IRITTY

തളിരിടാതെ റബ്ബർ, വിലയിടിഞ്ഞ് കശുവണ്ടി: പച്ചതൊടാതെ മലയോരം

Published

10 months ago

January 16, 2024

NH newsdesk

Share our post

ഇരിട്ടി : വന്യമൃഗങ്ങളിൽ നിന്നുണ്ടാകുന്ന ഭീഷണിക്കൊപ്പം കാലാവസ്ഥ വ്യതിയാനവും മലയോരത്തെ കർഷകരെ കണ്ണീർ കുടിപ്പിക്കുകയാണ്.

കാർഷിക മേഖലയിലെ വിലത്തകർച്ചയും വിളത്തകർച്ചയും ജീവിതം ദുസ്സഹമാക്കുന്നു. പ്രതീക്ഷയുടെ പൂക്കാലമാകേണ്ട കശുവണ്ടി കൂടി ചതിച്ചതോടെ മലയോര ജനതയുടെ മുന്നോട്ടുള്ള വഴി കല്ലും മുള്ളും നിറഞ്ഞതായി മാറുകയാണ്. റബ്ബർവിലയിലെ അനിശ്ചിതത്വം മലയോരത്തെ കർഷകന്റെ നട്ടെല്ല് തകർത്തു.

റബ്ബർ ഉത്പാദന സീസൺ പാതി പിന്നിട്ടപ്പോൾ മുൻവർഷത്തിന്റെ മൂന്നിലൊന്ന് പോലും കർഷകന് ലഭിച്ചിട്ടില്ല. മലയോരത്ത് തുർച്ചയായി ഉണ്ടാകുന്ന മഴയാണ് ഉത്പാദനദിനങ്ങളെ കുറച്ചത്. കശുവണ്ടിക്ക് തറവില പോലും പ്രഖ്യാപിച്ചിട്ടില്ല.

സംഭരണം പാളിയതോടെ എല്ലാം സ്വകാര്യ സംരംഭകരുടെ നിയന്ത്രണത്തിലായി. അവർ നിശ്ചയിക്കുന്ന വിലയ്ക്ക് കശുവണ്ടി വിൽക്കേണ്ട അവസ്ഥ.

കശുവണ്ടി ഉണക്കിക്കൊണ്ടുവന്നാൽ മാത്രമേ സ്വീകരിക്കുകയുള്ളൂവെന്ന വ്യാപാരികളുടെ തീരുമാനവും കർഷകന് ഇരുട്ടടിയാകുകയാണ്.

കശുവണ്ടി ഉത്പാദനം മൂന്നിലൊന്നായി കുറയും

കഴിഞ്ഞ അഞ്ചുവർഷം കശുമാവ് കൃഷിയുടെ വിസ്തൃതിയിൽ 50 ശതമാനം കുറവ് വന്നപ്പോൾ ഉത്പാദനത്തിൽ 60 ശതമാനത്തിന്റെ ഇടിവുണ്ടായി. വിലസ്ഥിരത ഉറപ്പുവരുത്താൻ നടപടിയില്ലാത്തതും കാലാവസ്ഥയിലെ ചാഞ്ചാട്ടവുമാണ് കശുവണ്ടി കർഷകരെ ആശങ്കയിലാക്കുന്നത്.

മുൻ വർഷങ്ങളിൽ ലഭിക്കുന്നതിന്റെ മൂന്നിലൊന്ന് പോലും ഉത്പാദനം ഇത്തവണ കർഷകർക്ക് ലഭിക്കില്ലെന്ന ആശങ്ക ശക്തമാണ്. തുടക്കത്തിൽ ലഭിക്കുന്ന വില സീസൺ അവസാനിക്കുന്നതുവരെ ലഭിക്കാൻ നടപടിയുണ്ടാക്കുന്നില്ല. കഴിഞ്ഞ വർഷം തുടക്കത്തിൽ 100 രൂപയായിരുന്നു കിലോയ്ക്ക് വില. കിലോയ്ക്ക് 114 രൂപ സർക്കാർ തറവില പ്രഖ്യാപിച്ചതോടെ പൊതുവിപണിയിൽ വില 112 വരെയായി ഉയർന്നു. സർക്കാർ സംഭരണം പാളിയതോടെ വില ഘട്ടംഘട്ടമായി താഴ്ന്നു. ഇത് നൂറിലേക്കും 90-ലേക്കും കുറഞ്ഞു. ഇക്കുറി തറവിലയും ഇല്ല.

കശുമാവിന്റെ ഭൂവിസ്തൃതിയിലെ കുറവും ഈ മേഖലയിലെ പ്രതസന്ധിയുടെ ആക്കം കൂട്ടുന്നു. ജില്ലയിൽ 60,000 ഹെക്ടർ സ്ഥലത്തുണ്ടായിരുന്ന കശുമാവ് കൃഷി ഇപ്പോൾ പകുതിയോളമായി കുറഞ്ഞു. ജില്ലയിൽ അഞ്ചുവർഷം മുൻപ്‌ 32,184 ടൺ ഉത്പാദനം ഉണ്ടായിരുന്നിടത്ത് ഇപ്പോൾ പകുതി പോലും ലഭിക്കില്ലെന്നാണ് വിദഗ്ധർ പറയുന്നത്. ജില്ലയിൽ കൂടുതൽ കശുവണ്ടി വിളയുന്ന ആറളം ഫാമിൽ ഇക്കുറി 50 ടൺ പോലും ലഭിക്കാത്ത അവസ്ഥയാണ്. മുൻകാലങ്ങളിൽ 100-150 ടൺ വരെ ലഭിച്ചിരുന്നിടത്താണിത്.

റബ്ബറിനും കഷ്ടകാലം

അകാല മഴ റബ്ബറിന്റെ ഇഴപൊഴിച്ചിലിനേയും ബാധിച്ചിരിക്കുകയാണ്. ചൂടിന്റെ തീക്ഷ്ണത അനുസരിച്ച് നവംബർ, ഡിസംബർ മാസങ്ങളിൽ ഇലപൊഴിഞ്ഞ് ജനുവരിയിൽ തളിരിടേണ്ടതായിരുന്നു. ജനുവരി പകുതി പിന്നിട്ടിട്ടും ഇലപൊഴിച്ചൽ ആരംഭിച്ചിട്ടില്ല. പുതിയ തളിരുകൾ മൂത്ത് മികച്ച ഉത്പാദനം ലഭിക്കേണ്ട സമയമാണിപ്പോൾ. വിലയിലെ അനിശ്ചിതത്വവും പ്രതിസന്ധിയാണ്.

കിഴങ്ങുവർഗങ്ങളും പടിയിറങ്ങുന്നു

മലയോരത്തിന്റെ മുഖമുദ്രയായ കിഴങ്ങുവർഗ വിളകളുടെ കൃഷി പേരിന് മാത്രമാകുന്നു. കപ്പക്കൃഷി കുറഞ്ഞതിനാൽ ഒരുകിലോ കപ്പയ്ക്ക് 50-ന് മുകളിൽ വില നൽകി വാങ്ങേണ്ടിവരുന്നു. കാച്ചിലും ചേനയും ചേമ്പും മധുരക്കിഴങ്ങുമെല്ലാം അയൽസംസ്ഥാനങ്ങളിൽനിന്നും എത്തേണ്ട അവസ്ഥയാണ്. കാട്ടുപന്നിയും കുരങ്ങും മറ്റ് വന്യമൃഗങ്ങളും കിഴങ്ങുവർഗങ്ങൾ നശിപ്പിക്കാൻ തുടങ്ങിയതോടെയാണ് കൃഷിയിറക്കാതെയായത്.

Share our post

IRITTY

കിളിയന്തറയിൽ സഹകരണ റബർ ഫാക്ടറി സജ്ജം

Published

2 days ago

November 22, 2024

NH newsdesk

Share our post

ഇരിട്ടി:ക്ഷീരസംഘം മാതൃകയിൽ റബർ പാലളന്ന്‌ കർഷകരിൽനിന്ന്‌ ശേഖരിച്ച്‌ ഗ്രേഡ് റബർ ഷീറ്റാക്കി മാറ്റുന്ന ജില്ലയിലെ ആദ്യത്തെ സഹകരണ റബർ ഫാക്ടറി കിളിയന്തറ നിരങ്ങൻചിറ്റയിൽ പ്രവർത്തനക്ഷമമായി. അടുത്തയാഴ്‌ച ഉദ്‌ഘാടനം ചെയ്യും. കിളിയന്തറ സർവീസ്‌ സഹകരണ ബാങ്കാണ്‌ നിരങ്ങൻചിറ്റയിൽ വാങ്ങിയ അരയേക്കർ സ്ഥലത്ത്‌ നിർമിച്ച ഫാക്ടറിയിൽ നൂതന സംരംഭം ആരംഭിക്കുന്നത്‌. രണ്ടുകോടി രൂപയുടേതാണ്‌ പദ്ധതി.
കർഷകരിൽനിന്ന്‌ റബർപാൽ വാങ്ങി നിരങ്ങൻചിറ്റ ഫാക്ടറിയിൽ സംഭരിക്കും. ആർഎസ്‌എസ്‌ ഗ്രേഡ്‌ നാലിനം ഷീറ്റടിക്കാനുള്ള ഉപകരണങ്ങൾ ഫാക്ടറിയിലുണ്ട്‌. പാൽ ഉറയൊഴിച്ച്‌ തത്സമയം ഷീറ്റാക്കി മാറ്റും. ഷീറ്റിന്‌ തൂക്കത്തോതിൽ മാർക്കറ്റ്‌ വില പത്തുദിവസം കൂടുമ്പോൾ നൽകും. ലാറ്റക്സ്‌ ഷീറ്റാക്കി മാറ്റുന്ന വ്യക്തിഗത ചെലവ്‌ കുറയ്‌ക്കാനും മേത്തരം ഷീറ്റ്‌ ലഭ്യമാക്കി ഉയർന്ന വില കർഷകർക്ക്‌ നൽകാനുമാണ്‌ സംരംഭം തുടങ്ങുന്നതെന്ന്‌ ബാങ്ക്‌ പ്രസിഡന്റ്‌ വി കെ ജോസഫ്‌, സെക്രട്ടറി എൻ അശോകൻ എന്നിവർ പറഞ്ഞു.ഉദ്‌ഘാടനം കഴിയുന്നതോടെ റബർ കാർഷിക മേഖലയിലെ കർഷകർക്കാകെ പ്രയോജനപ്പെടുന്ന തരത്തിൽ ഫാക്ടറി പ്രവർത്തനം വിപുലപ്പെടുത്തും. പ്രതിദിനം 2000 ലിറ്റർ ലാറ്റക്സ്‌ ഗ്രേഡ്‌ ഷീറ്റാക്കാനുള്ള ശേഷിയുണ്ട്‌ ഫാക്ടറിക്ക്‌.

Share our post

IRITTY

കാട്ടുപന്നികൾ പരക്കെ; പൊറുതിമുട്ടി പെരുമ്പറമ്പ്‌

Published

3 days ago

November 21, 2024

NH newsdesk

Share our post

ഇരിട്ടി:പെരുമ്പറമ്പിലെ ജനവാസമേഖലയിൽ രണ്ടാം ദിവസവും കാട്ടുപന്നിക്കൂട്ടമെത്തി വ്യാപകമായി കൃഷി നശിപ്പിച്ചു. മാതോളി ശ്രീനിവാസൻ, മന്നമ്പേത്ത് പ്രമോദ്കുമാർ എന്നിവരുടെ കൃഷിയിടത്തിലെ കപ്പ, ചേന, ചേമ്പ്, കൂവ എന്നിവ കഴിഞ്ഞ രാത്രിയിൽ തകർത്തു. തിങ്കൾ രാത്രിയിലും കാട്ടുപന്നികളിറങ്ങി ജോണി യോയാക്കിന്റെ 200 നേന്ത്രവാഴകളും കപ്പയും നശിപ്പിച്ചിരുന്നു.മാതോളി ശ്രീനിവാസൻ കൃഷിയിടത്തിന്ചുറ്റും സാരിവിരിച്ച്‌ തീർത്ത വേലിയും തകർത്താണ്‌ വിളവെടുപ്പിന് പാകമായ കപ്പയും കൂവയും ചേമ്പും നശിപ്പിച്ചത്‌. പ്രമോദ്കുമാറിന്റെ വീട്ടുപറമ്പിലെ ചേനയും ചേമ്പുമാണ്‌ നശിപ്പിച്ചത്‌. വനംവകുപ്പ് അധികൃതർ സ്ഥലം സന്ദർശിച്ചു. ഫോറസ്റ്റർ സുനിൽകുമാർ ചെന്നപ്പൊയിൽ, ബീറ്റ് ഫോറസ്റ്റർ ഈടൻ രാജേഷ് എന്നിവരുടെ നേതൃത്വത്തിൽ കൃഷിനഷ്ടം വിലയിരുത്തി. വനമേഖലയിൽനിന്ന്‌ കിലോമീറ്ററോളം അകലെയുള്ള ജനവാസ മേഖലയാണ് കാട്ടുപന്നികൾ താവളമാക്കിയത്‌. പന്നികളെ വെടിവച്ചുകൊല്ലാൻ നടപടി സ്വീകരിക്കുമെന്ന് പഞ്ചായത്ത് പ്രസിഡന്റ് പി രജനി പറഞ്ഞു.

Share our post

IRITTY

ഇരിട്ടി നഗരസഭാ കേരളോത്സവം ഡിസംബർ ഒന്ന് മുതൽ 15 വരെ

Published

3 days ago

November 21, 2024

NH newsdesk

Share our post

ഇരിട്ടി: ഇരിട്ടി നഗരസഭാ കേരളോത്സവം ഡിസംബർ 1 മുതൽ 15 വരെ വിവിധ വേദികളിലായി നടക്കും. ക്രിക്കറ്റ് മത്സരം ഡിസംബർ 1ന് വളള്യാട് ഗ്രൗണ്ടിലും, വോളിബോൾ മത്സരം നിടിയാഞ്ഞിരം ഗ്രൗണ്ടിലും, വടംവലി മത്സരം ഇരിട്ടി പുതിയ സ്റ്റാൻ്റ് പരിസരത്ത്ഡിസംബർ 4ന് 7 മണിക്കും, ചെസ് മത്സരം ഡിസംബർ 7 ന് നഗരസഭ ഹാളിലും, കബഡി മത്സരം മിത്തലെ പുന്നാട് നിവേദിത സ്ക്കൂൾ ഗ്രൗണ്ടിലും, അത് ലറ്റിക്ക് മത്സരങ്ങൾ ഡിസംബർ 8 ന് രാവിലെ 8 മണി മുതൽ വളള്യാട് ഗ്രൗണ്ടിലും, ഷട്ടിൽ ടൂർണമെൻ്റ്ഡിസംബർ 10 ന് വൈകുന്നേരം 5 ണി മുതൽ ഇരിട്ടി എം.എസ് ഗോൾഡ് ഇൻ്റോർ ഗ്രൗണ്ടിലും, ഫുട്ബോൾ മത്സരം ഡിസംബർ 14 ന് വളള്യാട് ഗ്രൗണ്ടിൽ വച്ചും, കലാമത്സരങ്ങൾ ഡിസംബർ 15ന് ചാവശ്ശേരി മിനി സ്റ്റേഡിയത്തിലും നടക്കും.

നഗരസഭ ഹാളിൽ നടന്ന സംഘാടക സമിതി രൂപീകരണ യോഗം ചെയർപേഴ്സൺ കെ.ശ്രിലത ഉദ്ഘാടനം ചെയ്തു. വൈസ് ചെയർമാർ പി.പി. ഉസ്മാൻ അധ്യക്ഷനായി. സ്റ്റാൻ്റിംങ്ങ് കമ്മിറ്റി ചെയർമാൻമാരായ എ.കെ. രവിന്ദ്രൻ, ടി.കെ. ഫസീല, പി.കെ. ബൾക്കീസ്, കൗൺസിലർമാരായ പി.രഘു, എ.കെ. ഷൈജു, എം.കെ. നജുമുന്നിസ്സ, ആസൂത്രണ സമിതി ഉപാധ്യക്ഷൻ കെ.ആർ. അശോകൻ, എൻ. രാജൻ, യുത്ത് കോഡിനേറ്റർ അശ്വിൻ കാരായി എന്നിവർ സംസാരിച്ചു.സംഘാടക സമിതി ഭാരവാഹികൾ : കെ.ശ്രീലത (ചെയർമാൻ), രാഗഷ് പാലേരി വീട്ടിൽ (ജനറൽ കൺവീനർ ).

Share our post