സെല്‍ഫി എടുക്കുന്നതിനിടെ യുവാവ് ഡാമില്‍ വീണു
വിതുര : സെല്‍ഫി എടുക്കുന്നതിനിടെ കാല്‍ വഴുതി യുവാവ് പേപ്പാറ ഡാമില്‍ വീണു. ബുധനാഴ്ച ഉച്ചയോടെയാണ് സംഭവം. പേപ്പാറ മാങ്കാല സ്വദേശി സുജിത്ത് (36) ആണ് ഡാമിന് മുകളില്‍ നിന്ന് സെല്‍ഫി എടുക്കുന്നതിനിടെ ഡാമിലേക്ക് വീണത്.
നാല് സുഹൃത്തുക്കളോടൊപ്പം രാവിലെയാണ് സുജിത്ത് ഡാമില്‍ എത്തിയത്. നീന്തല്‍ അറിയാവുന്ന സുജിത്ത് സമീപത്തെ ഒരു പൈപ്പില്‍ പിടിച്ച് കിടക്കുകയായിരുന്നു. ഡാം പരിസരത്ത് ഉണ്ടായിരുന്നവര്‍ അഗ്നിരക്ഷാസേനയെ അറിയിച്ചു. വിതുര അഗ്നിരക്ഷാസേനയെത്തി വടം ഇട്ടുകൊടുത്ത ശേഷം വലയില്‍ കയറ്റി രക്ഷപ്പെടുത്തുകയായിരുന്നു.
