പേരാവൂർ : കേരളത്തിലെ മികച്ച കായിക താരത്തിനുള്ള മുപ്പത്തി ആറാമത് ജിമ്മി ജോർജ് ഫൗണ്ടേഷൻ അവാർഡിന് പ്രശസ്ത ട്രിപ്പിൾ ജമ്പ് താരം ഒളിമ്പ്യൻ അബ്ദുല്ല അബൂബക്കർ അർഹനായി . ഒരു ലക്ഷം രൂപയും ഫലകവുമടങ്ങുന്നതാണ് പുരസ്‌കാരം. ജോസ് ജോർജ് ചെയർമാനും , അഞ്ജു ബോബി ജോർജ്, റോബർട്ട് ബോബി ജോർജ്, സെബാസ്റ്റ്യൻ ജോർജ്, സ്റ്റാൻലി ജോർജ് എന്നിവർ അംഗങ്ങളുമായുള്ള കമ്മിറ്റി ആണ് ജേതാവിനെ തെരഞ്ഞെടുത്തത് .

ഇന്ത്യയുടെ വോളിബോൾ ഇതിഹാസം ജിമ്മി ജോർജിന്റെ സ്മരണയ്ക്കായി 1989-ൽ ആണ് ഫൗണ്ടേഷൻ അവാർഡ് ഏർപ്പെടുത്തിയത് . 2024 പാരീസ് ഒളിംപിക്സിൽ പങ്കെടുത്ത അബ്ദുല്ല 2022-ലെ കോമൺവെൽത്ത് ഗെയിംസിൽ വെള്ളിമെഡൽ കരസ്ഥമാക്കിയതോടെയാണ് അന്താരാഷ്‌ട്ര രംഗത്ത് ശ്രദ്ധയാകർഷിച്ചത് . 2023 ലെ ഏഷ്യൻ അത്ലറ്റിക്സ് ചാമ്പ്യൻഷിപ്പിൽ സ്വർണ്ണ മെഡൽ . 2022 & 2023 ൽ നടന്ന ലോക അത്‌ലറ്റിക്‌സ് ചാമ്പ്യൻഷിപ്പിലും 2023-ൽ നടന്ന ഏഷ്യൻ ഗെയിംസിലും പങ്കെടുത്തു . കഴിഞ്ഞ വർഷം ജപ്പാനിൽ നടന്ന അന്താരാഷ്ട്ര മീറ്റിൽ സ്വർണവും ഫ്രാൻസിൽ നടന്ന മീറ്റിൽ വെങ്കലവും കരസ്ഥമാക്കി.ഈ വർഷം നടന്ന ദേശീയ അത്ലറ്റിക്സ് ചാമ്പ്യൻഷിപ്പിലും ഓപ്പൺ ജമ്പ്സ് മത്സരത്തിലും സ്വർണ്ണം . മികച്ച ദൂരം 17.19 മീറ്റർ.പിതാവ് :അബൂബക്കർ. മാതാവ്: സാറ . കോഴിക്കോട് ജില്ലയിലെ വടകരയ്ക്കടുത്ത പുലിയാവ്‌ സ്വദേശി . ഇന്ത്യൻ എയർ ഫോഴ്‌സ് ഉദ്യോഗസ്ഥനാണ് .

കണ്ണൂർ : യുണൈറ്റഡ് മർച്ചന്റ്സ് ചേംബർ പേരാവൂർ യൂണിറ്റ് സംഘടിപ്പിക്കുന്ന രണ്ടാമത് പേരാവൂർ മിഡ്നൈറ്റ് മാരത്തൺ നവംബർ 23-ന് നടക്കും. രാത്രി 11-ന് പേരാവൂർ പഴയ ബസ്സ്റ്റാൻഡിൽ നിന്ന് ആരംഭിച്ച് ചെവിടിക്കുന്ന്, തൊണ്ടിയിൽ, തെറ്റുവഴിയിലൂടെ പഴയ ബസ് സ്റ്റാൻഡിൽ സമാപിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ഏഴ് കിലോമീറ്റർ മാരത്തണിൽ നാല് പേരടങ്ങുന്ന ടീമുകൾക്ക് മത്സരിക്കാം.

ആദ്യ മൂന്ന് സ്ഥാനങ്ങളിലെത്തുന്ന പുരുഷ, വനിതാ ടീമുകൾക്ക് യഥാക്രമം 15,000, 10,000, 5000 രൂപ വീതമാണ് കാഷ് പ്രൈസ്. ഓട്ടം പൂർത്തിയാക്കുന്നവർക്ക് മെഡലും സർട്ടിഫിക്കറ്റും നൽകും. 50 വയസ്സിന് മുകളിലുള്ള നാല് വനിതാ മത്സരാർഥികൾക്കും 60 വയസ്സിന് മുകളിലുള്ള നാല് മത്സരാർഥികൾക്കും പ്രോത്സാഹന സമ്മാനം നൽകും. നാലുമുതൽ 10 വരെ സ്ഥാനത്തെത്തുന്ന ടീം അംഗങ്ങൾക്കും പ്രോത്സാഹന സമ്മാനമുണ്ട്. ഒളിമ്പ്യൻ ടിന്റു ലൂക്കയാണ് ഇവൻ്റ് അംബാസഡർ. ആരോഗ്യമുള്ള തലമുറ, മാലിന്യമുക്ത കേരളം എന്ന ആശയം ഉയർത്തിപ്പിടിച്ചാണ് മാരത്തൺ സംഘടിപ്പിക്കുന്നത്. നാലുപേരടങ്ങുന്ന ടീമിന് 1200 രൂപയാണ് രജിസ്ട്രേഷൻ ഫീസ്. അല്ലാതെ മത്സരത്തിൽ പങ്കെടുക്കുന്ന ഒരാൾക്ക് 300 രൂപയാണ് രജിസ്ട്രേഷൻ ഫീസ്. രജിസ്ട്രേഷന് 9947537486, 9946532852.

പത്രസമ്മേളനത്തിൽ ചെയർമാൻ സൈമൺ മേച്ചേരി, യൂണിറ്റ് പ്രസിഡൻ്റ് ഷിനോജ് നരിതൂക്കിൽ, ജനറൽ സെക്രട്ടറി വി.കെ. രാധാകൃഷ്ണൻ, ഖജാൻജി നാസർ ബറാക്ക, യൂണിറ്റ് രക്ഷാധികാരി കെ.എം. ബഷീർ എന്നിവർ പങ്കെടുത്തു.

പേരാവൂർ: പല ക്രഷറുകളും പൂട്ടിയിട്ടതിനാൽ അനുദിനം കൂടുന്ന ക്രഷർ ഉത്പന്നങ്ങളുടെ വില സ്ഥിരപ്പെടുത്താൻ സർക്കാർ ഇടപെടണമെന്ന് കൺസ്ട്രക്ഷൻ വർക്കേഴ്‌സ് ആൻഡ് സൂപ്പർവൈസേഴ്‌സ് അസോസിയേഷൻ പേരാവൂർ മേഖലാ സമ്മേളനം ആവശ്യപ്പെട്ടു. വീടുകൾക്ക് നമ്പർ ലഭിക്കാൻ ഭീമമായ ലേബർ സെസ് കൂടി അടക്കണമെന്ന വ്യവസ്ഥ പുന:പരിശോധിക്കണമെന്നും സി.ഡബ്ല്യു.എസ്.എ ആവശ്യപ്പെട്ടു.സംസ്ഥാന കമ്മിറ്റിയംഗം കെ.വി.സതീശൻ ഉദ്ഘാടനം ചെയ്തു. മേഖലാ പ്രസിഡന്റ് കെ.ദിവാകരൻ അധ്യക്ഷനായി. കെ.ജെ.ഷാജൻ, എ.പ്രദീപൻ, യു.മധു, ഇ.ചന്ദ്രൻ, എം.വി.ഗംഗാധരൻ, പി.ഗിരീഷ് കുമാർ, പ്രവീൺ കുമാർ, കെ.കെ.ഷാജി, കെ.ജെ.റൈജു എന്നിവർ സംസാരിച്ചു.ഭാരവാഹികൾ: കെ.ജെ.ഷാജൻ (പ്രസി.), പി.സന്തോഷ്, ശ്രീനി (വൈസ്.പ്രസി.), എ.പ്രദീപൻ (സെക്ര.), ഷിജൊ ജേക്കബ്, സി.പ്രകാശൻ (ജോ.സെക്ര.), കെ.ജെ.ഷാജി (ഖജാ.).