കൊട്ടിയൂർ: വൈശാഖോത്സവ നഗരിയും പരിസരവും റോഡരികുകളും ഡി.വൈ.എഫ്.ഐ യൂത്ത് ബ്രിഗേഡുകളുടെ നേതൃത്വത്തിൽ ക്ലീൻ കൊട്ടിയൂർ ക്യാമ്പയിന്റെ ഭാഗമായി ശുചീകരിച്ചു. പൊതുവിടങ്ങൾ പ്ലാസ്റ്റിക് വിമുക്തമാക്കാൻ ഡി.വൈ.എഫ്.ഐ നടത്തിവരുന്ന ‘ബീറ്റ് പ്ലാസ്റ്റിക് പൊലൂഷൻ ക്യാമ്പയിൻ’ തുടർ പ്രവർത്തനത്തിന്റെ ഭാഗമായാണ് ശുചീകരണം.

തലശേരി, പിണറായി, പാനൂർ, കുത്തുപറമ്പ്, ശ്രീകണ്ഠപുരം, ഇരിട്ടി, മട്ടന്നൂർ, പേരാവൂർ ബ്ലോക്കിലുള്ള 600-ഓളം യൂത്ത് ബ്രിഗേഡ് പ്രവർത്തകരാണ് പാൽച്ചുരം മുതൽ ഗണപതിപ്പുറം വരെയുള്ള പ്രദേശം ശുചീകരിച്ചത്.

ഞായറാഴ്ച രാവിലെ ഏഴിന് ഡി.വൈ.എഫ്.ഐ സംസ്ഥാന സെക്രട്ടറി വി.കെ. സനോജ് ഉദ്ഘാടനം ചെയ്തു. ജില്ലാ പ്രസിഡന്റ് മുഹമ്മദ് അഫ്‌സൽ അധ്യക്ഷത വഹിച്ചു. ജില്ലാ സെക്രട്ടറി അഡ്വ. സരിൻ ശശി, ജില്ലാ ട്രഷറർ അഡ്വ. കെ.ജി. ദിലീപ്, സംസ്ഥാന കമ്മറ്റിയംഗം പി.എം. അഖിൽ, ബ്ലോക്ക് പ്രസിഡന്റ് രഗിലാഷ് തുടങ്ങിയവർ സംസാരിച്ചു.

100 കണക്കിന് ചാക്കുകളിലായി പ്ലാസ്റ്റിക് കവറുകളും കുപ്പികളും ചില്ല് കുപ്പികളും മറ്റും വേർതിരിച്ച് ശേഖരിച്ച് കൊട്ടിയൂർ പഞ്ചായത്ത് ഹരിതകർമ്മ സേനക്ക് കൈമാറി.

കൊട്ടിയൂർ : യൂത്ത് കോൺഗ്രസ് ജില്ലാ യൂത്ത് കെയറിന്റെ നേതൃത്വത്തിൽ കൊട്ടിയൂർ കെയർ എന്ന പേരിൽ ശുചീകരണം നടത്തി. മുൻ സംസ്ഥാന വൈസ് പ്രസിഡന്റ് റിജിൽ മാക്കുറ്റി ഉദ്ഘാടനം ചെയ്തു. ജില്ലാ പ്രസിഡന്റ് വിജിൽ മോഹനൻ അധ്യക്ഷത വഹിച്ചു. ഡി.സി.സി വൈസ് പ്രസിഡന്റ് സുദീപ് ജെയിംസ്, യൂത്ത് കോൺഗ്രസ് സംസ്ഥാന ജനറൽ സെക്രട്ടറിമാരായ നിമിഷ രഘുനാഥ്, അഡ്വ. വി.പി. അബ്ദുൾ റഷീദ്, വി. രാഹുൽ, റോബർട്ട് വെള്ളാംവെള്ളി, ഫർസിൻ മജീദ്, നിധിൻ നടുവനാട്, മിഥുൻ മാറോളി, റെജിനോൾഡ് എന്നിവർ സംസാരിച്ചു.

വൈശാഖോത്സവ കാലത്തുടനീളം യൂത്ത് കോൺഗ്രസ് ഇന്ദിരാഗാസി സഹകരണ ആസ്പത്രിയുമായി സഹകരിച്ച് നടത്തിയ സൗജന്യ മെഡിക്കൽ എയ്ഡ് പോസ്റ്റിന്റെയും സൗജന്യ കാപ്പി വിതരണത്തിന്റെയും തുടർച്ചയായാണ് ഉത്സവനഗരി ശുചീകരണവും. ജില്ലാ ഭാരവാഹികളായ ടി.സുമി , ജിബിൻ ജെയ്‌സൺ, അമൽ കുറ്റിയാട്ടൂർ, ജിതിൻ കൊളപ്പ, ഷജിൽ മുകുന്ദ് എന്നിവർ ശുചീകരണത്തിന് നേതൃത്വം നൽകി.

കൊട്ടിയൂർ : 27 നാൾ നീണ്ട വൈശാഖോത്സവം ഇന്ന് തൃക്കലശാട്ടോടെ സമാപിക്കും. തിങ്കളാഴ്ച രാവിലെ വാകച്ചാർത്തോടെ ചടങ്ങുകൾ തുടങ്ങും. തുടർന്ന് തേങ്ങാമുറികളിലേക്ക് നാളം പകർന്ന ശേഷം അക്കരെ സന്നിധാനത്തെ എല്ലാ വിളക്കുകളും അണയ്ക്കും. തിങ്കളാഴ്ച രാവിലെ നടക്കുന്ന കലശാഭിഷേകത്തിന് മുൻപേ മുളന്തണ്ടുകളും ഞെട്ടിപ്പനയോലയും കൊണ്ട് നിർമിച്ച ഭഗവാന്റെ ശ്രീകോവിൽ പിഴുതെടുത്ത് പടിഞ്ഞാറെ നടയ്ക്ക് കുറുകെ തിരുവഞ്ചിറയിൽ ഉപേക്ഷിക്കും. തുടർന്ന് കലശാഭിഷേകം നടത്തും.

ഞായറാഴ്ച രാവിലെ പതിവ് പൂജകൾക്ക് ശേഷമായിരുന്നു അത്തം ചതുശ്ശതം നിവേദിച്ചത്. തുടർന്ന് ആനകളുടെ അകമ്പടിയില്ലാതെയുള്ള ഉച്ചശീവേലി. കൊട്ടിയൂരിലെത്തിച്ച ദേവതകളെയെല്ലാം വിഗ്രഹത്തിൽ നിന്ന് തിരികെ ആവാഹിച്ച് വാളുകളിൽ ലയിപ്പിക്കുന്ന വാളാട്ടവും ശേഷം കുടിപതികളുടെ തേങ്ങയേറും നടന്നു. നിത്യപൂജകൾക്ക് ശേഷം ഞായറാഴ്ച രാത്രിയോടെ കലശപൂജ തുടങ്ങി.