മാവേലി, മലബാര്‍ എക്സ്പ്രസ് ട്രെയിനുകളില്‍ അധിക കോച്ചുകള്‍
തിരുവനന്തപുരം: വേനല്‍ അവധി പ്രമാണിച്ച്‌ യാത്രക്കാരുടെ തിരക്ക് നിയന്ത്രിക്കുന്നതിനായി ദക്ഷിണ റെയില്‍വേ പാലക്കാട് ഡിവിഷൻ ചില ട്രെയിനുകളില്‍ അധിക കോച്ചുകള്‍ അനുവദിച്ചു. തിരുവനന്തപുരം സെൻട്രല്‍-മംഗളൂരു സെൻട്രല്‍ മാവേലി എക്സ്പ്രസില്‍ (ട്രെയിൻ നമ്ബർ 16604) ഈമാസം 25ന് ഒരു സ്ലീപ്പർ കോച്ച്‌ കൂടി ലഭിക്കുമെന്ന് റെയില്‍വേ പത്രക്കുറിപ്പില്‍ അറിയിച്ചു. വ്യാഴാഴ്ച മംഗളൂരു സെൻട്രല്‍ സ്റ്റേഷനില്‍നിന്ന് പുറപ്പെടുന്ന മംഗളൂരു സെൻട്രല്‍ മാവേലി എക്സ്പ്രസില്‍ (ട്രെയിൻ നമ്പർ 16603) ഒരു സ്ലീപ്പർ കോച്ച്‌ കൂടി ലഭിക്കും. തിരുവനന്തപുരം സെൻട്രല്‍-മംഗളൂരു സെൻട്രല്‍ മലബാർ എക്സ്പ്രസില്‍ (ട്രെയിൻ നമ്പർ 16629) 24, 25 തീയതികളില്‍ ഒരു സ്ലീപ്പർ കോച്ച്‌ അധികമായുണ്ടാകും.മംഗളൂരു സെൻട്രല്‍-തിരുവനന്തപുരം സെൻട്രല്‍ മലബാർ എക്സ്പ്രസില്‍ (ട്രെയിൻ നമ്പർ16630) വ്യാഴാഴ്ച ഒരു അധിക സ്ലീപ്പർ കോച്ച്‌ നല്‍കും. തിരുവനന്തപുരം സെൻട്രലില്‍നിന്ന് പുറപ്പെടുന്ന തിരുവനന്തപുരം സെൻട്രല്‍-മധുര ജങ്ഷൻ അമൃത എക്സ്പ്രസില്‍ (ട്രെയിൻ നമ്പർ 16343) വ്യാഴാഴ്ച ഒരു സ്ലീപ്പർ കോച്ച്‌ കൂടി ലഭിക്കും. മധുര ജങ്ഷനില്‍ നിന്ന് പുറപ്പെടുന്ന മധുര ജങ്ഷൻ-തിരുവനന്തപുരം സെൻട്രല്‍ അമൃത എക്സ്പ്രസില്‍ (ട്രെയിൻ നമ്പർ 16344) 24, 25 തീയതികളില്‍ ഒരു സ്ലീപ്പർ കോച്ച്‌ കൂടി ലഭ്യമാക്കുമെന്ന് റെയില്‍വേ അറിയിച്ചു.
