കണ്ണവം: മഹല്ല് മുസ്‌ലിം ജമാഅത്ത് അൻവാറുൽ ഇസ്‌ലാം പള്ളി മദ്രസ കമ്മിറ്റി നടത്തുന്ന കണ്ണവം വെളുമ്പത്ത് മഖാം ശരീഫ് ഉറൂസ് 28, 29, 20, ഒക്ടോബർ ഒന്ന്, രണ്ട് തീയതികളിൽ നടക്കും. 28-ന് രാവിലെ 10-ന് ഉറൂസ് പരിപാടികൾക്ക് തുടക്കം കുറിച്ച് സയ്യിദ് മുഹമ്മദ് സഫ് വാൻ തങ്ങൾ പതാക ഉയർത്തും. തുടർന്ന് പാണക്കാട് സയ്യിദ് മുഈനലി ശിഹാബ് തങ്ങൾ ഉദ്ഘാടനം ചെയ്യും. ഉച്ചക്ക് രണ്ടിന് മജ്‌ലിസുന്നൂർ ആത്മീയ സദസ്സ്, 2.30-ന് ഇസ്‌ലാമിക ചരിത്ര കഥാപ്രസംഗം, രാത്രി എട്ടിന് സ്വലാത്ത് വാർഷികം എന്നിവയും ഉണ്ടാകും.

29-ന് രാവിലെ ഒൻപതിന് മതവിജ്ഞാന സദസ്. ഉച്ചക്ക് രണ്ടിന് നടക്കുന്ന സൗഹൃദ സംഗമം സ്പീക്കർ എ എൻ ഷംസീർ ഉദ്ഘാടനം ചെയ്യും. രാത്രി ഏഴിന് ദിക്ർ ദുആ മജ്‌ലിസ്. 30-ന് രാവിലെ മതവിജ്ഞാന സദസ്, ഉച്ചക്ക് രണ്ടിന് മദ്ഹുറസൂൽ പ്രഭാഷണം കേരള മുസ്‌ലിം ജമാഅത്ത് സംസ്ഥാന ജനറൽ സെക്രട്ടറി സയ്യിദ് ഖലീലുൽ ബുഖാരി കടലുണ്ടി ഉദ്ഘാടനം ചെയ്യും. അബ്ദുലത്തീഫ് സഖാഫി കാന്തപുരം മുഖ്യ പ്രഭാഷണം നടത്തും.

ഒക്ടോബർ ഒന്നിന് രാവിലെ 10-ന് നടക്കുന്ന പൊതു സമ്മേളനം സമസ്ത പ്രസിഡണ്ട് സയ്യിദ് മുഹമ്മദ് ജിഫ്രി മുത്തുകോയ തങ്ങൾ ഉദ്ഘാടനം ചെയ്യും. സമാപന ദിവസമായ രണ്ടിന് രാവിലെ 10-ന് സമാപന പ്രാർത്ഥന സദസ് സയ്യിദ് മശ്ഹൂർ അസ്‌ലം തങ്ങൾ ഉദ്ഘാടനം ചെയ്യും. കൂട്ടപ്രാർഥനക്ക് ചെറുമോത്ത് ഉസ്താദ് നേതൃത്വം നൽകും. തുടർന്ന് അന്നദാനവുൻ ഉണ്ടാകും.

കോളയാട് : കൂത്തുപറമ്പിൽ നിന്ന് കണ്ണവം- കോളയാട്- ആലച്ചേരി -അറയങ്ങാട് വഴി തൃക്കടാരിപ്പൊയിൽ ബസ് സ്റ്റാൻഡ് വരെ ബസ് സർവീസ് വേണമെന്ന് നാട്ടുകാർ ആവശ്യപ്പെട്ടു. അറയങ്ങാട് സ്നേഹഭവൻ വരെ രണ്ട് ബസുകൾ വന്ന് പോകുന്നതൊഴിച്ചാൽ നിലവിൽ ആലച്ചേരി വരെയാണ് ബസ് സർവീസുള്ളത്.കോളയാട്- ആലച്ചേരി -അറയങ്ങാട് തൃക്കടാരിപ്പൊയിൽ മാലൂർ വഴി മട്ടന്നൂര് വരെ അഞ്ചരമീറ്റർ വീതിയിൽ മെക്കാഡം ടാറിങ് ഉണ്ടെങ്കിലും ബസ് സർവീസില്ല. ഇതുവഴി ബസ്സ് സർവീസ് ഉണ്ടായാൽ നൂറ് കണക്കിന് യാത്രക്കാർക്ക് ഉപകാരപ്രദമാകും. ഇക്കാര്യമാവശ്യപ്പെട്ട് എം.എൽ. എയുടെ മണ്ഡലം അദാലത്തിൽ ഇടുമ്പ സ്വദേശി വാഴയിൽ ഭാസ്ക്കരൻ ആർ.ടിഒക്ക് നിവേദനം നൽകി.

കോളയാട് : സെയ്ൻ്റ് കൊർണേലിയുസ് ഹൈസ്കൂളിലെ 1972-73 എസ്.എസ്.എൽ.സി ബാച്ചിലെ വിദ്യാർത്ഥികൾ 50 വർഷങ്ങൾക്ക് ശേഷം ‘ഗോൾഡൻ കോർണേലിയൻസ്’ എന്ന പേരിൽ സ്കൂളിൽ സംഗമിച്ചു. കൂട്ടായ്മയുടെ അമരക്കാരൻ ടി. കെ. ജോസും കൂട്ടരും നാല് മാസത്തെ പ്രയത്നം കൊണ്ടാണ് കൂടെ പഠിച്ചവരെയെല്ലാം തേടിപ്പിടിച്ച് വിദ്യാലയാങ്കണത്തിൽ എത്തിച്ചത്. സംഗമം സ്കൂൾ മാനേജർ ഫാദർ ലെനിൻ ജോസ് ദീപം ഉദ്ഘാടനം ചെയ്തു. ടി. കെ.ജോസ് അധ്യക്ഷത വഹിച്ചു. പ്രിൻസിപ്പൽ ഫാദർ ഗിനീഷ് ബാബു മുഖ്യപ്രഭാഷണം നടത്തി. ഫിലിപ്പ് കാരാമക്കുഴി, കെ. പി. ഗംഗൻ , ടി.യു ഉലഹന്നാൻ ,കെ. ജെ. വിൽസൻ , മോളി ജേക്കബ്, കെ .ജെ മേരി, കെ.സി. ജോർജ്, എ. ജെ മേരി, യു .പ്രമീള, എ.ഐ. തോമസ്, പി.കെ.കുസുമകുമാരി എന്നിവർ പ്രസംഗിച്ചു. പൂർവ്വ അധ്യാപകരായ കെ. പി. ബാലകൃഷ്ണൻ, പി.സി. ജെയിംസ്, മേരിക്കുട്ടി തോമസ്, കെ.ജെ.മേരി ,കളാർക്ക് കെ.യു. ജോൺ എന്നിവരെ ആദരിച്ചു.