എറണാകുളം : കോലഞ്ചേരി ശാസ്താംമുകളിൽ നിർമാണം നടക്കുന്ന കാനയിലേക്ക് വാഹനം മറിഞ്ഞ് റിട്ട. അധ്യാപിക മരിച്ചു. മാമല തുരുത്തിയിൽ ബീന (60) ആണ് മരിച്ചത്. മൂന്നു പേർക്ക് പരിക്കേറ്റു. പരിക്കേറ്റവരെ എറണാകുളം മെഡിക്കൽ ട്രസ്റ്റ് ആസ്പത്രിയിൽ പ്രവേശിപ്പിച്ചു.

ബീനയുടെ ഭർത്താവ് സാജു, ബന്ധു ബിജു, ഭാര്യ സൂസൻ എന്നിവർക്കാണ് പരിക്കേറ്റത്. അപകടത്തിൽ പരിക്കേറ്റ ബിജുവും സൂസനും നടൻ മാത്യുവിൻറെ മാതാപിതാക്കളാണ്. മാത്യുവിൻറെ സഹോദരനാണ് വാഹനമോടിച്ചിരുന്നത്. ഇന്ന് പുലർച്ചെ ഒരു മണിയോടെയായിരുന്നു അപകടം. മരണാന്തര ചടങ്ങിൽ പങ്കെടുത്ത ശേഷം മടങ്ങവെയാണ് വാഹനം അപകടത്തിൽപ്പെട്ടത്.

തൃപ്പൂണിത്തുറ : എരൂരിൽ കിടപ്പുരോഗിയായ അച്ഛനെ വാടകവീട്ടിൽ ഉപേക്ഷിച്ച് കടന്ന മകൻ അറസ്റ്റിൽ. 75 വയസ്സുള്ള ഷൺമുഖനെ ഉപേക്ഷിച്ച്‌ കടന്നതിന് മകൻ അജിത്തിനെയാണ് അറസ്റ്റ് ചെയ്തത്. തൃപ്പൂണിത്തുറ പൊലീസ് സ്റ്റേഷനിൽ ഹാജരായപ്പോഴാണ് അറസ്റ്റ് രേഖപ്പെടുത്തിയത്. ഐ.പി.സി 308ാം വകുപ്പ് പ്രകാരമാണ് അജിത്തിനെതിരെ കേസെടുത്തത്. സംഭവത്തിൽ അജിത്തിനെതിരെ പൊലീസും മനുഷ്യാവകാശ കമീഷനും കേസെടുത്തിരുന്നു. മാതാപിതാക്കളുടെയും മുതിർന്ന പൗരന്മാരുടെയും സംരക്ഷണ നിയമപ്രകാരമായിരുന്നു ആദ്യം കേസ് എടുത്തത്.

കഴിഞ്ഞ വെള്ളി രാത്രിയാണ് ഷൺമുഖനെ ഉപേക്ഷിച്ച് മകനും കുടുംബവും പോയതായി പരിസരവാസികൾ മനസ്സിലാക്കിയത്‌. ഇക്കാര്യം വീട്ടുടമയെ അറിയിച്ചു. ഒരു ദിവസം മുഴുവൻ ഭക്ഷണം കഴിക്കാതെയും പ്രാഥമിക കർമങ്ങൾ നിർവഹിക്കാനാകാതെയും ഷൺമുഖൻ വീട്ടിൽ കഴിയുകയായിരുന്നു. വീട്ടിൽനിന്ന്‌ സാധനങ്ങളെല്ലാം മാറ്റിയിരുന്നു.

നെടുങ്കണ്ടം സ്വദേശിയായ അജിത് ഡ്രൈവറാണ്‌. ഒരുവർഷമായി എരൂരിലെ വാടകവീട്ടിൽ താമസിക്കുകയായിരുന്നു. മൂന്നുമാസമായി വാടക നൽകിയിരുന്നില്ല. വീട്‌ ഒഴിയാൻ ഉടമ ആവശ്യപ്പെട്ടിരുന്നു. അജിത്തിനെ കൂടാതെ ഷൺമുഖന് രണ്ട്‌ പെൺമക്കൾ കൂടിയുണ്ട്. അച്ഛന്റെ ചികിത്സാ ചെലവുമായി ബന്ധപ്പെട്ട് മക്കൾ തമ്മിൽ അഭിപ്രായ വ്യത്യാസം ഉണ്ടായിരുന്നതായി പൊലീസ്‌ പറഞ്ഞു. അച്ഛനെ കാണാൻ സമ്മതിക്കുന്നില്ലെന്ന്‌ പെൺമക്കൾ പൊലീസിൽ പരാതിയും ഹൈക്കോടതിയിൽ ഹേബിയസ്‌ കോർപ്പസും ഫയൽ ചെയ്‌തിരുന്നു. നിരന്തരം പ്രശ്‌നങ്ങൾ നടക്കുന്നതിനാൽ പൊലീസ്‌ പലതവണ അജിത്തിനെ സ്‌റ്റേഷനിൽ വിളിച്ചുവരുത്തി താക്കീത്‌ നൽകിയിരുന്നു.

ഡ്രൈവിങ് ടെസ്റ്റ് പരിഷ്കാരത്തിനെതിരായ ഡ്രൈവിങ് സ്‌കൂളുകളുടെ സമരം ഒത്തുതീർപ്പാക്കി. സമരം പിൻവലിച്ചു. ​ഗതാ​ഗത മന്ത്രിയുമായ നടന്ന ചർച്ചകൾക്ക് ശേഷമാണ് സമരം പിൻവലിക്കാൻ തീരുമാനമായത്. സർക്കുലർ പിൻവലിക്കില്ലെന്ന് ​ഗതാ​ഗത മന്ത്രി കെ.ബി ​ഗണേഷ് കുമാർ വ്യക്തമാക്കി. ചിലമാറ്റങ്ങൾ വരുത്തുമെന്ന് മന്ത്രി അറിയിച്ചു.

സർക്കുലറിൽ ഇളവ് വരുത്തുമെന്ന് മന്ത്രി ​ഗണേഷ് കുമാർ പറഞ്ഞു. ടെസ്റ്റ് വാഹനങ്ങളുടെ പഴക്കം 15 വർഷത്തിൽ നിന്ന് 18 വർഷമാക്കി ഉയർത്താൻ തീരുമാനിച്ചു. എച്ച് എടുത്ത ശേഷം മാത്രം റോഡ് ടെസ്റ്റ്, ഓരോ ഉദ്യോ​ഗസ്ഥനും 40 ടെസ്റ്റ് നടത്തണം. രണ്ടുവശത്തും ക്ലച്ചും ബ്രേക്കും വരുന്ന വാഹനങ്ങൾ തുടർന്നും ഉപയോഗിക്കാം. ടെസ്റ്റ് നടത്തുമ്പോൾ ക്യാമറ വേണമെന്ന നിബന്ധനയും ചർച്ചയിൽ അംഗീകരിച്ചു.

ഡ്രൈവിംഗ് സ്കൂൾ പരിശീലന ഫീസ് ഏകോപിപ്പിക്കാനും തീരുമാനിച്ചു. ഇത് പഠിക്കാൻ പുതിയ കമ്മീഷനെ നിയോഗിക്കും. 15 ദിവസമായി ഡ്രൈവിങ് സ്കൂൾ സംഘടനകൾ സമരത്തിലായിരുന്നു. സമരത്തെത്തുടർന്ന് ഡ്രൈവിങ് ലൈസൻസിനായുള്ള ലേണേഴ്സ് ടെസ്റ്റും ഗ്രൗണ്ട് ടെസ്റ്റും ദിവസങ്ങളായി മുടങ്ങിയിരുന്നു.