കണ്ണൂർ: പരിയാരം മെഡിക്കൽ കോളേജ് അനധികൃത  കെട്ടിട-ഭൂമി കയ്യേറ്റം ഒഴിപ്പിക്കുക മെഡിക്കൽ കോളേജിനെ സി.പി.എം കച്ചവട സ്ഥാപനമാക്കുന്നതിനെതിരെ പ്രതിഷേധിക്കുക ചാച്ചാജി വാർഡ് കയ്യേറ്റം തടയുക, പാവപെട്ട രോഗികളുടെ ജീവൻ വെച്ച് പന്താടാതിരിക്കുക മെഡിക്കൽ കോളേജിൽ നടക്കുന്ന അഴിമതി വിജിലൻസ് അന്വേഷിക്കുക തുടങ്ങിയ ആവശ്യങ്ങൾ ഉന്നയിച്ച് ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ നാളെ രാവിലെ  10 മണിക്ക് പരിയാരം മെഡിക്കൽ കോളേജിലേക്ക്   പ്രതിഷേധ മാർച്ച്  നടത്തുമെന്ന് ഡിസിസി പ്രസിഡൻ്റ് മാർട്ടിൻ ജോർജ്ജ് അറിയിച്ചു.

പിലാത്തറ: കാറിടിച്ച് പരിക്കേറ്റ് ചികില്‍സയിലായിരുന്ന മദ്ധ്യവയസ്‌ക്കന്‍ മരിച്ചു. പയ്യന്നൂര്‍ വെള്ളൂര്‍ കാറമേലിലെ മാവില വീട്ടില്‍ എം.വി.മധുസൂദനന്‍(62) ആണ് മരിച്ചത്. കെ.എസ്.എഫ്.ഇയില്‍ നിന്ന് വിരമിച്ച സീനിയര്‍ മാനേജരാണ്. ഇന്നലെ വൈകുന്നേരം ഏഴിന് ദേശീയപാതയില്‍ പീരക്കാംതടത്തില്‍ വെച്ചായിരുന്നു അപകടം. റോഡരികിലൂടെ നടന്നുപോകുകയായിരുന്ന മധുസൂദനനെ കെ.എല്‍-60 വി-8054 മാരുതി കാര്‍ ഇടിച്ചുവീഴ്ത്തുകയായിരുന്നു. കണ്ണൂര്‍ ശ്രീചന്ദ് ഹോസ്പിറ്റലില്‍ ചികില്‍സയിലിരിക്കെ ഇന്ന് ഉച്ചയോടെയാണ് മരിച്ചത്. ഭാര്യ: കെ.കെ.സുപ്രിയ. മക്കള്‍ വിശാഖ് (മര്‍ച്ചന്റ് നേവി), വിഘ്‌നേഷ്(കാനഡ), ഐശ്വര്യ (യു.കെ). മരുമകള്‍: മേഘ്‌ന (തളിപ്പറമ്പ്). സംസ്‌ക്കാരം ഇന്ന് വൈകുന്നേരം നടക്കും.

 കണ്ണൂർ: മുണ്ടയാട് എളയാവൂർ പഞ്ചായത്ത് ഓഫീസിന് സമീപം ബൈക്കിൽ ബസിടിച്ച് പരിക്കേറ്റ് ചികിത്സയിലായിരുന്ന വിദ്യാർത്ഥി മരണപ്പെട്ടു. തലശ്ശേരി ബ്രണ്ണൻ കോളേജ് വിദ്യാർത്ഥി ഇടുക്കി ഉടുമ്പൻചോലയിലെ ശങ്കർ മനോജ്(19) ആണ് കണ്ണൂരിലെ സ്വകാര്യ ആശുപത്രിയിൽ ചികിത്സയിലിരിക്കേ ഇന്ന് കാലത്ത് മരണപ്പെട്ടത്.

കണ്ണൂരിൽ നിന്ന് ഇരിട്ടിയിലേക്ക് പോവുകയായിരുന്ന നിവേദ്യം ബസാണ് എതിരെ വന്ന ബൈക്കിൽ ഇടിച്ചത്. മുണ്ടയാട് സ്പോർട്സ് ഹോസ്റ്റലിൽ ഫെൻസിംഗ് പരീശിലനം നടത്തിവരികയായിരുന്നു. ബ്രണ്ണൻ കോളേജ് വിദ്യാർത്ഥി ഒന്നാം വർഷ ബിരുദ വിദ്യാർത്ഥിയാണ്. കൂടെയുണ്ടായിരുന്ന എസ് എൻ കോളേജ് വിദ്യാർത്ഥി പാലക്കാട്ടെ മനീഷിനും അപകടത്തിൽ പരിക്കേറ്റിരുന്നു. മനീഷ് എകെജി ആശുപത്രിയിൽ ചികിത്സയിലാണ്.