ഇന്ത്യയുടെയും സിംഗപൂരിന്റെയും തത്സമയ ഡിജിറ്റല്‍ പേയ്‌മെന്റ് സംവിധാനങ്ങള്‍ ബന്ധിപ്പിച്ചു
ഇന്ത്യയുടെയും സിംഗപൂരിന്റെയും തത്സമയ ഡിജിറ്റല്‍ പേയ്‌മെന്റ് സംവിധാനങ്ങള്‍ ബന്ധിപ്പിച്ചു.ഇന്ത്യയുടെ യുപിഐയും സിംഗപ്പൂരിന്റെ പേ നൗവും തമ്മിലുള്ള സംയോജനമാണ് നടപ്പാക്കിയത്. പ്രധാനമന്ത്രി നരേന്ദ്ര മോദിയും സിംഗപ്പൂര്‍ പ്രധാനമന്ത്രി ലീ സിയാന്‍ ലൂംഗും ഓണ്‍ലൈന്‍ വഴി പങ്കെടുത്ത ചടങ്ങിലാണ് പദ്ധതി ഉദ്ഘാടനം ചെയ്തത്.
ആര്‍ബിഐ ഗവര്‍ണര്‍ ശക്തി കാന്ത് ദാസ്, സിംഗപ്പൂര്‍ മോണിറ്ററി അതോറിറ്റി മാനേജിങ് ഡയറക്ടര്‍ രവി മേനോന്‍ എന്നിവര്‍ ചേര്‍ന്നാണ് പദ്ധതി ഉദ്ഘാടനം ചെയ്തത്. ഇന്ത്യ സിംഗപ്പൂര്‍ ബന്ധത്തിന്റെ പുതിയ നാഴികകല്ലാണ് പദ്ധതി എന്നും, വ്യക്തികള്‍ തമ്മില്‍ പണമിടപാട് നടത്താന്‍ ഇന്ത്യയില്‍ സൗകര്യം ആരംഭിക്കുന്ന ആദ്യ രാജ്യമാണ് സിംഗപ്പൂര്‍ എന്നും പ്രധാന മന്ത്രി നരേന്ദ്ര മോദി പറഞ്ഞു.
പുതിയ പദ്ധതി യാഥാര്‍ത്ഥ്യമായതോടെ ഇന്ത്യ-സിംഗപ്പൂര്‍ രാജ്യങ്ങളിലുള്ളവര്‍ക്ക് കുറഞ്ഞ നിരക്കില്‍ എളുപ്പത്തില്‍ പണമിടപാട് നടത്താന്‍ സാധിക്കും.
