സംസ്ഥാന വിദ്യാഭ്യാസ വകുപ്പിന്റെ പുതിയ നയം;ഹിന്ദിപഠനം സ്കൂൾതലത്തിൽ ഒന്നുമുതൽ
തിരുവനന്തപുരം: ദേശീയ വിദ്യാഭ്യാസ നയം (NEP) ആസൂത്രണം ചെയ്ത ത്രിഭാഷാ പദ്ധതിയോട് സംസ്ഥാന സർക്കാർ രാഷ്ട്രീയമായി എതിർപ്പുള്ള നിലപാട് സ്വീകരിച്ചെങ്കിലും, സംസ്ഥാനത്തെ സ്‌കൂൾ വിദ്യാഭ്യാസത്തിൽ ഹിന്ദി ഭാഷയ്ക്കുള്ള പ്രാധാന്യം വർദ്ധിപ്പിച്ചു. മലയാളം മാതൃഭാഷയാകുകയും ഇംഗ്ലീഷ് രണ്ടാം ഭാഷയായി തുടരുകയും ചെയ്യുന്ന സാഹചര്യത്തിൽ, ഹിന്ദിയെ മൂന്നാമത്തെ ഭാഷയായി പരിഗണിക്കാനാണ് ശ്രമം. ഭാഷാപഠനത്തിന് പ്രാധാന്യം നൽകുന്നതിനുള്ള ശ്രമങ്ങൾക്കായി ഹിന്ദി ക്ലബുകൾ സ്കൂൾതലത്തിൽ സജീവമാക്കാനും ഹിന്ദി വായന, എഴുത്ത്, സംസാരശേഷി വർദ്ധിപ്പിക്കാനും നിർദ്ദേശം നൽകിയാണ് വിദ്യഭ്യാസ വകുപ്പ് മുന്നോട്ടുപോകുന്നത്. നിലവിൽ അഞ്ചാം ക്ലാസിൽ തുടങ്ങുന്ന ഹിന്ദി പഠനം, ഒന്നുമുതൽ തുടങ്ങുംവിധം മാറ്റാനും ആലോചനയുണ്ട്.
ഹിന്ദി ക്ലബുകൾ രൂപീകരിച്ച് വിവിധ സാംസ്‌കാരികവും ഭാഷാപരവുമായ പ്രവർത്തനങ്ങൾ സംഘടിപ്പിക്കാനാണ് വിദ്യാഭ്യാസ വകുപ്പ് സ്‌കൂളുകൾക്ക് നിർദേശം നൽകിയിരിക്കുന്നത്. കുട്ടികൾക്ക് ഹിന്ദി ഭാഷയിൽ പ്രാവീണ്യം ഉണ്ടാകാനുള്ള അന്തരീക്ഷം ഒരുക്കുന്നതിനായി, വായനാപ്രവർത്തനങ്ങൾ, ഹിന്ദിയിൽ ഭാഷാ മത്സരങ്ങൾ, കഥാപരായണങ്ങൾ തുടങ്ങിയവ ആസൂത്രണം ചെയ്യാൻ ഉദ്ദേശിക്കുന്നു. ഹിന്ദി അധ്യാപകരുടെ നേതൃത്വത്തിൽ ഈ പ്രവർത്തനങ്ങൾ യഥാർത്ഥ അർത്ഥത്തിൽ ഫലപ്രദമാകുന്ന തരത്തിൽ നടപ്പാക്കണമെന്നാണു സർക്കാർ ആവശ്യപ്പെടുന്നത്. വിദ്യാർത്ഥികൾക്ക് ഭാഷയുടെ സൗന്ദര്യവും പ്രായോഗികവും അടിയുറച്ചറിയാൻ ഈ പദ്ധതി സഹായകമാകും എന്നാണ് പ്രതീക്ഷ.
സർക്കാരിന്റെ നിലപാട് ഹിന്ദിപഠനത്തിനെതിരെ അല്ലെങ്കിൽ ഭാഷാപഠനത്തിനെതിരെ എന്നതല്ലെന്ന് വിദ്യാഭ്യാസ വകുപ്പ് വ്യക്തമാക്കിയിട്ടുണ്ട്. മറിച്ച്, ഹിന്ദിയെ ഒറ്റദേശീയഭാഷയായി നടപ്പാക്കാൻ ശ്രമിക്കുന്ന സമീപനങ്ങളെയാണ് എതിർക്കുന്നതെന്ന് അധികൃതർ വ്യക്തമാക്കുന്നു. അതേസമയം, കുട്ടികളുടെ ഭാഷാപരമായ കഴിവുകൾ വികസിപ്പിക്കുന്നതിനായി, ഭാഷാപഠനം ഒരു ഹ്രസ്വദൂരമല്ലാതെ ദീർഘകാല വിദ്യാഭ്യാസം എന്ന നിലയിൽ പരിഗണിക്കണമെന്ന് സർക്കാർ പറയുന്നു. ഭാഷ പഠനം വേണമെങ്കിൽ കുട്ടികളുടെ താൽപര്യങ്ങൾ, പ്രാദേശികത, ശാസ്ത്രീയത എന്നിവ അടിസ്ഥാനമാക്കിയാണ് അത് നടപ്പാക്കേണ്ടത് എന്നതാണ് സംസ്ഥാനത്തെ വിദ്യാഭ്യാസ മേഖലയുടെ പ്രധാന ആശയം.
