കോളയാട് : കാട്ടാന അക്രമണം പതിവായ പെരുവ പറക്കാടിലെ ജനവാസകേന്ദ്രത്തിലെ കൃഷിയിടത്തിൽ പകലും കാട്ടാനകളെത്തി കൃഷി നശിപ്പിച്ചു. ബുധനാഴ്ച പുലർച്ചെയെത്തിയ കാട്ടാനക്കൂട്ടം പറക്കാട് വിജയന്റേതുൾപ്പെടെ നിരവധി കർഷകരുടെ കാർഷിക വിളകൾ വ്യാപകമായി നശിപ്പിച്ചു. രാവിലെ കൃഷിയിടത്തിൽ കണ്ട കാട്ടാനകളെ വനം വകുപ്പ് ജീവനക്കാരും നാട്ടുകാരും ചേർന്ന് തുരത്തിയിരുന്നു.

തദ്ദേശീയരടക്കം കാട്ടാനകളെ തുരത്താൻ കാവൽ തുടരുമ്പോഴും വിവിധ പ്രദേശങ്ങളിൽ കാട്ടാനകളെത്തി കൃഷി നശിപ്പിക്കുന്നത് തുടരുകയാണ്. കഴിഞ്ഞ 11 ദിവസവും കോളയാട് പഞ്ചായത്തിലെ വിവിധ ഭാഗങ്ങളിൽ കാട്ടാനകൾ കൃഷി നശിപ്പിച്ചിട്ടുണ്ട്. വാച്ചർമാർ കുറവായതിനാൽ പട്രോളിങ്ങ് കാര്യക്ഷമമല്ലെന്നാണ് കർഷകർ പറയുന്നത്.

വനാതിർത്തിയിലെ ജനവാസ കേന്ദ്രങ്ങളിൽ നിന്നും കാട്ടാനകളെ തുരത്താൻ അധികൃതർ അലംഭാവം കാട്ടുന്നുവെന്നാണ് കർഷകരുടെ ആക്ഷേപം. കാട്ടാനകളെ ഉൾവനത്തിലേക്ക് തുരത്തിയ ശേഷം പ്രതിരോധ സംവിധാനമൊരുക്കണമെന്നും നാട്ടുകാർ ആവശ്യപ്പെട്ടു.

കോളയാട്: തുടർച്ചയായ എട്ടാം ദിനവും കോളയാട് പഞ്ചായത്തിൽ കാട്ടാനകളുടെ ആക്രമണം തുടരുന്നു. നിടുംപൊയിൽ ചെക്കേരി കരിമ്പിൽ ഞായറാഴ്ച പുലർച്ചെയെത്തിയ കാട്ടാനകൾ വ്യാപക നാശം വരുത്തി. മൂത്രാടൻ ചന്ദ്രൻ, തെനിയാടൻ ബിനു, ഇ. സജേഷ് എന്നിവരുടെ തെങ്ങുകൾ കാട്ടാനക്കൂട്ടം നശിപ്പിച്ചു. കരിമ്പിൽ നിന്ന് നിടുംപൊയിൽ ടൗണിലേക്ക് അഞ്ഞൂറ് മീറ്റർ ദൂരം മാത്രമാണുള്ളത്. തൊട്ടടുത്ത പ്രദേശമായ കുട്ടിയടുപ്പിൽ കഴിഞ്ഞ ദിവസം കാട്ടാനകളെത്തി വ്യാപകമായി കൃഷി നശിപ്പിച്ചിരുന്നു.

പ്രത്യക്ഷ സമരത്തിന് കുറിച്യ മുന്നേറ്റ സമിതി

കോളയാട് : പഞ്ചായത്തിലെ വിവിധ പ്രദേശങ്ങളിൽ കാട്ടാനകളുടെ ആക്രമണം രൂക്ഷമായിട്ടും നടപടി സ്വീകരിക്കാത്ത അധികൃതർക്കെതിരെ കുറിച്യ മുന്നേറ്റ സമിതി ജില്ലാ കമ്മിറ്റി പ്രക്ഷോഭത്തിനൊരുങ്ങുന്നു. കാട്ടാനകൾ കാരണം ജീവനും സ്വത്തിനും സംരക്ഷണമില്ലാതെ കർഷകർ ദുരിതത്തിലാണ്. ഇക്കാര്യത്തിൽ അധികൃതർ യാതൊരു നടപടിയും സ്വീകരിക്കുന്നില്ലെന്ന് കെ.കെ.എം.എസ് ആരോപിച്ചു. ബന്ധപ്പെട്ട എല്ലാ അധികാരികൾക്കും നിരവധി തവണ പരാതി നല്കിയിട്ടും നടപടിയില്ല. ജില്ലാ കളക്ട്രേറ്റ്, ഡി.എഫ്.ഒ, കണ്ണവം റെയ്ഞ്ച് ഓഫീസ്, കോളയാട് പഞ്ചായത്ത് എന്നിവിടങ്ങളിലാണ് കുറിച്യ മുന്നേറ്റ സമിതിയുടെ നേതൃത്വത്തിൽ സമരം നടത്താനൊരുങ്ങുന്നത്. കോളയാട് ചേർന്ന യോഗത്തിൽ ജില്ലാ പ്രസിഡന്റ് സി. സതീശൻ അധ്യക്ഷത വഹിച്ചു. ജില്ലാ സെക്രട്ടറി എം. ബിജേഷ്, വൈസ്.പ്രസിഡന്റ് സി. സജീവൻ, പി. ചന്ദ്രൻ എന്നിവർ സംസാരിച്ചു.

കോളയാട് : കൊമ്മേരി , കറ്റിയാട്, പെരുവ മേഖലയിൽ വെള്ളിയാഴ്ച പുലർച്ചെയും കാട്ടാനകളിറങ്ങി വ്യാപകമായി കൃഷി നശിപ്പിച്ചു. നരിക്കോടൻ ഗംഗാധരന്റെ 150-ഓളം കുലച്ച വാഴകളാണ് നശിപ്പിച്ചത്. പെരുവയിലെ പി. രാജൻ, രജിത, രാജു, ബാബു എന്നിവരുടെ 500-ഓളം വാഴകളും നൂറോളം കവുങ്ങ്, തെങ്ങ്, കപ്പ എന്നിവയും കാട്ടാനക്കൂട്ടം നശിപ്പിച്ചു.

കഴിഞ്ഞ അഞ്ച് ദിവസങ്ങളായി പെരുവ വാർഡിലെ ചെമ്പുക്കാവിൽ കാട്ടാനകൾ കൃഷി നശിപ്പിച്ചിരുന്നു. ഇവിടെ നിന്നും തുരത്തിയ കാട്ടാനകളാണ് കറ്റിയാട് ഇറങ്ങിയതെന്ന് കർഷകർ പറയുന്നു. തുടർച്ചയായ ആറാം ദിവസമാണ് കാട്ടാനകൾ മേഖലയിൽ ജനവാസകേന്ദ്രങ്ങളിലെത്തി കൃഷി നശിപ്പിക്കുന്നത്. ആനകളെ തുരത്താൻ അധികൃതർ കാര്യക്ഷമമായി പ്രവർത്തിക്കുന്നില്ലെന്നാണ് ആക്ഷേപം.