കണ്ണൂർ: ജ്വല്ലറിയിൽ നിന്ന് സ്വർണവള മോഷ്ടിച്ച പ്രതി അറസ്റ്റിൽ. എളയാവൂർ സ്വദേശിനിയായ റഷീദയെയാണ് (50) കണ്ണൂർ ടൗൺ പോലീസ്സ് അറസ്റ്റ്‌ചെയ്തത്. ഡിസംബർ 31ന് ഉച്ചയ്ക്ക് 1.30നായിരുന്നു കേസിനാസ്പദ സംഭവം.താവക്കരയിലെ മലബാർ ഗോൾഡ് ആൻഡ് ഡയമണ്ട് ജ്വല്ലറിയിൽ നിന്നാണ് ഒന്നരപവന്റെ സ്വർണവള കവർന്നത്. ജ്വല്ലറി ജീവനക്കാരൻ കെ.സജേഷിന്റെ പരാതിയിലാണ് പൊലിസ് കേസെടുത്തത്.

പർദ്ദ ധരിച്ച് സ്വർണം വാങ്ങാനെന്ന വ്യാജേനയെത്തി ജീവനക്കാരുടെ കണ്ണുവെട്ടിച്ച് സ്വർണവള കവർന്ന് പ്രതി രക്ഷപ്പെടുകയായിരുന്നു. സ്വർണത്തിൽ കുറവുവന്നതോടെ ജീവനക്കാർ സി.സി.ടി.വി പരിശോധിച്ചപ്പോഴാണ് റഷീദ, വള ആരും കാണാതെ ബാഗിൽ ഇട്ട് പുറത്തേക്ക് പോകുന്നത് കണ്ടത്.കഴിഞ്ഞ ദിവസം വീണ്ടും ജ്വല്ലറിയിൽ സ്വർണം വാങ്ങാനെന്ന് പറഞ്ഞ് എത്തിയ പ്രതിയെ ജീവനക്കാർ തിരിച്ചറിഞ്ഞതോടെ പൊലിസിൽ അറിയിക്കുകയായിരുന്നു. തുടർന്ന്  പോലീസെത്തി കസ്റ്റഡിയിൽ എടുക്കുകയായിരുന്നു.

കണ്ണൂർ: ജില്ലയിലെ റേഷൻ കടകൾ കാലി. ഉപഭോക്താക്കൾ അരി ലഭിക്കാതെ മടങ്ങുന്നു. പൊതുവിപണിയിൽ നിന്ന് വലിയ വില കൊടുത്ത് അരി വാങ്ങേണ്ട അവസ്ഥയിൽ സാധാരണക്കാർ വലയുന്നു. സബ്സിഡിയിനത്തിൽ നൽകാനുള്ള കുറച്ച് അരിയു‌ടെ സ്റ്റോക്ക് മാത്രമാണ് ജില്ലയിലെ റേഷൻ കടകളിൽ മിക്കതിലും ഉള്ളത്. വെള്ള കാർഡ് അടക്കമുള്ള സബ്സിഡി ഇതര കാർഡുടമകൾ അരി ലഭിക്കാതെയാണ് റേഷൻ കടകളിൽ നിന്ന് മടങ്ങുന്നത്. മുൻഗണനാ കാർഡിനുള്ള അരിയും രണ്ട് ദിവസത്തിനുള്ളിൽ തീരുമെന്ന് റേഷൻ വ്യാപാരികൾ പറയുന്നു. ഇതോട‌െ ജില്ലയിലെ റേഷൻ കടകൾ അടച്ചിടേണ്ട അവസ്ഥയിലാണ്.

എഫ്സിഐ ഗോഡൗണുകളിൽ നിന്ന് സപ്ലൈകോയുടെ എൻഎഫ്എസ്എ ഗോഡൗണുകളിലേക്കും അവിടെ നിന്ന് റേഷൻ കടകളിലേക്കും അരി ലോറികളിൽ എത്തിക്കുന്ന വിതരണ കരാറുകാരുടെ പണിമുടക്കാണ് കാരണം. ഗോഡൗണുകളിലേക്കും റേഷൻ കടകളിലേക്കും അരി എത്തിച്ച വകയിൽ ഭീമമായ കുടിശിക ബാക്കിയുള്ള അവസ്ഥയിലാണ് കരാറുകാർ ഈ മാസം ഒന്നിന് ശേഷം സമരം പ്രഖ്യാപിച്ചത്. അതുകൊണ്ട് തന്നെ ജനുവരി മാസത്തെ റേഷൻ വിഹിതം റേഷൻ കടകളിൽ എത്തിയിരുന്നില്ല. ഡിസംബറിലെ വിഹിതത്തിൽ ബാക്കിയുള്ള ധാന്യങ്ങളാണ് പുതു വർഷത്തിന്റെ തുടക്കത്തിൽ റേഷൻ കടകളിലൂ‌ടെ വിതരണം ചെയ്തത്.

കൊടുക്കാനുള്ളത് വൻതുക

ബിൽ കുടിശിക ഉണ്ടായിരുന്നതിനാൽ ഇതിനു മുൻപും കരാറുകാർ സമരം നടത്തിയിരുന്നു. രണ്ടു വർഷത്തിനിടയിൽ 4 പ്രാവശ്യം ഇത്തരത്തിൽ സമരം നടന്നിരുന്നു. നാലാമത്തെ തവണ റേഷൻ കടകളിൽ അരി ഇല്ലാത്ത സാഹചര്യം വന്നപ്പോൾ പൊതു വിതരണ വകുപ്പ് മന്ത്രി ഇടപെട്ട് പകുതി കുടിശിക തീർപ്പാക്കുകയും ബാക്കിയുള്ള കുടിശിക എത്രയും പെട്ടെന്ന് തീർക്കാമെന്ന വ്യവസ്ഥയിൽ സമരം അവസാനിപ്പിക്കുകയുമായിരുന്നു. കഴിഞ്ഞ ഒക്ടോബർ മുതൽ ഡിസംബർ വരെയുള്ള തുക പൂർണമായും സെപ്റ്റംബറിലേത് ഭാഗികമായും കൊടുത്തുതീർക്കാനുണ്ടെന്ന് കരാറുകാർ പറയുന്നു. സംസ്ഥാനത്തൊ‌ട്ടാകെ ഈ തുക നൂറു കോ‌ടിയെങ്കിലും വരുമെന്നാണ് അറിയുന്നത്.

തൊഴിലാളികളും ദുരിതത്തിൽ

മുഴപ്പിലങ്ങാട്∙ എഫ്സിഐ ഗോഡൗണുകളുമായി ബന്ധപ്പെട്ട് ചരക്ക് നീക്കം നടത്തുന്ന ലോറി മേഖലയും അരി വിതരണ കരാറുകാരുടെ സമരം കാരണം സ്തംഭനാവസ്ഥയിലാണ്. മുഴപ്പിലങ്ങാട് എഫ്സിഐ ഗോഡൗണുമായി ബന്ധപ്പെട്ട് മാത്രം 55 ലോറികൾ അരി വിതരണ മേഖലയിൽ ഉണ്ട്. ജനുവരി 1 മുതൽ ഓ‌ട്ടമില്ലാതെ നിർത്തിയിട്ടിരിക്കുകയാണ് ലോറികൾ. പയ്യന്നൂർ എഫ്സിഐ ഗോഡൗണുമായി ബന്ധപ്പെട്ട് ഓടുന്ന ലോറി മേഖലയുടെ സ്ഥിതിയും സമാനമാണ്.

എഫ്സിഐ ഗോഡൗണുകളുമായി ബന്ധപ്പെട്ട് ഓടുന്ന ലോറികളിൽ ഉടമകൾ തന്നെയാണ് ജീവനക്കാർ. സ്വയം തൊഴിൽ എന്ന രീതിയിൽ ലോറി വാങ്ങി ഓടിക്കുന്നവരാണ് ഇവരിൽ ഭൂരിഭാഗവും. ഈ വർഷം തു‌ടങ്ങിയതു തന്നെ പണിയില്ലാത്ത അവസ്ഥയിലാണെന്ന് ഇവർ പറയുന്നു. അരിനീക്കം നടക്കാത്തത് കാരണം എഫ്സിഐ ഗോഡൗൺ, എൻഎഫ്എസ്എ ഗോഡൗണുകൾ എന്നിവിടങ്ങളിൽ ധാന്യങ്ങൾ കയറ്റിറക്കൽ നടത്തുന്ന ചുമട്ടു തൊഴിലാളികൾക്കും ജോലിയില്ലാത്ത അവസ്ഥയാണ്.

കണ്ണൂർ: റെയിൽവേ സ്റ്റേഷനിൽ ഉയർന്ന ക്ലാസ് യാത്രക്കാർക്കായുള്ള വിശ്രമമുറിയിലെ ശുചിമുറി അറ്റകുറ്റപ്പണിക്കായി അടച്ചിട്ട് മാസങ്ങൾ. പുലർച്ചെയും രാവിലെയുമായി കണ്ണൂരിൽ ട്രെയിൻ ഇറങ്ങുന്ന സ്ത്രീകളും കുട്ടികളും ഉൾപ്പെടെയുള്ള ഒട്ടേറെ യാത്രക്കാരാണ് വിശ്രമമുറിയിലെത്തി ശുചിമുറി സൗകര്യമില്ലാത്തതിനാൽ നിരാശയോടെ മടങ്ങുന്നത്.അർധരാത്രിക്കു ശേഷം ചെറിയ ഇടവേളകളിൽ ഒട്ടേറെ ദീർഘദൂര ട്രെയിനുകൾ കണ്ണൂർ റെയിൽവേ സ്റ്റേഷനിൽ എത്തുന്നുണ്ട്.

ജില്ലയുടെ വിവിധ ഭാഗങ്ങളിലേക്കു പോകേണ്ട ഇവരിൽ പലർക്കും പുലരുമ്പോൾ മാത്രമേ നാടുകളിലേക്ക് ബസ് ലഭിക്കൂ. സുരക്ഷിതമായ കാത്തിരിപ്പിന് റെയിൽവേ സ്റ്റേഷനിലെ വിശ്രമമുറികളെയാണ് ഇവർ ആശ്രയിക്കുന്നത്.ദീർഘയാത്ര കഴിഞ്ഞ് എത്തിയതിനാൽ ശുചിമുറി ഉപയോഗിക്കാനുള്ള സൗകര്യംകൂടി പ്രതീക്ഷിച്ച് വിശ്രമ മുറിയിൽ എത്തുന്നവരാണ് നിരാശപ്പെടേണ്ടിവരുന്നത്. ശുചിമുറിയിലേക്കുള്ള വഴിയിൽ സിമന്റും പൈപ്പും ടൈൽസുമെല്ലാം ചാരിവച്ച നിലയിലാണ്. മൂന്നു മാസത്തോളമായിട്ടും പണി പൂർത്തിയാക്കാത്തതിൽ കടുത്ത പ്രതിഷേധമാണ് സ്ഥിരം യാത്രക്കാർ പങ്കുവയ്ക്കുന്നത്.

നശിപ്പിക്കരുത് ‌ശുചിമുറികൾ

റെയിൽവേ സ്റ്റേഷനിലെ ശുചിമുറിയിൽ സാനിറ്ററി പാഡുകളും ഡയപ്പറുകളും ഉൾപ്പെടെ ചില യാത്രക്കാർ തള്ളുന്നതാണ് ഇടയ്ക്കിടെ അറ്റകുറ്റപ്പണി നടത്തേണ്ടിവരുന്നതിന്റെ കാരണമെന്ന് റെയിൽവേ. ഇത്തരം വസ്തുക്കൾ കാരണം പൈപ്പ് അടഞ്ഞാൽ തുറക്കുക എളുപ്പമല്ല. പലപ്പോഴും ടൈൽസ് ഉൾപ്പെടെ നീക്കി പൈപ്പ് മാറ്റേണ്ടി വരാറുണ്ടെന്നും റെയിൽവേ ഉദ്യോഗസ്ഥർ ചൂണ്ടിക്കാട്ടി. ശുചിമുറികൾ നശിപ്പിക്കാതെ യാത്രക്കാർ സഹകരിക്കണമെന്നും ഇവർ ആവശ്യപ്പെട്ടു.