മിന്നി മറഞ്ഞ് ‘മല്ലു ഹിന്ദു ഓഫീസേഴ്സ്’; വാട്സാപ്പ് ഹാക്ക് ചെയ്യപ്പെട്ടതെന്ന് ഉദ്യോഗസ്ഥൻ
തിരുവനന്തപുരം: ഹിന്ദുക്കളായ ഐ.എ.എസ് ഉദ്യോഗസ്ഥരുടെ വാട്സാപ്പ് ഗ്രൂപ്പുണ്ടാക്കി ഉദ്യോഗസ്ഥൻ. മല്ലു ഹിന്ദു ഓഫീസേഴ്സ് എന്ന പേരിലാണ് കെ.ഗോപാലകൃഷ്ണൻ ഐ.എ.എസ് അഡ്മിൻ ആയി ഗ്രൂപ്പുണ്ടാക്കിയത്. സംഭവം വിവാദമായതോടെ ഗ്രൂപ്പ് അപ്രത്യക്ഷമായി.
സംസ്ഥാനത്തെ മുതിർന്ന ഐ.എ.എസ് ഉദ്യോഗസ്ഥർ മുതൽ ജൂനിയർ ഉദ്യോഗസ്ഥർവരെ അംഗങ്ങളായിരുന്ന ഗ്രൂപ്പാണ് വിവാദത്തിലായത്. ദീപാവലി ആശംസ അറിയിക്കാനാണ് ഗ്രൂപ്പുണ്ടാക്കിയതെന്നാണ് ഉദ്യോഗസ്ഥർ വിശദീകരണം നൽകിയിരിക്കുന്നത്. ഗ്രൂപ്പിലൂടെ ദീപാവലി ആശംസകൾ കൈമാറുകയും ചെയ്തിരുന്നു. ഇത്തരമൊരു ഗ്രൂപ്പുണ്ടാക്കിയതിലെ അനൗചിത്യം ഗ്രൂപ്പിലെതന്നെ ചില ഐ.എ.എസ് ഉദ്യോഗസ്ഥർ ചൂണ്ടിക്കാട്ടിയിരുന്നു.
തുടർന്ന് ഈ ഗ്രൂപ്പ് മണിക്കൂറുകൾക്കുള്ളിൽ ഡിലീറ്റ് ആക്കുകയും ചെയ്തു. വാട്സാപ്പ് ഗ്രൂപ്പ് വിവാദമായതോടെ വാട്സാപ്പ് ഹാക്ക് ചെയ്യപ്പെട്ടുവെന്ന് കാണിച്ച് കെ.ഗോപാലകൃഷ്ണന്‍ സൈബര്‍ സെല്ലിന് പരാതി നല്‍കി. ഹാക്കിങ് നടന്നുവെന്ന് കാണിച്ച് ഗ്രൂപ്പ് അംഗങ്ങൾക്ക് ഗോപാലകൃഷ്ണൻ സന്ദേശം അയച്ചിരുന്നു. ഇതൊന്നും തന്റെ അറിവോടെയല്ല നടന്നതെന്നും അദ്ദേഹം വിശദീകരിച്ചു.
