എൽ.പി/യു.പി അധ്യാപകരാകാം; യോഗ്യത പ്ലസ്ടു, ഡി.എൽ.എഡ് പ്രവേശനത്തിന് അപേക്ഷിക്കാം

തിരുവനന്തപുരം: കേരളത്തിലെ 101 സർക്കാർ/എയ്ഡഡ്, 101 സ്വാശ്രയ, ടീച്ചർ ട്രെയിനിങ് ഇൻസ്റ്റിറ്റ്യൂട്ടുകളിൽ (ടിടിഐകൾ) നടത്തുന്ന രണ്ടുവർഷത്തെ (നാല് സെമസ്റ്റർ) ഡിപ്ലോമ ഇൻ എലമെന്ററി എജുക്കേഷൻ (ഡിഎൽഎഡ്) പ്രോഗ്രാം പ്രവേശനത്തിന് അപേക്ഷിക്കാം.ഡിപ്ലോമ ഇൻ എജുക്കേഷൻ (ഡിഎഡ്) കോഴ്‌സിന്റെ പേരാണ് ഡിപ്ലോമ ഇൻ എലമെന്ററി എജുക്കേഷൻ (ഡിഎൽഎഡ്) എന്ന് ഏതാനും വർഷങ്ങൾക്കുമുൻപ്‌ പുനർനാമകരണം ചെയ്തിട്ടുള്ളത്. [തുടക്കത്തിൽ ടീച്ചേഴ്‌സ് ട്രെയിനിങ് സർട്ടിഫിക്കറ്റ് (ടിടിസി) എന്ന പേരിലാണ് ഈ പ്രോഗ്രാം അറിയപ്പെട്ടിരുന്നത്].ലോവർ പ്രൈമറി/അപ്പർ പ്രൈമറി സ്കൂൾ അധ്യാപകരാകാൻ അക്കാദമിക്, എലിജിബിലിറ്റി ടെസ്റ്റ് യോഗ്യതകൾക്കൊപ്പംവേണ്ട അധ്യാപകപരിശീലന യോഗ്യതയാണ് ഡിഎൽഎഡ്.

പ്രവേശന യോഗ്യത

50 ശതമാനം മാർക്കോടെ (ഒബിസി-45 ശതമാനം, പട്ടികവിഭാഗം -പാസ്) കേരള ഹയർ സെക്കൻഡറി/പ്രീഡിഗ്രി/തത്തുല്യ പരീക്ഷ ജയിച്ചിരിക്കണം.പട്ടികവിഭാഗക്കാരൊഴികെയുള്ളവരിൽ മൂന്നു ചാൻസിൽക്കൂടുതൽ എടുത്ത് (സേവ് എ ഇയർ, ചാൻസ് ആയി പരിഗണിക്കും) യോഗ്യതാപരീക്ഷ ജയിച്ചവർ അപേക്ഷിക്കാൻ അർഹരല്ല.

പ്രായം 2025 ജൂലായ് ഒന്നിന് 17 വയസ്സിൽ താഴെയോ 33 വയസ്സിനുമുകളിലോ ആകരുത്. ഒബിസിക്കാർക്ക് മൂന്നും പട്ടിക/ഭിന്നശേഷി വിഭാഗക്കാർക്ക് അഞ്ചും വർഷത്തെ ഇളവ് ഉയർന്നപ്രായപരിധിയിൽ ലഭിക്കും. വിമുക്തഭടന്മാർക്ക് അവരുടെ സൈനിക സേവനത്തിന്റെ കാലയളവ് ഇളവുനൽകും.

നേരത്തേ അധ്യാപകനായി അംഗീകാരം ലഭിച്ചിട്ടുള്ളവർക്ക് അവരുടെ അധ്യാപക സേവന കാലയളവ് ഉയർന്നപ്രായപരിധിയിൽ ഇളവുനൽകുന്നതിന് കണക്കാക്കും. മൊത്തം സീറ്റിൽ സയൻസ്, ഫ്യുമാനിറ്റീസ്, കൊമേഴ്‌സ് സ്ട്രീമുകൾക്ക് യഥാക്രമം 40, 40, 20 ശതമാനം സീറ്റ് അനുവദിക്കും. ഗവൺമെന്റ്/എയ്ഡഡ് സ്ഥാപനങ്ങൾക്ക്‌ ഒരു വിജ്ഞാപനവും സ്വാശ്രയ സ്ഥാപനങ്ങൾക്ക് മറ്റൊരു വിജ്ഞാപനവുമാണ് ഇറക്കിയിട്ടുള്ളത്. ഇവ education.kerala.gov.in -ൽ ഉണ്ട് (അനൗൺസ്‌മെന്റ്‌സ് ലിങ്ക്). ഓരോ വിഭാഗത്തിലെയും സ്ഥാപനങ്ങളുടെ പട്ടികയും അപേക്ഷാഫോമും വിജ്ഞാപനങ്ങളിലുണ്ട്. സ്വാശ്രയ സ്ഥാപനങ്ങളിൽ ഓരോ മീഡിയത്തിനും അനുവദിക്കപ്പെട്ട 50 സീറ്റിൽ 50 ശതമാനം ഓപ്പൺ മെറിറ്റും 50 ശതമാനം മാനേജ്‌മെന്റ് ക്വാട്ടയും ആയിരിക്കും.

ന്യൂനപക്ഷ എയ്ഡഡ്

എയ്ഡഡ് വിഭാഗത്തിൽ ന്യൂനപക്ഷ സമുദായങ്ങൾ നടത്തുന്ന ടിടിഐകളിൽ 50 ശതമാനം സീറ്റുകളിൽ പൊതു മെറിറ്റ് അടിസ്ഥാനത്തിലും 50 ശതമാനം സീറ്റുകളിൽ അതതു ന്യൂനപക്ഷസമുദായ വിഭാഗത്തിൽനിന്ന്‌ യോഗ്യതയുടെ അടിസ്ഥാനത്തിലും പ്രവേശനം നൽകും.

മൈനോറിറ്റി വിഭാഗത്തിൽപ്പെടാത്ത എയ്ഡഡ് ടിടിഐകളിൽ 20 ശതമാനം സീറ്റിൽ മാനേജർമാർ അർഹതയുടെ അടിസ്ഥാനത്തിൽ പ്രവേശനം നൽകും. അർഹത നിർണയിക്കുന്ന രീതി ബന്ധപ്പെട്ട വിജ്ഞാപനത്തിൽ വിശദീകരിച്ചിട്ടുണ്ട്.

സ്വാശ്രയ ടി.ടി.ഐ

സ്വാശ്രയ സ്ഥാപനങ്ങളിലെ 50 ശതമാനം മാനേജ്‌മെന്റ് സീറ്റ്, യോഗ്യതയുടെ അടിസ്ഥാനത്തിൽ അതത് മാനേജർമാർ നികത്തും. യോഗ്യതാപരീക്ഷാ മാർക്കിന് 65-ഉം ഇന്റർവ്യൂ മാർക്കിന് 35-ഉം ശതമാനം വെയ്‌റ്റേജ് നൽകിയാണ് പ്രവേശന അർഹത നിർണയിക്കുന്നത്.

അപേക്ഷാ വ്യവസ്ഥകൾ

ഗവൺമെന്റ്/എയ്ഡഡ് വിഭാഗത്തിലും സ്വാശ്രയ വിഭാഗത്തിലും ഒന്നുവീതം റവന്യുജില്ലയിലേക്കേ ഒരാൾക്ക് അപേക്ഷിക്കാനാകൂ. അപേക്ഷിക്കുന്ന റവന്യുജില്ലയിൽ, പരിഗണിക്കപ്പെടേണ്ട സ്ഥാപനങ്ങൾ, മുൻഗണന നിശ്ചയിച്ച് അപേക്ഷയിൽ നൽകണം. അപേക്ഷാഫീസ്, ഗവൺമെന്റ്/എയ്ഡഡ് വിഭാഗത്തിലേക്ക് അഞ്ചുരൂപയും സ്വാശ്രയ വിഭാഗത്തിലേക്ക് 100 രൂപയുമാണ്. അടയ്ക്കേണ്ട രീതി വിജ്ഞാപനത്തിൽ നൽകിയിട്ടുണ്ട്. പട്ടികവിഭാഗക്കാർക്ക് അപേക്ഷാഫീസില്ല. പ്രവേശനം തേടുന്ന റവന്യുജില്ലയിലെ വിദ്യാഭ്യാസ ഡെപ്യൂട്ടി ഡയറക്ടർക്കാണ് അപേക്ഷ നൽകേണ്ടത്. വിലാസം വിജ്ഞാപനത്തിലുണ്ട്.

എയ്ഡഡ്, സ്വാശ്രയ വിഭാഗങ്ങളിലെ മാനേജ്മെന്റ് സീറ്റുകളിലേക്കു പരിഗണിക്കപ്പെടാൻ ബന്ധപ്പെട്ട സ്ഥാപനത്തിലേക്ക് ഫീസടച്ച് അപേക്ഷ നൽകണം. എയ്ഡഡ് വിഭാഗ മാനേജ്‌മെന്റ് അപേക്ഷയുടെ പകർപ്പ് ബന്ധപ്പെട്ട റവന്യുജില്ലാ വിദ്യാഭ്യാസ ഡെപ്യൂട്ടി ഡയറക്ടർക്കും നൽകണം. അപേക്ഷകൾ സ്വീകരിക്കുന്ന സമയപരിധി ഓഗസ്റ്റ് 11-ന് വൈകീട്ട് അഞ്ച്. സംവരണ സീറ്റുകളുടെ വിശദാംശങ്ങൾ, തിരഞ്ഞെടുപ്പുരീതി തുടങ്ങിയവ ബന്ധപ്പെട്ട വിജ്ഞാപനത്തിൽ ലഭിക്കും. സ്വാശ്രയ സ്ഥാപനങ്ങളിലെ മെറിറ്റ് വിഭാഗം വിദ്യാർഥികളുടെ വാർഷിക ഫീസ് 30,000 രൂപയാണ്. മാനേജ്മെന്റ് ക്വാട്ട ഫീസ് 35,000 രൂപയും. ഡിപ്പാർട്ട്‌മെന്റൽ ക്വാട്ട: ഹിന്ദി, അറബിക്, ഉറുദു, സംസ്കൃതം കോഴ്‌സുകൾ (പൊതു/ഡിപ്പാർട്ട്‌മെന്റൽ ക്വാട്ട -ഗവൺമെന്റ്), ഹിന്ദി (സ്വാശ്രയം) എന്നിവയിലേക്കും അപേക്ഷ ക്ഷണിച്ചിട്ടുണ്ട്. അവയുടെ വിശദാംശങ്ങൾ അപേക്ഷ നൽകേണ്ട അവസാന തീയതി തുടങ്ങിയ വിവരങ്ങൾ education.kerala.gov.in -ലെ ബന്ധപ്പെട്ട വിജ്ഞാപനങ്ങളിൽ ലഭിക്കും.