ട്രെയിനിൽ കയറുന്നതിനിടെ വീണ്‌ നഴ്‌സിന്റെ കാൽപാദം അറ്റു
തലശേരി : ട്രെയിനിൽ കയറുന്നതിനിടെ വീണ്‌ സ്‌ത്രീയുടെ കാൽപാദം അറ്റു. പയ്യാവൂർ ഉളിക്കൽ കരപ്ലാക്കിൽ ഹൗസിൽ മിനി ജോസഫിന്റെ (47) ഇടതു കാൽപാദമാണ്‌ അറ്റുപോയത്‌.
തലശേരി സ്‌റ്റേഷനിൽ നിന്ന്‌ ട്രെയിൻ നീങ്ങുന്നതിനിടെ കമ്പാർട്ട്‌മെന്റ്‌ മാറി കയറുമ്പോൾ ബുധൻ രാവിലെ 7.15നാണ്‌ അപകടം.
മുംബൈ–-തിരുവനന്തപുരം നേത്രാവതി എക്‌സ്‌പ്രസിൽ കയറുന്നതിടെയാണ് അപകടമുണ്ടായത്. തീവണ്ടിക്കും പ്ലാറ്റ്‌ഫോമിനും ഇടയിലാണ്‌ കാൽ കുടുങ്ങിയത്‌.
ജോലി ചെയ്യുന്ന തിരൂരിലെ ആസ്പത്രിയിലേക്ക്‌ പോവുകയായിരുന്നു. ഭർത്താവും മകളും ഒപ്പമുണ്ടായിരുന്നു.
തലശേരി ജനറൽ ആസ്പത്രിയിൽ പ്രഥമ ശുശ്രൂഷ നൽകിയശേഷം കോഴിക്കോട്‌ മെഡിക്കൽ കോളേജിലേക്ക്‌ വിദഗ്ധ ചികിത്സയ്‌ക്കായി കൊണ്ടുപോയിരിക്കുകയാണ്.
