കേളകം: കഞ്ചാവ് ഉപയോഗിച്ച മൂന്ന് യുവാക്കളെ കേളകം പോലീസ് പിടികൂടി കേസെടുത്തു. കേളകം പൂവത്തിൻ ചോലയിലെ കൂവക്കുന്നേൽ ആഷ്‌വിൻ ജോസഫ് (20), മലയാംപടിയിലെ ചിങ്ങേത്ത് ലിയൊ.സി.സന്തോഷ് (20), കൊളക്കാട് നെല്ലിപ്പള്ളി എൻ.എൻ. ജിത്തുമോൻ (23) എന്നിവരെയാണ് കേളകം ടൗണിൽ നിന്ന് ഇൻസ്‌പെക്ടർ കെ.ജി. പ്രവീൺ കുമാറിന്റെ നേതൃത്വത്തിൽ പിടികൂടി കേസെടുത്തത്.

കേളകം: അടക്കാത്തോട് നരിക്കടവിൽ വിലങ്ങുപാറയിൽ ജോയിയുടെ വളർത്തു നായയെ വന്യജീവി ആക്രമിച്ചു. കടുവയാണ് ആക്രമിച്ചതെന്ന് വീട്ടുടമസ്ഥർ പറയുന്നു. ചൊവ്വാഴ്ച രാത്രി പത്ത് മണിയോടെയാണ് സംഭവം. കടുവയുടേതെന്ന് തോന്നിപ്പിക്കുന്ന കാൽപ്പാടുകളും പറമ്പിൽ കാണപ്പെട്ടു. കടിയേറ്റ നായയുടെ കഴുത്തിന്റെ ഭാഗത്ത് ആഴത്തിലുള്ള മുറിവുകളുണ്ട്.  

നായയുടെ കരച്ചിൽ കേട്ടാണ് വീടിന്റെ പുറത്തിറങ്ങിയത്. ടോർച്ച് വെളിച്ചത്തിൽ താനും ഭാര്യയും കടുവയെ വ്യക്തമായി കണ്ടുവെന്നും ജോയ് പറഞ്ഞു. വന്യജീവി ആക്രമണം തന്നെയാണെന്നും നായയുടെ നില ഗുരുതരമാണെന്നും ആഴത്തിലുള്ള മുറിവുകളാണെന്നും ഡോക്ടർ പറഞ്ഞു. വനപാലകർ സ്ഥലത്തെത്തി പരിശോധന നടത്തിയിയിട്ടുണ്ട്. 

പ്രദേശത്ത് ആദ്യമായാണ് ഒരു വന്യജീവി ആക്രമണം ഉണ്ടാകുന്നത്. ഇനിയും ഒരു ആക്രമണം ഉണ്ടാകുന്നതിനു മുൻപ് രാത്രികാലങ്ങളിൽ സ്ഥിരമായി നൈറ്റ് പെട്രോളിങ്ങ് നടത്തേണ്ട നടപടി വനം വകുപ്പ് സ്വീകരിക്കണമെന്ന് കേളകം പഞ്ചായത്ത് പ്രസിഡന്റ് സി.ടി. അനീഷ് ആവശ്യപ്പെട്ടു.

കേളകം: കേളകം പഞ്ചായത്തിലെ വാളുമുക്ക് ആദിവാസി കോളനിയിലെ കുളങ്ങരേത്ത് ലക്ഷ്മണൻ ആറളം വനത്തിന്റെ കാവാലാളായിട്ട് അരനൂറ്റാണ്ട് പിന്നിട്ടു. ആറളം വനത്തിന്റെ ഓരോ മുക്കും മൂലയും എഴുപത് പിന്നിട്ട ലക്ഷ്മണന്റെ പാദസ്പർശനമേറ്റിട്ടുണ്ട്. ആറളം വന്യജീവി സങ്കേതത്തിലെ താത്കാലിക വാച്ചറായ ലക്ഷ്മണന് ആരോടും പരാതികളോ ,പരിഭവങ്ങളോ ഇല്ല. ഒന്നര രൂപ കൂലിക്കാരനായി വന നിരീക്ഷകനായി ആറളത്ത് വന സേവനം തുടങ്ങിയ ഇദ്ദേഹത്തിന്റെ സേവനം ഉപയോഗപ്പെടുത്തിയാണ് ഇന്നും വന നിരീക്ഷണം നടത്തുന്നത്.

മീൻമുട്ടി വെള്ളച്ചാട്ടവും ഭൂതം കല്ലും പക്ഷിപാതാളവും രാമച്ചി വെള്ളച്ചാട്ടവും കുടക് വനത്തോട് ചേർന്ന ആറളത്തിന്റെ ഗിരിശൃംഗമായ അമ്പലപ്പാറയും വരെ ഇന്നും കുതിച്ച് പായാൻ മനക്കരുത്തുള്ളത് ലക്ഷ്മണേട്ടന്റെ സംഘത്തിനാണ്. ആറളം വനം സർക്കാർ ഏറ്റെടുത്ത് വന്യ ജീവി സങ്കേതമാക്കുന്നതിന് മുമ്പ് മുതൽ ആറളം വനത്തിന്റെ തുടിപ്പുകളറിയുന്നവരിൽ അവശേഷിക്കുന്നയാൾ ലക്ഷ്മണേട്ടൻ മാത്രമാണെന്ന് നാട്ടുകാരും ഓർക്കുന്നു. കാട്ടാനകളുടെയും, കടുവകളുടെയും, പുലി ,കാട്ട് പന്നി തുടങ്ങി ക്ഷുദ്രജീവികളുടെയും മുമ്പിൽ അകപ്പെട്ട സംഭവങ്ങൾ പല തവണ ഉണ്ടായിട്ടുണ്ടെങ്കിലും ഭയം ലവലേശമില്ല ലക്ഷ്മണന്.വനം വകുപ്പുദ്യോഗസ്ഥർ നൽകുന്ന നിർദ്ദേശങ്ങൾ പാലിച്ച് അവർക്ക് മുന്നെ വഴികാട്ടിയായി വെളിച്ചം തെളിക്കുകയാണ് ലക്ഷ്മണൻ.