കൂത്തുപറമ്പ് : ഇടനിലക്കാരില്ലാതെ കർഷകരുടെ ഉൽപന്നങ്ങൾ നേരിട്ട് ഉപഭോക്താക്കൾക്ക് എത്തിക്കുന്നതിന് വേണ്ടി കൂത്തുപറമ്പിൽ ആഴ്ചച്ചന്ത ആരംഭിച്ചു.

നഗരസഭയുടെയും കൃഷിഭവന്റെയും ആഭിമുഖ്യത്തിൽ കൃഷിഭവൻ പരിസരത്ത് ഒരുക്കിയ ചന്ത നഗരസഭാധ്യക്ഷ വി.സുജാത ഉദ്ഘാടനം ചെയ്തു. നാടൻ ജൈവ പച്ചക്കറികളും പഴങ്ങളും ലഭ്യമാക്കുന്നതിന്റെ ഭാഗമായാണ് കൂത്തുപറമ്പിൽ ആഴ്ച ചന്ത ഒരുക്കിയത്.

എല്ലാ ബുധനാഴ്ചയും രാവിലെ മുതൽ കൃഷിഭവൻ പരിസരത്ത് ചന്ത നടക്കും. നഗരസഭ പരിധിയിലെ കർഷകർക്ക് അവർ ഉൽപാദിപ്പിക്കുന്ന പഴം, പച്ചക്കറികൾ, തേൻ, മറ്റ് മൂല്യ വർധിത ഉൽപന്നങ്ങൾ തുടങ്ങിയവ ആഴ്ചച്ചന്തയിലൂടെ വിപണനം നടത്താൻ കഴിയും.

ഉൽപന്നങ്ങൾക്ക് മതിയായ വില ലഭിക്കുന്നതിന് കർഷകർക്ക് ഈ സംവിധാനം സഹായകമാകും. നഗരസഭ കൗൺസിലർ എം.എൻ.അബ്ദുറഹിമാന് കിറ്റ് നൽകിയായിരുന്നു ഉദ്ഘാടനം. സ്ഥിരം സമിതി അധ്യക്ഷ ലിജി സജേഷ് അധ്യക്ഷത വഹിച്ചു.