കോളയാട് : കണ്ണവം വനത്തിനകത്ത് പെരുവയിലെ ജനവാസ മേഖലയിൽ പുലിയുടേതെന്ന് സംശയിക്കുന്ന കാൽപ്പാടും പന്നിയുടെ ജഡവും കണ്ടെത്തി. പാലയത്തുവയൽ സ്കൂളിനു സമീപം കിഴക്കേച്ചാൽ ഭാഗത്താണിത്. ഇന്നലെ പുലിയുടെ കാൽപ്പാടുകൾ കണ്ടെത്തിയതിനെ തുടർന്ന് നടത്തിയ പരിശോധനയിലാണ് കാട്ടുപന്നിയുടെ ജഡം കണ്ടെത്തിയത്. ജഡത്തിന്റെ കുറച്ചു ഭാഗം ഭക്ഷിച്ച നിലയിലാണ്.

കായലോടൻ ഗോപിയുടെ വീട്ടിൽ നിന്ന് 50 മീറ്റർ അകലെയാണു കാൽപ്പാടുകളും ജഡവും കണ്ടത്തെിയത്. കനത്ത ജാഗ്രതയിലാണു ജനങ്ങളും സ്കൂൾ അധികൃതരും. കണ്ണവം ഫോറസ്റ്റ് ഡപ്യൂട്ടി റേഞ്ച് ഓഫിസർ ജിജിലിന്റെ നേതൃത്വത്തിൽ കണ്ണവം, നെടുംപൊയിൽ സെക്‌ഷനുകളിലെ വനപാലക സംഘം സ്ഥലത്തെത്തി.

കോളയാട് പഞ്ചായത്തംഗം റോയ് പൗലോസ്, സ്കൂൾ പ്രഥമാധ്യാപകൻ എ.ചന്ദ്രൻ എന്നിവരും സ്ഥലത്തെത്തി.സ്ഥലത്ത് ക്യാമറ സ്ഥാപിക്കുമെന്നും ‌പട്രോളിങ് ശക്തമാക്കിയതായും കണ്ണവം റേഞ്ച് ഫോറസ്റ്റ് ഓഫിസർ അറിയിച്ചു.റേഞ്ച് ഫോറസ്റ്റ് ഓഫിസർ സുധീർ നേരോത്ത്, ബീറ്റ് ഫോറസ്റ്റ് ഓഫിസർമാരായ ജയേഷ്, വിജിഷ, ഗിനിൽ, ബിജേഷ്, ബിജു, വാച്ചർമാർ എന്നിവർ സ്ഥലത്ത് ക്യാംപ് ചെയ്യുകയാണ്.

കോളയാട്: കണ്ണവം ജനമൈത്രി പോലീസും സീനിയർ സിറ്റിസൺസ് ഫ്രണ്ട്‌സ് വെൽഫയർ അസോസിയേഷനും കോളയാട് പഞ്ചായത്ത് ഓഡിറ്റോറിയത്തിൽ സൈബർ തട്ടിപ്പുകളുടെ ചതിക്കുഴികളെ കുറിച്ച് ബോധവത്കരണ ക്ലാസ് നടത്തി. കണ്ണവം സ്റ്റേഷൻ ഹൗസ് ഓഫീസർ കെ.വി. ഉമേഷ് ഉദ്ഘാടനം ചെയ്തു. കെ.കുഞ്ഞിരാമൻ അധ്യക്ഷനായി.വാർഡ് മെമ്പർ ശ്രീജ പ്രദീപൻ, പി. രവി, കെ.വി.ബാലൻ, ജനമൈത്രി പോലീസുകാരായ സത്യൻ, വിശ്വംഭരൻ എന്നിവർ സംസാരിച്ചു.

കോളയാട് : പഞ്ചായത്തിൽ വാർഡ് വിഭജനത്തിൽ അശാസ്ത്രീയത ആരോപിച്ച് യു.ഡി.എഫ് രംഗത്ത്. സി.പി.എം നിർദ്ദേശാനുസരണമാണ് വാർഡ് വിഭജനം നടത്തിയതെന്ന് യു.ഡി.എഫ് പഞ്ചായത്ത് കമ്മിറ്റി കുറ്റപ്പെടുത്തി. പുതിയ വാർഡായ ചങ്ങലഗേറ്റ് പത്ത് കിലോമീറ്ററോളം വിസ്തൃതവും വോട്ടർമാർക്ക് തീർത്തും ബുദ്ധിമുട്ടുണ്ടാക്കുന്നതുമാണ്.

യു.ഡി.എഫ് സ്ഥിരമായി വിജയിക്കുന്ന വാർഡുകളിലൊക്കെ പ്രകൃതിദത്തമായ അതിരുകൾ പരിഗണിക്കാതെ സാങ്കൽപ്പിക അതിരുകളിട്ടാണ് വിഭജനം നടത്തിയത്. വാർഡ് വിഭജനത്തിലെ പക്ഷപാതത്തിനെതിരെ നിയമനടപടികൾ സ്വീകരിക്കും.

കെ.എം.രാജൻ അധ്യക്ഷത വഹിച്ചു. സാജൻ ചെറിയാൻ , എം.ജെ.പാപ്പച്ചൻ , കെ.വി.ജോസഫ് , റോയ് പൗലോസ് , അന്ന ജോളി , അഷ്‌റഫ് തവരക്കാടൻ , ജോർജ് കാനാട്ട് , വിൻസി കട്ടക്കയം , ബിജു കാപ്പാടൻ എന്നിവർ സംസാരിച്ചു.