പേരാവൂർ കുനിത്തലയിൽ 75 ലിറ്റർ വാഷും 28 ലിറ്റർ ചാരായവുമായി രണ്ടുപേർ അറസ്റ്റിൽ
പേരാവൂർ : കുനിത്തല കുറൂഞ്ഞിയിൽ ആൾത്താമസമില്ലാത്ത പുരയിടത്തിൽ വൻ തോതിൽ ചാരായ നിർമ്മാണം നടത്തിയ രണ്ടു പേരെ പേരാവൂർ എക്സൈസ് അറസ്റ്റ് ചെയ്തു. കുറൂഞ്ഞിയിലെ കാറാട്ട് സുമേഷ് (44), വേക്കളം നാൽപ്പാടിയിലെ പി. അജേഷ് (40) എന്നിവരാണ് അറസ്റ്റിലായത്. 75 ലിറ്റർ വാഷും 28 ലിറ്റർ ചാരായവും ഗ്യാസ് സിലിണ്ടറും സ്‌റ്റൗവുമടക്കം വാറ്റുപകരണങ്ങളും കണ്ടെടുത്തു. പേരാവൂർ എക്സൈസ് അടുത്ത കാലത്ത് നടത്തിയ വൻ ചാരായ വേട്ടയാണിത്.
എക്സൈസ് കമ്മീഷണറുടെ ഉത്തര മേഖല സ്ക്വാഡംഗം പ്രിവന്റീവ് ഓഫീസർ എം.പി. സജീവന് ലഭിച്ച രഹസ്യ വിവരത്തെ തുടർന്ന് നടത്തിയ റെയ്ഡിലാണ് വൻ ചാരായ നിർമ്മാണം പിടി കൂടിയത്.
പ്രിവൻറീവ് ഓഫീസർ എം.പി. സജീവന്റെ നേതൃത്വത്തിൽ പ്രിവൻറീവ് ഓഫീസർ എൻ. പത്മരാജൻ, ഗ്രേഡ് പ്രിവന്റീവ് ഓഫീസർ ബാബുമോൻ ഫ്രാൻസിസ്, സിവിൽ എക്സൈസ് ഓഫീസർ സി. സുരേഷ്, ഷീജ കാവളാൻ, സി. ധനീഷ് എന്നിവർ റെയ്ഡിൽ പങ്കെടുത്തു. പ്രതികളെ കൂത്തുപറമ്പ് കോടതിയിൽ ഹാജരാക്കും.
