പേരാവൂർ: കല്ലേരിമലയിൽ കെ.എസ്.ആർ.ടി.സി ബസുകൾ കൂട്ടിയിടിച്ച് നിരവധി യാത്രക്കാർക്ക് പരിക്ക്. മാനന്തവാടിയിലേക്ക് പോവുന്ന ബസും പയ്യാവൂർക്ക് പോവുന്ന ബസും കൂട്ടിയിടിക്കുകയായിരുന്നു. പരിക്കേറ്റവരെ പേരാവൂരിലെ വിവിധ ആസ്പത്രികളിൽ പ്രവേശിപ്പിച്ചു. ഇന്ന് വൈകിട്ട് മൂന്ന് മണിയോടെയാണ് അപകടം.

സെബാസ്റ്റ്യൻ ജോർജ് തയ്യാറാക്കിയ സ്മരണികയുടെ പ്രകാശനം ജിമ്മിയുടെ മൂത്ത സഹോദരൻ റിട്ട.ഐ.ജി ജോസ് ജോർജ് ജിമ്മിയുടെ കൊച്ചുമകൻ ജേക്കബ് ജോർജിന് കൈമാറി പ്രകാശനം ചെയ്യുന്നു

പേരാവൂർ: ജിമ്മിജോർജിന്റെ 37-ാം ചരമവാർഷികത്തോടനുബന്ധിച്ച് സഹോദരൻ സെബാസ്റ്റ്യൻ ജോർജ് തയ്യാറാക്കിയ സ്മരണികയുടെ പ്രകാശനം നടത്തി. ജിമ്മിയുടെ മൂത്ത സഹോദരൻ റിട്ട.ഐ.ജി ജോസ് ജോർജ് ജിമ്മിയുടെ കൊച്ചുമകൻ ജേക്കബ് ജോർജിന് കൈമാറി പ്രകാശനം നിർവഹിച്ചു.

പേരാവൂർ മേജർ ആർക്കി എപ്പിസ്‌കോപ്പൽ ആർച്ച് പ്രീസ്റ്റ് ഫാദർ മാത്യു തെക്കേമുറിയിൽ, ഫാദർ സനീഷ്, സെബാസ്റ്റ്യൻ ജോർജ്, ലൗലി ജോർജ്, ജോസഫ് ജോർജ്, ഫ്രാൻസിസ് ബൈജു ജോർജ്, സ്റ്റാൻലി ജോർജ്, ഡോ.ലില്ലി, കെ.ജെ.മേരി എന്നിവർ സംബന്ധിച്ചു.

1970 മുതലുള്ള ജോർജ് കുടുംബത്തിന്റെ ചരിത്രം, കായികരംഗത്ത് ജോർജ് ബ്രദേഴ്‌സ് നേടിയ നേട്ടങ്ങളുടെ വിശദവിവരങ്ങൾ, നാട്ടിലെ കായിക താരങ്ങൾക്കായി സ്ഥാപിച്ച ജിമ്മിജോർജ് സ്‌പോർട്‌സ് അക്കാദമി, അഞ്ജു-ബോബി സ്‌പോർട്‌സ് ഫൗണ്ടേഷൻ , ജിമ്മിജോർജ് പുരസ്‌കാര ജേതാക്കളായ 36 കായികതാരങ്ങളുടെ വിവരങ്ങൾ തുടങ്ങിയവ സ്മരണികയിൽ പ്രതിപാദിച്ചിട്ടുണ്ട്. കായിക താരങ്ങൾക്ക് റഫറൻസാക്കാനും സ്മരണിക ഉപകരിക്കും.

പേരാവൂർ : ഹരിതകേരളം മിഷൻ വിവിധ വകുപ്പുകളുടെ സഹായത്തോടെ നടത്തിയ “മാപ്പത്തോൺ മാപ്പിങ്” സർവേയിൽ ലഭിച്ച മാപ്പുകൾ പഞ്ചായത്തുകൾക്ക് കൈമാറി.പേരാവൂർ ബ്ലോക്ക് ഹാളിൽ ജില്ലാ പഞ്ചായത്ത് പ്രസിഡന്റ് അഡ്വ. കെ. കെ. രത്നകുമാരി മാപ്പുകളുടെ കൈമാറ്റം ഉദ്ഘാടനം ചെയ്തു. കണിച്ചാർ, കൊട്ടിയൂർ, കേളകം, പേരാവൂർ, കോളയാട്, മുഴക്കുന്ന് പഞ്ചായത്ത് പ്രതിനിധികൾ ഏറ്റുവാങ്ങി. ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ അധ്യക്ഷനായി. നവകേരളം കർമപദ്ധതി സംസ്ഥാന അസി. കോർഡിനേറ്റർ ടി.പി. സുധാകരൻ പദ്ധതി വിശദീകരിച്ചു. ബ്ലോക്ക് വൈസ് പ്രസിഡന്റ് പ്രീത ദിനേശൻ, പേരാവൂർ പഞ്ചായത്ത് പ്രസിഡന്റ് പി.പി. വേണുഗോപാലൻ, ഹരിതകേരളം മിഷൻ ജില്ലാ കോർഡിനേറ്റർ ഇ. കെ. സോമശേഖരൻ, ജില്ലാ പഞ്ചായത്ത് അംഗം വി.ഗീത, ബ്ലോക്ക് ജോയിന്റ് ബി.ഡി.ഒ ബിജു ജോസഫ്, സി.എസ്. സ്വപ്ന തുടങ്ങിയവർ സംസാരിച്ചു.

സംസ്ഥാനത്തെ പശ്ചിമഘട്ടത്തോട് ചേർന്നുകിടക്കുന്ന ഗ്രാമ പഞ്ചായത്തുകളിലെ തോടുകൾ, പുഴകൾ എന്നിവയാണ് കഴിഞ്ഞ വർഷം ഡിജിറ്റൽ സർവേ ചെയ്തത്. തോടരികിലൂടെ സഞ്ചരിച്ചു മൊബൈൽ ആപ്പിൽ രേഖപെടുത്തിയ മാപ്പുകൾ ഐ. ടി.മിഷന്റെ സഹായത്തോടെ കൂട്ടിയോജിപ്പിച്ചാണ് ഓരോ പഞ്ചായത്തിന്റെയും ജല സ്രോതസുകളുടെ ഡിജിറ്റൽ രൂപം തയ്യാറാക്കിയത്. 83 നീർത്തടങ്ങളിലായി 1331 തോടുകളാണ് പേരാവൂർ ബ്ലോക്കിലുള്ളത്.