കണിച്ചാർ: സുബ്രഹ്മണ്യസ്വാമി ക്ഷേത്രം തൈപ്പൂയ്യ ഉത്സവത്തിന്റെ ഭാഗമായി സാംസ്കാരിക സമ്മേളനം നടത്തി. കണിച്ചാർ പഞ്ചായത്ത് പ്രസിഡൻ്റ് ആൻ്റണി സെബാസ്റ്റ്യൻ ഉദ്ഘാടനം ചെയ്തു. ശാഖായോഗം പ്രസിഡൻ്റ് ടി.ടി.ശ്രീനിവാസൻ അദ്ധ്യക്ഷനായി. സന്തോഷ് ഇല്ലോളിൽ മുഖ്യ പ്രഭാഷണം നടത്തി.

എസ്.എൻ.വനിതാ സംഘം പ്രസിഡൻറ് ചന്ദ്രമതി പ്രതിഭകളെ ആദരിച്ചു. കണിച്ചാർ പഞ്ചായത്ത് മെമ്പർ തോമസ് വടശ്ശേരി രാജൻ മാസ്റ്റർ സ്മാരക എൻഡോവ്മെൻ്റും ശാഖാ യോഗം നൽകുന്ന എൻഡോവ്മെൻറ് ഉത്സവാഘോഷ കമ്മിറ്റി ചെയർമാൻ പി.ടി.സജീവനും വിതരണം ചെയ്തു. ശാഖാ യോഗം സെക്രട്ടറി രാജേന്ദ്രപ്രസാദ്, കണിച്ചാർ ജുമാ മസ്ജിദ് ഖത്തീബ് നുഹ്മാൻ ഇർഫാനി, എൻ.വി.മായ, പ്രജിത്ത് പൊന്നോൻ, തങ്കമണി കുമാരൻ, അമ്പിളി സജീവൻ, രാമകൃഷ്ണൻ മുളയ്ക്കക്കുടി എന്നിവർ സംസാരിച്ചു.

കണിച്ചാർ: തേനീച്ചയുടെ കുത്തേറ്റ് ഗുരുതരമായി പരിക്കേറ്റ ഗൃഹനാഥൻ മരിച്ചു.ചെങ്ങോം റോഡിലെ കുന്നപ്പള്ളി ഗോപാലകൃഷ്‌ണനാണ് (69) മരിച്ചത്. കണ്ണൂരിലെ സ്വകാര്യ ആസ്പത്രിയിൽ ചികിത്സയിലിരിക്കെ ചൊവ്വാഴ്ച ഉച്ചയോടെയാണ് മരണം.തിങ്കളാഴ്ചയാണ് തേനീച്ചയുടെ കുത്തേറ്റത്. ഭാര്യ: സരസമ്മ. മക്കൾ: പ്രശാന്ത്, പ്രജോഷ്. മരുമകൾ: ശ്രുതി. സംസ്കാരം പിന്നീട്.

കണിച്ചാർ : കാട്ടാനകളും വന്യജീവികളും കുടിവെള്ളം മുട്ടിക്കുന്നുവെന്ന് ആരോപിച്ച് ആറളം ആദിവാസി സെറ്റിൽമെന്റ് മേഖലയിലെ ഇരുപതിൽ അധികം കുടുംബങ്ങൾ കേളകം, കണിച്ചാർ പഞ്ചായത്തുകളുടെ അതിരിലുള്ള ബാവലി പുഴയോരത്തേക്കു താമസം മാറ്റി. ഒഴിഞ്ഞ പുഴയോരത്തു കുടിൽ കെട്ടിയും ടെന്റുകൾ ഉണ്ടാക്കിയുമാണു താമസം. കാട്ടാനകളുടെയും മറ്റു വന്യജീവികളുടെയും ശല്യം കാരണം കുടിവെള്ളമെടുക്കാൻ പോലും ഫാമിലെ വീടുകളിൽനിന്നു പുറത്തിറങ്ങാൻ കഴിയാത്ത അവസ്ഥയാണെന്ന് ഇവർ പറയുന്നു. ഇപ്പോൾ വന്യജീവിശല്യമില്ലെന്നും കുടിവെള്ളം ലഭിക്കുന്നുണ്ടെന്നും ആദിവാസികൾ പറയുന്നു. ചിലർ കുടിൽ പോലും കെട്ടാതെയാണു പുഴയോരത്തു താമസിക്കുന്നത്.

മിക്കവരും ഫാമിൽ ഒരേക്കർ സ്ഥലവും വീടുമുള്ളവരാണ്. ചിലർ വളയംചാൽ കോളനിയിൽനിന്ന് എത്തിയവരാണ്. ഇവർ പുഴക്കരയിൽ താമസിക്കുന്നതിൽ ആരോഗ്യ വകുപ്പ് എതിർപ്പ് പ്രകടിപ്പിക്കുന്നുണ്ട്. ശുചിമുറി സൗകര്യമില്ലാത്തതിനാൽ പുഴയിലെ വെള്ളം മലിനമാകുന്നുവെന്നാണ് ആരോഗ്യ വകുപ്പ് പറയുന്നത്. ശുചിത്വം മുൻനിർത്തി നാട്ടുകാരും എതിർപ്പ് പ്രകടമാക്കിയിട്ടുണ്ട്. എല്ലാ വേനൽ കാലത്തും ഇവർ പുഴയോരത്ത് എത്താറുണ്ടെന്നും നാട്ടുകാർ പറയുന്നു. ഫാമിലുള്ള ഇവരുടെ വീടുകളിൽ വെള്ളമെത്തിക്കുന്നതിനു സർക്കാർ നടപടി സ്വീകരിക്കണമെന്ന് കേളകം പഞ്ചായത്തംഗം ജോണി പാമ്പാടിയിൽ ആവശ്യപ്പെട്ടു.