കണ്ണൂർ : മികച്ച ഉൽപാദന ശേഷിയുള്ളതും വൈവിധ്യവുമുള്ള നാടൻ പ്ലാവുകളുടെ വ്യാപനത്തിന് ഹരിത കേരളം മിഷൻ. തേനൂറും ചക്കക്കാലം തിരിച്ചുപിടിക്കുകയാണ്‌ ലക്ഷ്യം. കണ്ണൂർ കൃഷിവിജ്ഞാന കേന്ദ്രത്തി(കെവികെ)ന്റെ സഹകരണത്തോടെയാണ്‌ പദ്ധതി. നന്നായി ചക്ക പിടിക്കുന്ന നാടൻ പ്ലാവുകൾ കണ്ടെത്തി അവയുടെ പുതിയ തൈകൾ ഉൽപാദിപ്പിച്ച് നാട്ടിലാകെ നാട്ടുപിടിപ്പിക്കും. പ്ലാവുകൾ പൂവിടുന്ന സമയവും കായ്ക്കുന്ന സമയവും ചക്കയുടെ രുചിയും ഉൽപാദന ശേഷിയും പഠന വിധേയമാക്കുക, സ്വദേശി പ്ലാവുകളുടെ എണ്ണം വർധിപ്പിക്കുക, ചക്കയിൽനിന്ന്‌ ലഭ്യമാകുന്ന ഉൽപന്ന വൈവിധ്യങ്ങൾ വിപണിയിൽ എത്തിക്കുക, പ്രദേശവാസികളിൽ വരുമാനം ഉണ്ടാക്കുക എന്നിവയാണ് മറ്റ്‌ ലക്ഷ്യങ്ങൾ.

ജില്ലയിലെ കാർഷിക മേഖലയിൽ പ്രവർത്തിക്കുന്ന സന്നദ്ധ സംഘടനകളെയും കർഷക സംഘടനകളെയും പദ്ധതിയിൽ സഹകരിപ്പിക്കും. എല്ലാ പഞ്ചായത്തുകളിൽനിന്നും നേരത്തെ പൂവിടുന്നതും (ഒക്ടോബർ, നവംബർ മാസങ്ങളിൽ) വ്യത്യസ്ത രുചിയുള്ളതും മഴവെള്ളം ചക്കയുടെ ഉള്ളിലേക്ക് കടക്കാത്തതും സീസൺ കഴിഞ്ഞും കായ്ക്കുന്നതുമായ നാടൻ പ്ലാവുകളുടെ വിവരങ്ങളാണ് ശേഖരിക്കുക. കെവികെയുടെ സഹായത്തോടെ ഇത്തരം പ്ലാവുകളെ നിരീക്ഷിച്ച ശേഷം ഉടമസ്ഥന്റെ പേരിൽ ജിയോ ടാഗ് ചെയ്യും. അവയുടെ തൈകൾ ഉൽപാദിപ്പിച്ച് വ്യാപകമായി നട്ടുപിടിപ്പിക്കും. അതോടൊപ്പം മികച്ച നാടൻ പ്ലാവുകൾ കണ്ടെത്തി പ്ലാവിനെയും ഉടമയെയും ആദരിക്കും. മികച്ച നാടൻ പ്ലാവുകളെ കണ്ടെത്താനും അടയാളപ്പെടുത്താനുമായി ഹരിത കർമസേന, കുടുംബശ്രീ അയൽക്കൂട്ടങ്ങൾ, വായനശാലകൾ, പ്രാദേശിക പരിസ്ഥിതി സംഘടനകൾ, ക്ലബ്ബുകൾ, കർഷക സംഘടനകൾ എന്നിവയുടെ സഹകരണം തേടും. പഞ്ചായത്തുകളിൽ പ്രവർത്തിക്കുന്ന ജൈവ വൈവിധ്യ ബോർഡിന്റെ സഹായവും ഉണ്ടാകും.