പി.എസ്.സി. ഓൺലൈൻ മാതൃകാ പരീക്ഷകൾ പ്രൊഫൈലിൽ പരിശീലിക്കാം
പി.എസ്.സി. ഓൺലൈൻ പരീക്ഷകളുടെ മാതൃക ഇനിമുതൽ ഉദ്യോഗാർഥികൾക്ക് പ്രൊഫൈലിൽ പരിശീലിക്കാം. ഓൺലൈൻ മാതൃകാപരീക്ഷകൾ പ്രൊഫൈലിൽ ലഭ്യമാക്കാൻ പി.എസ്.സി. തീരുമാനിച്ചു.
നിലവിൽ ഓൺലൈൻ പരീക്ഷയ്ക്ക് തൊട്ടുമുൻപ്‌ മാതൃകാ പരീക്ഷയിൽ പങ്കെടുക്കാൻ ഉദ്യോഗാർഥികളെ അനുവദിക്കുന്നുണ്ട്. ഡിസംബർ ഒന്നുമുതലുള്ള ഓൺലൈൻ പരീക്ഷകളോടൊപ്പം മാതൃകാ പരീക്ഷയുണ്ടാകില്ലെന്ന് പി.എസ്.സി. അറിയിച്ചു.
പ്രൊഫൈലിലുള്ള മാതൃകാപരീക്ഷകൾ പരിശീലിച്ച് പരിചയപ്പെട്ടശേഷമാണ് ഉദ്യോഗാർഥികൾ പരീക്ഷയെഴുതാനെത്തേണ്ടത്. ഓൺലൈൻ പരീക്ഷയ്ക്ക് അഡ്മിഷൻ ടിക്കറ്റ് ലഭിക്കുന്നവരുടെ പ്രൊഫൈലിൽ തുടക്കത്തിൽ മാതൃകാപരീക്ഷ ലഭ്യമാക്കും.
സ്വന്തം പ്രൊഫൈലിൽ പ്രവേശിച്ച് റിഹേഴ്‌സൽ എക്സാമിനേഷൻ എന്ന ലിങ്ക് ക്ലിക്ക് ചെയ്ത് പരിശീലനം നടത്താം. ഓൺലൈൻ പരീക്ഷയുടെ വിശദാംശങ്ങളും ഈ ലിങ്കിലുണ്ടാകും. ഉദ്യോഗാർഥികൾക്ക് എത്രതവണ വേണമെങ്കിലും മാതൃകാപരീക്ഷ പരിശീലിക്കാം.
