ഇരിട്ടി:മാലിന്യം കുമിഞ്ഞ പുഴയോരത്തെ കാടുകയറിയ സ്ഥലം ഇപ്പോൾ സഞ്ചാരികൾക്ക്‌ ഇഷ്ടതാവളം. ഇരിട്ടി–- പേരാവൂർ റോഡരികിൽ ജബ്ബാർക്കടവ്‌ പുഴയോരത്ത്‌ പായം പഞ്ചായത്ത്‌ ജനകീയ കൂട്ടായ്മയിൽ നിർമിച്ച സ്നേഹാരാമം പ്രാദേശിക വിനോദ സഞ്ചാരകേന്ദ്രമാണിന്ന്‌. മാലിന്യ നിർമാർജനത്തിനൊപ്പം സൗന്ദര്യവൽക്കരണ പദ്ധതി കൂടി നടപ്പാക്കിയാണ്‌ കരിയാൽ ജനകീയ കൂട്ടായ്മ ഉദ്യാനം നിർമിച്ച്‌ പരിപാലിക്കുന്നത്‌. എൻഎസ്‌എസ്‌ വളന്റിയർമാരുടെ നാട്ടിൻപുറ സൗന്ദര്യവൽക്കരണത്തിന്റെ കൂട്ടായ്മ കൂടിയുണ്ട്‌ ഈ ഉദ്യാനത്തിന്റെ പിറവിക്ക്‌ പിന്നിൽ.ജബ്ബാർക്കടവ് പാർക്ക് ഹരിത ടൂറിസം പദവി നേടുന്നതിന്‌ മുന്നോടിയായുള്ള സ്ഥാപനതല അവതരണം നടത്തി. മാലിന്യമുക്ത നവകേരളം ക്യാമ്പയിൻ ഭാഗമായാണ്‌ ജബ്ബാർക്കടവിലെ മാലിന്യ നിഷേപ കേന്ദ്രം ഉദ്യാനമാക്കി വികസിപ്പിച്ചത്‌. പഞ്ചായത്ത്‌ അവതരിപ്പിച്ച മികച്ച വിനോദ സഞ്ചാരകേന്ദ്രം എന്ന നിലയിലാണ്‌ ഹരിതകേരളം മിഷൻ പാർക്കിനെ ഹരിത പദവിയിലേക്ക്‌ ഉയർത്തുന്നത്‌.സ്ഥാപന തല അവതരണം പഞ്ചായത്ത് പ്രസിസന്റ് പി രജനി ഉദ്ഘാടനം ചെയ്തു. വൈസ് പ്രസിഡന്റ് എം വിനോദ്‌കുമാർ അധ്യക്ഷനായി. ജയപ്രകാശ് പന്തക്ക പദ്ധതി വിശദീകരിച്ചു. ഷിതു കരിയാൽ, പി. വി മനോജ് കുമാർ, കെ കെ കുഞ്ഞികൃഷ്ണൻ എന്നിവർ സംസാരിച്ചു.

ഉളിക്കൽ:നിറയെ രുചികളുമായി ഇവരൊരുക്കിയ വിഭവങ്ങൾ നാവിന്‌ പലതരം രുചി പകർന്നുനൽകിയപ്പോൾ കുട്ടികളെ ഊട്ടുന്നവരുടെ കൈപ്പുണ്യം രുചിമേളമായി. വ്യത്യസ്ത ഇനം രുചിക്കൂട്ടുകളുമായി ഇരിക്കൂർ ഉപജില്ലാ പരിധിയിലെ സ്കൂൾ ഉച്ചഭക്ഷണ പാചകത്തൊഴിലാളികളാണ്‌ ഭക്ഷ്യമേളയും പാചക മത്സരവും സംഘടിപ്പിച്ചത്‌. മാറുന്ന ഭക്ഷണശീലങ്ങൾ ഉണ്ടാക്കുന്ന ദോഷങ്ങൾ മനസ്സിലാക്കാനും പഴമയിലേക്ക് തിരിഞ്ഞുനോട്ടത്തിനായുമായാണ് മേള സംഘടിപ്പിച്ചത്‌. പരിക്കളം ശാരദാ വിലാസം എയുപി സ്കൂളിൽ പഞ്ചായത്ത് പ്രസിഡന്റ് പി സി ഷാജി ഉദ്ഘാടനം ചെയ്തു. കോയാടൻ രാമകൃഷ്ണൻ അധ്യക്ഷനായി.പി പി രാജേഷ് ബാബു പദ്ധതി വിശദീകരിച്ചു.
പ്രധാനാധ്യാപകൻ കെ കെ സുരേഷ് കുമാർ, പിടിഎ പ്രസിഡന്റ്‌ സി കെ ഷാജി, സിആർസി കോ–-ഓഡിനേറ്റർ സി കെ അനുഷിമ, പി ഖദീജ, പി വി ഉഷാദ്, ബി റഹ്മത്തുന്നീസ, കെ എസ് ഷിബു, എം എസ് വിദ്യാറാണി, എം കെ സ്വപ്ന എന്നിവർ സംസാരിച്ചു. പാചകമത്സരത്തിൽ രാജി ബാലകൃഷ്ണൻ (ശാരദാവിലാസം എയുപി സ്കൂൾ, പരിക്കളം), സോണിയ പി തോമസ് (ജിഎൽപിഎസ്, ചാമക്കാൽ), ത്രേസ്യാമ്മ ജോൺ (ജിയുപിഎസ്, അരീക്കാമല) എന്നിവർ ഒന്നും രണ്ടും മൂന്നും സ്ഥാനം നേടി.

ഇരിട്ടി: കഥകളിയെന്ന വിശ്വോത്തര കലാരൂപം ആവിര്‍ഭവിച്ച ക്ഷേത്രനടയില്‍ നടക്കുന്ന കഥകളി ഉത്സവം ഞായറാഴ്ച നാലാം ദിവസത്തിലേക്ക് കടക്കും. കഥകളിരംഗത്തെ പ്രഗദ്ഭരായ കലാകാന്മാരെ ഒന്നിച്ചണിനിരത്തിയാണ് മുഴക്കുന്ന് മൃദംഗശൈലേശ്വരി ക്ഷേത്ര മുറ്റത്ത് എട്ടു ദിവസം നീണ്ടു നില്‍ക്കുന്ന കഥകളി ഉത്സവം നടന്നുവരുന്നത്.

ശനിയാഴ്ച കോട്ടയം തമ്പുരാന്റെ പ്രസിദ്ധമായ കിര്‍മ്മീരവധം ആട്ടക്കഥയുടെ ആദ്യഭാഗമാണ് അരങ്ങിലെത്തിയത്. ധര്‍മ പുത്രരായി കലാമണ്ഡലം ബാലസുബ്രമണ്യന്‍ അരങ്ങത്ത് ശോഭിച്ചപ്പോള്‍ പാണ്ഡവ പത്‌നി പഞ്ചാലിയായി സദനം വിജയനും അരങ്ങില്‍ നിറഞ്ഞുനിന്നു. കലാമണ്ഡലം മഹേന്ദ്രന്‍ (ധൗമ്യന്‍), കലാ. അജീഷ് (ആദിത്യന്‍), കലാ. മുകുന്ദന്‍ (ശ്രീകൃഷ്ണന്‍), കലാ. നാരായണന്‍കുട്ടി (സുദര്‍ശനന്‍), കലാ.രവികുമാര്‍ (ദുര്‍വാസാവ്), കോട്ടക്കല്‍ സി.എം. ഉണ്ണികൃഷ്ണന്‍ ( രാണാം ധര്‍മപുത്രര്‍) എന്നിവര്‍ വേഷമിട്ടു.

കോട്ടക്കല്‍ മധുവും കലാ. ജയ്പ്രകാശും കോട്ടക്കല്‍ സന്തോഷും കലാ. പ്രണവും ( പൊന്നാനിയും ശിങ്കിടിയുമായി പിന്നണിയില്‍ സംഗീതത്തിലൂടെ അരങ്ങളിലെ ഭാവങ്ങള്‍ക്ക് മികവ് പകര്‍ന്നു. ചെണ്ടയില്‍ കഥകളി മേളത്തിലെ ആചാര്യന്‍ കൂടിയായ കലാ. ഉണ്ണികൃഷ്ണന്‍ നടന്മാരുടെ ചലനങ്ങള്‍ക്ക് ഓളം സൃഷ്ടിച്ചു. കലാ. നന്ദകുമാറും കലാ. സുധീഷും ചെണ്ടിയില്‍ ആശാനോടോപ്പം നിന്നു. മദ്ദളത്തില്‍ കോട്ടക്കല്‍രവിയും കലാ.വേണുഗോപാലനും, കലാ.സുധീഷും മേളകൊഴുപ്പേകി. ചുട്ടിയില്‍ കലാ. സതീശനും, സദനം വിവേകും അണിയറ നിയന്ത്രിച്ചു.

ആട്ടക്കഥകള്‍ പൂര്‍ണമായാണ് അരങ്ങേറുന്നത് എന്ന പ്രത്യേകത കൂടി കഥകളി ഉത്സവത്തിനുണ്ട്. കേന്ദ്ര സാസംസ്‌ക്കാരിക വകുപ്പിനു കീഴിലുള്ള തഞ്ചാവൂര്‍ സൗത്ത്‌സോണ്‍ കള്‍ച്ചറല്‍ സെന്ററും മൃദംഗശൈലേശ്വരി ക്ഷേത്രവും ചേര്‍ന്ന് കഥകളി ആചാര്യന്‍ പദ്മശ്രീ സദനം ബാലകൃഷ്ണന്റെ മേല്‍നോട്ടത്തിലാണ് പരിപാടി സംഘടിപ്പിക്കുന്നത്. ചെറുതുരുത്തി കഥകളി സ്‌കൂള്‍ ഡയറക്ടര്‍ കലാ.ഗോപാലകൃഷ്ണനാണ് പരിപാടിയുടെ ഏകോപനം. ഞായറാഴ്ച നടക്കുന്ന കഥകളി ഉത്സവത്തില്‍ കിര്‍മീരവധം ശാര്‍ദൂലന്‍ മുതല്‍വധം വരെയുള്ള രണ്ടാം ഭാഗമാണ് അരങ്ങിലെത്തുക.