കുട്ടികൾക്കിടയിൽ തക്കാളിപ്പനി വ്യാപകം; പടർത്തുന്നത് കോക്‌സാകി വൈറസുകൾ

എന്ററോ വൈറസ് വിഭാഗത്തിൽ വരുന്നതാണ് കോക്‌സാകി. ഇതിന്റെ എ-6, എ-16 വകഭേദങ്ങളാണ് സംസ്ഥാനത്ത് പടരുന്നതെന്ന് ഇൻസ്റ്റിറ്റ്യൂട്ട് ഡയറക്ടർ ഡോ. ഇ. ശ്രീകുമാർ പറഞ്ഞു. കൊല്ലം, തിരുവനന്തപുരം ജില്ലകളിൽനിന്നുള്ള സാംപിളുകളുടെ ജനിതകശ്രേണീകരണമാണ് ഇൻസ്റ്റിറ്റ്യൂട്ടിൽ നടത്തിയത്. മിക്ക ജില്ലകളിലും, കുട്ടികളിലും അപൂർവമായി മുതിർന്നവരിലും തക്കാളിപ്പനി റിപ്പോർട്ടുചെയ്യുന്നുണ്ട്. താരതമ്യേന ഗുരുതരമല്ലാത്ത രോഗമാണ് തക്കാളിപ്പനി.

ലക്ഷണങ്ങൾ

• ചെറിയ പനി
• വായ്ക്കകത്ത് നാവിലും കവിളിനകത്തും മോണയിലും കുമിളകൾ
• തൊണ്ടവേദനയും ഭക്ഷണമിറക്കാൻ പ്രയാസവും.
• കൈയിലും കാലിലും പൃഷ്ഠഭാഗത്തും ചുവന്ന തടിപ്പും കുമിളകളും
• നിറംമങ്ങിയ പാടായി തുടങ്ങി ചിക്കൻപോക്സ് പോലെ കുമിളകളുണ്ടാകും. ഒരാഴ്ചയ്ക്കകം ഈ കുമിളകൾ കരിഞ്ഞുണങ്ങിത്തുടങ്ങും.

പടരുന്നത്

രോഗിയുമായുള്ള സമ്പർക്കത്തിലൂടെയും മൂക്കിലെയും തൊണ്ടയിലെയും സ്രവങ്ങൾ വഴിയുമാണ് പ്രധാനമായും വൈറസ് പകരുന്നത്. അതിവേഗം പകരുന്ന അസുഖമാണിത്. അപൂർവമായി ശ്വാസകോശത്തിൽ നീർക്കെട്ട് പോലുള്ള മാരക സങ്കീർണതകളിലേക്ക് നീങ്ങാം.