മോഷ്ടിച്ച നമ്പർ പ്ളേറ്റുപയോഗിച്ച് വണ്ടിയോടിച്ചു; ഫൈനടക്കാൻ നോട്ടിസെത്തിയത് ഉടമസ്ഥന്..!
തിരുരങ്ങാടി: ചെമ്മാട്ട് നിർത്തിയിട്ട ബൈക്കിന്റെ നമ്പർ പ്ലേറ്റ് മോഷണം പോയി, ഗതാഗത നിയമ ലംഘനത്തിന് ആലപ്പുഴയിൽ നിന്ന് പിഴ. ചെമ്മാട് കെ .പി. അഷ്റഫിനാണ് ആലപ്പുഴ അരൂരിൽ നിന്ന് നിയമ ലംഘനത്തിന് നോട്ടിസ് ലഭിച്ചത്.
കഴിഞ്ഞ 12 ന് തിങ്കളാഴ്ച രാത്രി സുഹൃത്തുക്കളോടൊപ്പം യാത്ര പോകുന്നതിനു മുൻപ് അഷ്റഫ് ബൈക്ക് ചെമ്മാട് സികെ നഗർ റോഡ് ജംക‍്ഷനിൽ നിർത്തിയിട്ടിരന്നു.
14ന് രാവിലെ തിരിച്ചെത്തി ബൈക്ക് എടുക്കാനെത്തിയപ്പോഴാണ് പിൻഭാഗത്തെ നമ്പർ പ്ലേറ്റ് മോഷണം പോയത് അറിയുന്നത്. ബൈക്കിലെ പെട്രോൾ മുഴുവൻ ഊറ്റിയെടുക്കുകയും ചെയ്തിരുന്നു.
15ന് ആലപ്പുഴ അരൂരിൽ നിന്ന് ട്രാഫിക് പൊലീസിന്റെ മൊബൈൽ സന്ദേശം ലഭിച്ചു. അഷ്റഫിന്റെ ബൈക്ക് 15ന് രാവിലെ 11.21ന് നിയമലംഘനം നടത്തിയതിന് പിഴ അടയ്ക്കണം എന്നായിരുന്നു സന്ദേശം.
ഓൺലൈനിൽ പരിശോധിച്ചപ്പോൾ ബൈക്കിന്റെ ഫോട്ടോയും കണ്ടു. ഫോട്ടോയിൽ മറ്റൊരു ബൈക്കിൽ 2 പേർ പോകുന്നതാണ് കണ്ടത്.
മോഷ്ടിച്ച നമ്പർ പ്ലേറ്റ് ഈ ബൈക്കിന് ഘടിപ്പിച്ചതായാണ് അഷ്റഫ് കരുതുന്നത്. ആലപ്പുഴ ട്രാഫിക് പൊലീസ്, തിരൂരങ്ങാടി പൊലീസ്, മോട്ടർ വാഹന വകുപ്പ് എന്നിവർക്ക് പരാതി നൽകി.
