാൻ്റെ പുരക്കൽ മുസ്തഫ (45) ആണ് അറസ്റ്റിലായത്. ഷൊർണ്ണൂരിൽ നിന്നും കോഴിക്കോട് ഭാഗത്തേക്ക് യാത്ര ചെയ്യുമ്പോൾ വെള്ളി രാത്രി പത്തോടെയാണ് യുവതിക്ക് മോശമായ അനുഭവം ഉണ്ടായത്. തുടർന്ന് യുവതി പരപ്പനങ്ങാടി പൊലീസ് സ്റ്റേഷനിൽ വിവരം അറിയിക്കുകയായിരുന്നു.
യാത്രക്കാർ കുറവുള്ള കമ്പാർട്മെന്റിൽ വച്ച് പിന്തുടർന്ന് മോശമായ രീതിയിൽ പെരുമാറുകയും സ്വകാര്യ ഭാഗങ്ങളിൽ സ്പർശിക്കുകയും ചെയ്തെന്നാണ് പരാതി. ട്രെയിനിൽ നടന്ന സംഭവമായതിനാൽ കോഴിക്കോട് റെയിൽവേ പൊലീസിന് പരപ്പനങ്ങാടി പൊലീസ് വിവരം കൈമാറിയിരുന്നു. പരപ്പനങ്ങാടി എസ് ഐ ശ്യാമിൻ്റെ നേതൃത്വത്തിൽ ശനിയാഴ്ച രാത്രിയാണ് പ്രതിയെ പിടികൂടിയത്. പ്രതിയെ റെയിൽവേ പൊലീസിന് കൈമാറും.
