വൈകിയെത്തിയ മഞ്ഞുകാലം: തണുത്തുറഞ്ഞ് മൂന്നാർ; സീസണിൽ ആദ്യമായി പൂജ്യത്തിന് താഴെ
മൂന്നാര്‍: അതിശൈത്യത്തിനെ പിടിയിലായി മൂന്നാർ. ഈ സീസണിൽ ആദ്യമായി ഇന്നു പുലർച്ചെ താപനില പൂജ്യത്തിനു താഴെയെത്തി. ഗുണ്ടുമല, കടുകുമുടി, ദേവികുളം മേഖലയിലാണ് ഏറ്റവും കൂടുതൽ തണുപ്പ് രേഖപ്പെടുത്തിയത്.
താപനില പൂജ്യത്തിനു താഴെയെത്തിയതോടെ പുൽമേടുകളിൽ വെള്ളം തണുത്തുറഞ്ഞ നിലയിലായിരുന്നു. മൂന്നാറില്‍ സാധാരണയായി ഡിസംബര്‍ അവസാനമോ ജനുവരി ആദ്യമോ ആണ് അതിശൈത്യമെത്തുന്നത്. എന്നാൽ ഈ വർഷം കാലാവസ്ഥാ വ്യതിയാനം മൂലം ജനുവരി വരെ മഴ ലഭിച്ചു. ഇത്തവണ വൈകിയെങ്കിലും സഞ്ചാരികൾ കാത്തിരുന്ന കാലാവസ്ഥയെത്തി.
ചെണ്ടുവര, തെന്മല, ലക്ഷ്മി, ചിറ്റുവര, എല്ലപ്പെട്ടി, ചൊക്കനാട് എന്നിവിടങ്ങളില്‍ ഞായറാഴ്ച പുലർച്ചെ രണ്ടു ഡിഗ്രി സെല്‍ഷ്യസ് വരെ താപനില താഴ്ന്നിരുന്നു. മൂന്നാര്‍ ടൗണ്‍, നല്ലതണ്ണി, നടയാര്‍ എന്നിവിടങ്ങളില്‍ നാലു ഡിഗ്രി സെല്‍ഷ്യസും രേഖപ്പെടുത്തി.
