അപകടത്തിൽ പെട്ട ആഡംബര കാറിൽ എം.ഡി.എം.എയും തുലാസും; ഒരാൾ പിടിയിൽ
കോഴിക്കോട്: കൊടുവള്ളി ആവിലോറയില് മയക്കുമരുന്ന് വില്പ്പന സംഘം സഞ്ചരിച്ച ആഡംബര കാര് താഴ്ചയിലേക്ക് മറിഞ്ഞു. കാറിലുണ്ടായിരുന്ന രണ്ടു പേരിൽ ഒരാൾ പോലീസിൻ്റെ പിടിയിലാണ്.
താമരശ്ശേരി വെഴുപ്പൂര് ചുണ്ട കുന്നുമ്മല് അനുവിന്ദ് പോലീസ് പിടിയിലായി. കാറിലുണ്ടായിരുന്ന കത്തറമ്മല് പുത്തന് പീടികയില് ഹബീബ് റഹ്മാന് പോലീസ് വാഹനം പരിശോധിക്കുന്നതിനിടെ ഓടി രക്ഷപ്പെട്ടു.
ആവിലോറ പാറക്കണ്ടി മുക്കില് ശനിയാഴ്ച പുലര്ച്ചെയാണ് സംഭവം. കെ. എല്. 57 എന് 6067 നമ്പര് ബെന്സ് കാറാണ് നിയന്ത്രണം വിട്ട് താഴ്ചയിലുള്ള വീട്ടുമുറ്റത്തേക്ക് മറിഞ്ഞത്. ശബ്ദം കേട്ട് വീട്ടുകാര് എത്തിയപ്പോൾ അബോധാവസ്ഥയിലായിരുന്ന രണ്ടു പേരെ കാറിൽ കണ്ടു.
പിന്നീട് ഇവര് ഉണര്ന്ന് കാറിൽ പരിശോധിക്കുന്നതുകണ്ട് സംശയം തോന്നിയ നാട്ടുകാര് നോക്കിയപ്പോഴാണ് മയക്കുമരുന്ന്, ഇലക്ട്രിക് തുലാസ് എന്നിവ കണ്ടെത്തിയത്. തുടര്ന്ന് നാട്ടുകാര് ഇവരെ പിടികൂടി കൊടുവള്ളി പോലീസിന് കൈമാറുകയായിരുന്നു.
ഇതിനിടെ കാറില് നിന്ന് ഒരു പൊതി ഇവര് പുറത്തേക്ക് വലിച്ചെറിയുകയും ചെയ്തു. കൊടുവള്ളി എസ്.ഐ അനൂപ് അരീക്കരയുടെ നേതൃത്വത്തില് പുറത്തും കാറിലും നടത്തിയ പരിശോധനയില് കവറിലാക്കി പുറത്തേക്ക് വലിച്ചെറിഞ്ഞതും പേഴ്സില് ഒളിപ്പിച്ചതുമായ 3.5 ഗ്രാം എം.ഡി.എംഎ കണ്ടെടുത്തു.
