എറണാകുളം: സംസ്ഥാനത്ത് ഷവർമ അടക്കമുള്ള സാധനങ്ങൾ തയ്യാറാക്കിയതിന്റെ സമയവും തീയതിയും കൃത്യമായി പാക്കറ്റുകളിൽ രേഖപ്പെടുത്തണമെന്ന നിർദേശം കർശമായി നടപ്പാക്കാൻ ഉത്തരവിട്ട് ഹൈക്കോടതി. കാസർ​ഗോഡ് പ്ലസ് വൺ വിദ്യാർഥിനി മരിച്ച സംഭവത്തെ തുടർന്ന് മാതാവ് നൽകിയ ഹർജി തീർപ്പാക്കികൊണ്ടാണ് ജസ്റ്റിസ് ദേവൻ രാമചന്ദ്രൻ മുൻ ഉത്തരവിലെ നിർദേശം കർശനമായി നടപ്പിലാക്കണമെന്ന് അറിയിച്ചത്.മകളുടെ മരണത്തിന് കാരണം ബന്ധപ്പെട്ടവർ കൃത്യമായുള്ള പരിശോധന നടത്തി ഭക്ഷണ സാധനങ്ങളുടെ ​ഗുണനിലവാരം ഉറപ്പാക്കാത്തതുകൊണ്ടാണെന്ന് ചൂണ്ടികാട്ടി മാതാവ് ഹൈക്കോടതിയിൽ ഹർജി നൽകിയിരുന്നു. ഈ ഒരു ആവശ്യം ഉന്നയിച്ച് ഹർജി നൽകിയത് കണക്കിലെടുത്ത് കോടി ചെലവിന് വേണ്ടി 25,000 രൂപ ഹർജികാരിക്കായി നൽകണമെന്നും ഉത്തരവിൽ പറയുന്നുണ്ട്.കേസ് പരിഗണിക്കുന്ന കാസർകോട് അഡീഷണൽ സെഷൻസ് കോടതി ഹർജിക്കാരിക്ക് നഷ്ടപരിഹാരം നൽകുന്നതിനായി രണ്ടു മാസത്തിനകം കേസ് പരി​ഗണിക്കണമെന്നും കോടതി നിർദേശിച്ചു. 2022ല്‍ കാസര്‍ഗോഡ് 16 വയസുകാരി ഷവര്‍മ്മ കഴിച്ച് മരിച്ച കേസിലാണ് ഹൈക്കോടതി നടപടി.

പാലക്കാട്: അടുപ്പും തീയുമൊന്നും വേണ്ടാ. വെള്ളത്തില്‍ അരിയിട്ടുവെച്ചാല്‍, അരമണിക്കൂര്‍കൊണ്ട് നല്ല തുമ്പപ്പൂനിറമുള്ള ചോറ് തയ്യാര്‍. വെള്ളം തിളപ്പിക്കാതെതന്നെ ചോറുണ്ടാക്കാനാകുന്ന ‘മാജിക്കല്‍ റൈസ്’ എന്ന് വിളിപ്പേരുള്ള അഗോനിബോറ നെല്ല്, പാലക്കാട്ടും വിളഞ്ഞു. രാജ്യത്തിന്റെ വിവിധ ഭാഗങ്ങളിലുള്ള 37-ഓളം നെല്ലിനങ്ങള്‍ വിളയിച്ചെടുത്തിട്ടുള്ള എലപ്പുള്ളി പട്ടത്തലച്ചിയിലെ അത്താച്ചി ഫാമിലാണ്, അഗോനിബോറയും കതിരിട്ടത്. പടിഞ്ഞാറന്‍ അസമിലെ നെല്ലിനമാണിത്. തണുത്ത വെള്ളത്തില്‍ അരിയിട്ട് അടച്ചുവെച്ചാല്‍ 30-45 മിനിറ്റുകൊണ്ട് ചോറാകും. ചൂടുവെള്ളത്തിലാണെങ്കില്‍ 15 മിനിറ്റു മതി. പാലക്കാട്ടെ കാലാവസ്ഥ നെല്ലിന്റെ വളര്‍ച്ചയ്ക്ക് പ്രശ്‌നമായില്ലെന്ന് അത്താച്ചി ഗ്രൂപ്പിന്റെ ചെയര്‍മാന്‍ രാജു സുബ്രഹ്‌മണ്യന്‍, വൈസ് ചെയര്‍പേഴ്‌സണ്‍ ദീപ സുബ്രഹ്‌മണ്യന്‍, എം.ഡി. വിശ്വനാഥന്‍ എന്നിവര്‍ പറഞ്ഞു.

ജൂണില്‍ തുടങ്ങിയ കൃഷിയുടെ വിളവെടുപ്പ് കഴിഞ്ഞദിവസം പൂര്‍ത്തിയായി. അസമില്‍നിന്ന് വിത്ത് എത്തിച്ച് 12 സെന്റിലാണ് കൃഷിയിറക്കിയത്. ജൈവകൃഷിയാണ് നടത്തിയത്. വിത്ത് മുളപ്പിച്ച്, 20 ദിവസങ്ങള്‍ക്കുശേഷമാണ് നട്ടത്. നടുന്നതിനു മുന്‍പ്, ഉഴുത മണ്ണില്‍ പഞ്ചഗവ്യം പ്രയോഗിച്ചു. ചെറിയരീതിയില്‍ കീടശല്യമുണ്ടായെങ്കിലും വേപ്പെണ്ണയടക്കമുള്ള ജൈവകീടനാശിനികൊണ്ട് പ്രതിരോധിച്ചു. വെള്ളം കാര്യമായി വേണ്ടിവന്നില്ല. മൂന്നടിവരെ ഉയരത്തില്‍ നെല്‍ച്ചെടി വളരും. 100-110 ദിവസംകൊണ്ട് കതിരിട്ടു. 145 ദിവസമാണ് അഗോനിബോറ വിത്തിന്റെ മൂപ്പ്. 12 സെന്റില്‍നിന്ന് 170 കിലോ നെല്ല് കിട്ടി. 50-60 ഡിഗ്രി ചൂടില്‍ രണ്ടുതവണയായി വേവിച്ചെടുത്താണ് വിപണിയില്‍ നല്‍കുന്നത്. പൊന്നിയരിക്ക് സമാനമായ നീളവും മട്ടയരിക്ക് സമാനമായ വലുപ്പവുമുണ്ട് അരിക്ക്.പ്രകൃതിദുരന്ത സാഹചര്യങ്ങളിലും മറ്റും പാചകം ചെയ്യാതെതന്നെ എളുപ്പത്തില്‍ ആളുകള്‍ക്ക് ഉപയോഗിക്കാന്‍ കഴിയുന്ന അരിയാണിത്. പരീക്ഷണം വിജയിച്ചതിനാല്‍ അടുത്ത സീസണില്‍ കൂടുതല്‍ സ്ഥലത്ത് കൃഷിയിറക്കി അരി വിപണിയിലെത്തിക്കാനാണ് തീരുമാനം.

റൈസ് മ്യൂസിയത്തില്‍ 37 ഇനങ്ങള്‍

മണിപ്പൂരിലുള്ള ബ്ലാക്ക് റൈസ് (കറുത്ത അരി) മുതല്‍ ഗുജറാത്തിലുള്ള കാലാബേട്ടിവരെ 37-ഓളം നെല്ലിനങ്ങള്‍ അത്താച്ചി ഫാമില്‍ വിളഞ്ഞിട്ടുണ്ട്. ഇവയെല്ലാം റൈസ് മ്യൂസിയം എന്ന പേരില്‍ സൂക്ഷിച്ചിട്ടുമുണ്ട്.കറുപ്പ് കൗനി (തമിഴ്‌നാട്), ജോഹ (അസം), ജാസ്മിന്‍ റൈസ് (തായ്ലാന്‍ഡ്), തൂയമല്ലി, ജീരകശംഭ (തമിഴ്‌നാട്), രാംലി (പഞ്ചാബ്) തുടങ്ങിയവ അവയില്‍ ചിലതാണ്. തവളക്കണ്ണന്‍, ഞവര, രക്തശാലി തുടങ്ങി കേരളത്തിലെ പരമ്പരാഗത നെല്ലിനങ്ങളും ഇവിടെ വിളയിച്ചെടുത്തിട്ടുണ്ട്.

പനമരം: കുടുംബശ്രീ പ്രവര്‍ത്തകര്‍ക്ക് പനമരം ഗ്രാമപ്പഞ്ചായത്ത് നല്‍കിയ ‘കോഴിയും കൂടും’ പദ്ധതിയുടെ മറവില്‍ വായ്പാത്തട്ടിപ്പ്. പദ്ധതിയില്‍ അംഗമായ വീട്ടമ്മയ്ക്ക് ജപ്തി നോട്ടീസ് ലഭിച്ചു. കൂളിവയല്‍ ‘അനഘ’ കുടുബശ്രീയംഗം തേമാംകുഴി ത്രേസ്യ വര്‍ക്കിക്കാണ് കനറാ ബാങ്കിന്റെ പനമരം ശാഖയില്‍നിന്ന് ജപ്തി നോട്ടീസ് വന്നത്.27,559 രൂപ കുടിശ്ശിക ഉണ്ടെന്നും നോട്ടീസ് ലഭിച്ച് 10 ദിവസത്തിനകം തിരിച്ചടച്ചില്ലെങ്കില്‍ ജപ്തിനടപടിയുമായി മുന്നോട്ടുപോവുമെന്നാണ് ത്രേസ്യക്ക് ലഭിച്ച നോട്ടീസില്‍ പറയുന്നത്. ബാങ്കില്‍നിന്ന് യാതൊരുവായ്പയും എടുക്കാത്ത ത്രേസ്യക്ക് ജപ്തിനോട്ടീസ് എത്തിയതോടെ പദ്ധതിയിലെ ഗുണഭോക്താക്കളായ കുടുംബശ്രീ പ്രവര്‍ത്തകര്‍ ആശങ്കയിലായിരിക്കുകയാണ്.

പദ്ധതിയില്‍ അംഗമായവര്‍ക്ക് മുന്‍പ് ബാങ്കില്‍നിന്ന് വായ്പയുടെ പലിശയടയ്ക്കാന്‍ കടലാസെത്തിയിരുന്നു. ഇതോടെ 50-ഓളം വീട്ടമ്മമാര്‍ രണ്ടുതവണ പനമരം പഞ്ചായത്ത് ഓഫീസ് ഉപരോധിച്ചിരുന്നു. കഴിഞ്ഞ ഭരണസമിതിയുടെ കാലത്ത് വിതരണംചെയ്ത ‘കോഴിയും കൂടും’ പദ്ധതിയുടെ മറവില്‍ രേഖകള്‍ കൈക്കലാക്കി കുടുംബശ്രീ പ്രവര്‍ത്തകരുടെ പേരില്‍ 35,000 രൂപ വായ്പയെടുത്ത് കബളിപ്പിച്ചെന്നാരോപിച്ചാണ് വീട്ടമ്മമാര്‍ അന്ന് പനമരം പഞ്ചായത്ത് ഓഫീസില്‍ സമരവുമായെത്തിയത്. പദ്ധതിയില്‍ അംഗമായവരുടെ പേരില്‍ അനധികൃതമായി വിവിധ ബാങ്കുകളില്‍ നിന്നായി വായ്പയെടുത്തെന്നാണ് ആരോപണം. വായ്പ തിരിച്ചടയ്ക്കാന്‍ ബാങ്കില്‍നിന്നും അറിയിപ്പ് ലഭിച്ചപ്പോഴാണ് ഇവര്‍ ഈ വിവരം അറിയുന്നത്.

പദ്ധതി കഴിഞ്ഞഭരണസമിതിയുടേത്

2018 ഒക്ടോബറിലാണ് പനമരം ഗ്രാമപ്പഞ്ചായത്തിന്റെ നേതൃത്വത്തില്‍ കുടുംബശ്രീ വനിതകള്‍ക്കായി ‘കോഴിയും കൂടും’ പദ്ധതി നടപ്പിലാക്കിയത്. തൊഴിലുറപ്പ് പദ്ധതിയില്‍ ഉള്‍പ്പെടുത്തി കോഴിക്കൂടും, കോഴികളും, തീറ്റയും, മരുന്നും നല്‍കുന്നതായിരുന്നു പദ്ധതി. ഇതിനായി പനമരം പഞ്ചായത്ത് വനിതകളില്‍നിന്ന് അപേക്ഷയും ക്ഷണിച്ചു. ഉപഭേക്തൃ വിഹിതമായി ഓരോ ഗുണഭോക്താവില്‍നിന്നും 4,000 രൂപയും വാങ്ങിയിരുന്നു. തുടര്‍ന്ന് കോഴിക്കൂടും കോഴികളും വിതരണം ചെയ്തു.

പദ്ധതി നടത്തിപ്പിനായി പനമരം കേന്ദ്രീകരിച്ച് പ്രവര്‍ത്തിക്കുന്ന സഹകരണസംഘമായ ഹോപ്‌കോയെയാണ് പഞ്ചായത്ത് ചുമതലപ്പെടുത്തിയിരുന്നത്. മാസങ്ങള്‍ക്കുള്ളില്‍ ഹോപ്കോയിലെ ജീവനക്കാരന്‍ വനിതകളുടെ വീട്ടിലെത്തി പലതവണ ഫോട്ടോയെടുത്തുപോയി. തുടര്‍ന്ന് ആധാര്‍ കാര്‍ഡ്, വരുമാന സര്‍ട്ടിഫിക്കറ്റ്, ബാങ്ക് പാസ്ബുക്ക് തുടങ്ങിയ രേഖകളുമായി ബാങ്കിലേക്ക് പോവാന്‍ നിര്‍ദേശിച്ചു. വനിതകളില്‍നിന്ന് ബാങ്ക് അധികൃതര്‍ പലതരം പേപ്പറുകളില്‍ ഒപ്പിട്ടും വാങ്ങിയിരുന്നു. ഇതെല്ലാം എന്തിനാണെന്ന് ചോദിച്ചപ്പോള്‍ ‘കോഴിയും കൂടും’ തന്നതിനാണെന്നാണ് വീട്ടമ്മമാര്‍ക്ക് ലഭിച്ച മറുപടി.