റംസാൻ ഉപവാസം: പ്രമേഹരോഗികൾ ശ്രദ്ധിക്കേണ്ടത് എന്തെല്ലാം?

ആത്മീയ ചിന്ത, വിശ്വാസം, നിയന്ത്രണം എന്നിവയുടെ മാസമാണ് റംസാൻ. ലോകമെമ്പാടുമുള്ള ലക്ഷക്കണക്കിന് വിശ്വാസികൾ ഈ മാസം ഉപവാസം അനുഷ്ഠിക്കുന്നു. എന്നാൽ ഇക്കാര്യത്തിൽ പ്രമേഹരോഗികൾക്ക് പ്രത്യേക ജാഗ്രത അനിവാര്യമാണ്. പുലർച്ചെ മുതൽ സൂര്യാസ്തമനം വരെ ഭക്ഷണവും പാനീയങ്ങളും ഒഴിവാക്കുന്നത് രക്തത്തിലെ പഞ്ചസാര നില, മരുന്നുകളുടെ സമയം എന്നിവയെ ബാധിക്കാം. എന്നാൽ ശരിയായ ആസൂത്രണവും വിദഗ്ധരുടെ മേൽനോട്ടവും ഉണ്ടെങ്കിൽ പ്രമേഹരോഗികൾക്ക് സുരക്ഷിതമായി ഉപവാസം സാധ്യമാകും.

എല്ലാ പ്രമേഹരോഗികൾക്കും ഉപവാസം അപകടകരമാണെന്ന് പറയാനാകില്ല. ഇത് വ്യക്തിയുടെ ആരോഗ്യസ്ഥിതിയെ ആശ്രയിച്ചിരിക്കുന്നു.

• പ്രമേഹത്തിന്റെ തരം
• രക്തത്തിലെ പഞ്ചസാര അളവിലുള്ള നിയന്ത്രണം
• ഇൻസുലിൻ അല്ലെങ്കിൽ മരുന്നുകളുടെ ഉപയോഗം
• വൃക്ക, ഹൃദയ സംബന്ധമായ അനുബന്ധ പ്രശ്നങ്ങൾ

എന്നിവ ശ്രദ്ധിക്കേണ്ട ഘടകങ്ങളാണ്

രക്തത്തിലെ പഞ്ചസാരയുടെ അളവിലുള്ള നിയന്ത്രണം മോശമായവർ, പതിവായി ഷുഗർ കുറയുന്നവർ (ഹൈപോഗ്ലൈസീമിയ), ഗുരുതര അനുബന്ധ പ്രശ്നങ്ങൾ ഉള്ളവർ, ഗർഭിണികളായ പ്രമേഹരോഗികൾ എന്നിവർക്ക് ഉപവാസം സാധാരണയായി നിർദേശിക്കുന്നില്ല. ഇത്തരക്കാർ ഉപവാസം തുടങ്ങുന്നതിന് മുമ്പ് ഡോക്ടറുടെ ഉപദേശം തേടേണ്ടത് നിർബന്ധമാണ്.

ശ്രദ്ധിക്കേണ്ട പ്രധാന അപകടസാധ്യതകൾ

ഉപവാസം ഭക്ഷണക്രമത്തിൽ മാറ്റം വരുത്തുന്നതിനാൽ ചില ആരോഗ്യപ്രശ്നങ്ങൾ ഉണ്ടാകാം:

• രക്തത്തിലെ പഞ്ചാസാരയുടെ അളവ് കുറയുക (ഹൈപോഗ്ലൈസീമിയ)
• രക്തത്തിലെ പഞ്ചസാരയുടെ അളവ് ഉയരുക (ഹൈപർഗ്ലൈസീമിയ)
• ചിലർക്ക് ഡയബറ്റിക് കീറ്റോ ആസിഡോസിസ്

ദീർഘസമയത്തെ ഉപവാസവും ചൂടേറിയ കാലാവസ്ഥയും ഡീഹൈഡ്രേഷൻ സാധ്യത വർധിപ്പിക്കും. പ്രത്യേകിച്ച് ചെന്നൈ പോലുള്ള നഗരങ്ങളിൽ ഉയർന്ന താപനിലയുള്ള സാഹചര്യത്തിൽ കൂടുതൽ ജാഗ്രത ആവശ്യമാണ്.

രക്തത്തിലെ പഞ്ചസാരയുടെ അളവ് നിരീക്ഷിക്കുന്നത് അത്യാവശ്യമാണ്. ഇത് പരിശോധിക്കുന്നത് ഉപവാസം ലംഘിക്കുന്നില്ല. മറിച്ച് അത് സുരക്ഷിതത്വത്തിന് നിർണായകമാണ്.

പരിശോധിക്കാൻ ഉചിതമായ സമയം

• സഹൂർ (പുലർച്ചെ ഭക്ഷണം) മുമ്പ്
• രാവിലെ മധ്യഭാഗത്ത്
• ഉച്ചയ്ക്കുശേഷം
• ഇഫ്താറിന് മുമ്പ്
• ഇഫ്താറിന് രണ്ട് മണിക്കൂർ ശേഷം

രക്തത്തിലെ പഞ്ചസാരയുടെ അളവ് 70 mg/dL-ൽ താഴെയോ 300 mg/dL-ൽ കൂടുതലായോ ആയാൽ ഉടൻ ഉപവാസം അവസാനിപ്പിക്കണം.

മരുന്നുകളും ഇൻസുലിനും; സമയക്രമത്തിൽ മാറ്റം ആവശ്യമായേക്കാം

റംസാനിൽ മരുന്നുകളുടെ സമയം ക്രമീകരിക്കേണ്ടതായി വരാം. ചില ഗുളികകൾ ഇഫ്താറിലേക്കോ സഹൂരിലേക്കോ മാറ്റേണ്ടി വരാം. ഇൻസുലിൻ ഡോസ് കുറയ്ക്കുകയോ മാറ്റുകയോ ചെയ്യേണ്ടി വരാം. എന്നാൽ ഡോക്ടറുടെ നിർദ്ദേശമില്ലാതെ മരുന്നുകളിൽ മാറ്റം വരുത്തരുത്.

സമതുലിതമായ ഭക്ഷണക്രമം അനിവാര്യമാണ്

സഹൂർ (പുലർച്ചെ ഭക്ഷണം)

ദീർഘനേരം ഊർജം നിലനിർത്തുന്ന ഭക്ഷണം തിരഞ്ഞെടുക്കുക:

* മുഴുവൻ ധാന്യങ്ങൾ (ചാമ, ഓട്സ്, ബ്രൗൺ റൈസ്)

* മുട്ട, തൈര്, പയർവർഗങ്ങൾ

* പരിമിതമായ അളവിൽ കുരുക്കൾ

* മതിയായ വെള്ളം

ഉപ്പും വറുത്തഭക്ഷണവും ഒഴിവാക്കുക.

ഇഫ്താർ (ഉപവാസവിരാമം)

* ആദ്യം വെള്ളം കുടിക്കുക

* ഈന്തപ്പഴം കഴിക്കുന്നുവെങ്കിൽ ചെറിയ അളവിൽ മാത്രം

* പച്ചക്കറികളും പ്രോട്ടീനും ഉൾപ്പെടുത്തുക

* മിഠായിയും വറുത്ത ഭക്ഷണവും നിയന്ത്രിതമായി മാത്രം

ഇഫ്താറിൽ അതിരുകടന്ന് ഭക്ഷണം കഴിക്കുന്നത് ബ്ലഡ് ഷുഗർ പെട്ടെന്ന് ഉയരാൻ കാരണമാകും.

ഡീഹൈഡ്രേഷൻ ഒഴിവാക്കുക

ഇഫ്താറിനും സഹൂറിനും ഇടയിൽ മതിയായ വെള്ളം കുടിക്കുക. ഒരേസമയം കൂടുതൽ കുടിക്കുന്നതിനുപകരം ഇടവിട്ട് കുടിക്കുന്നത് നല്ലത്. കഫീൻ അടങ്ങിയ പാനീയങ്ങൾ കുറയ്ക്കുക.

വ്യായാമം – മിതമായ രീതിയിൽ

ഉപവാസസമയത്ത് ശക്തമായ വ്യായാമം ഒഴിവാക്കണം. ഇഫ്താറിന് ശേഷം ലഘുവായ നടക്കൽ പോലുള്ള വ്യായാമങ്ങൾ ഉചിതമാണ്. ഇക്കാര്യത്തിൽവിദഗ്ധരുടെ മാർഗനിർദേശം അനിവാര്യമാണ്

ഓരോ പ്രമേഹരോഗിയുടെയും ആരോഗ്യസ്ഥിതി വ്യത്യസ്തമാണ്. വ്യക്തിഗത ആരോഗ്യവിലയിരുത്തലും ഭക്ഷണക്രമവും മരുന്ന് ക്രമീകരണവും ഉൾപ്പെടുത്തിയ പദ്ധതിയോടെയാണ് സുരക്ഷിത ഉപവാസം സാധ്യമാകുന്നത്.

റംസാൻ ഉപവാസം ആത്മീയതയുടെ ഭാഗമായിരിക്കുമ്പോഴും ആരോഗ്യത്തിന് മുൻഗണന നൽകണം. ആരോഗ്യപ്രശ്നങ്ങൾ ഉണ്ടായാൽ ഉപവാസം അവസാനിപ്പിക്കുന്നത് മതപരമായും വൈദ്യശാസ്ത്രപരമായും ശരിയായ തീരുമാനമാണ്. ജാഗ്രതയും നിയന്ത്രണവും പാലിച്ചാൽ റംസാൻ ഉപവാസം ആരോഗ്യകരമായ അനുഭവമാക്കാം.