രാജ്യത്ത് ഒമിക്രോണിന്റെ പുതിയ വകഭേദം; കണ്ടെത്തിയത് ബി.എ 2.75
ന്യൂഡല്ഹി: രാജ്യത്ത് കോവിഡ് ഒമിക്രോണിന്റെ പുതിയ വകഭേദം കണ്ടെത്തിയെന്ന് ലോകാരോഗ്യ സംഘടന. ബി.എ 2.75 വകഭേദമാണ് കണ്ടെത്തിയത്.
കഴിഞ്ഞ രണ്ടാഴ്ചയായി ആഗോള തലത്തില് കോവിഡ് കേസുകള് റിപ്പോര്ട്ട് ചെയ്യുന്നത് 30 ശതമാനത്തിലേറെ വര്ധിച്ചിട്ടുണ്ടെന്ന് ലോകാരോഗ്യ സംഘടനാ ഡയറക്ടര് ജനറല് ട്രെഡോസ് ആദാനോം ഗെബ്രിയേസസ് പറഞ്ഞു. യൂറോപ്പിലും അമേരിക്കയിലും ബി.എ ഫോര്, ബി.എ ഫൈവ് വകഭേദമാണ് പടരുന്നത്. ഇന്ത്യയില് ബി.എ 2.75 വകഭേദമാണ് പടരുന്നതെന്നും ഡബ്ലു.എച്ച്.ഒ ഡയറക്ടര് പറഞ്ഞു.
ബി.എ 2.75 വകഭേദം ആദ്യം ഇന്ത്യയില് കണ്ടെത്തിയതിന് പുറമെ മറ്റ് പത്ത് രാജ്യങ്ങളില് കൂടി കണ്ടെത്തിയിട്ടുണ്ടെന്ന് ഡബ്ലു.എച്ച്.ഒ-യുടെ മുതിര്ന്ന ശാസ്ത്രജ്ഞ ഡോ.സൗമ്യ സ്വാമിനാഥന് ചൂണ്ടിക്കാട്ടി.
ഇതിനെ കുറിച്ച് പഠിക്കാന് വളരെ കുറച്ച സ്വീകന്സുകള് മാത്രമേ ലഭ്യമായിട്ടുള്ളൂ. മനുഷ്യനില് എന്ത് മാറ്റമാണ് ഇതുണ്ടാക്കുകയെന്നത് നിരീക്ഷിക്കേണ്ടതുണ്ട്. ഇത് പ്രതിരോധ മരുന്നുകളാല് തടയാവുന്നതാണോ കൂടുതല് ഗുരുതര സ്വഭാവമുള്ളതാണോയെന്ന കാര്യം വ്യക്തമായിട്ടില്ലെന്നും ഡോ.സൗമ്യ പറഞ്ഞു.
ഡബ്ലു.എച്ച്.ഒ വിദഗ്ദ്ധര് പുതിയ വകഭേദത്തെ നിരീക്ഷിച്ച് കൊണ്ടിരിക്കുകയാണ്. ആഗോള തലത്തില് നിന്ന് തന്നെ വിവരങ്ങള് ശേഖരിച്ച് കാര്യങ്ങള് പരിശോധിക്കുമെന്നും അവര് അറിയിച്ചു.
