പിണറായി: കാർഷിക മേഖലയിൽ അഞ്ചുലക്ഷം തൊഴിലവസരങ്ങൾ സൃഷ്ടിക്കുമെന്ന് മുഖ്യമന്ത്രി പിണറായി വിജയൻ പറഞ്ഞു. പിണറായിയിൽ കൃഷിദർശൻ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കാർഷിക വിളകളെ മൂല്യവർധിത ഉൽപ്പന്നങ്ങളാക്കി വിപണനം ചെയ്ത് മുന്നേറ്റം ഉണ്ടാക്കും. ഓരോ കൃഷിഭവനും അവിടെ ഉൽപ്പാദിപ്പിക്കുന്ന ഉൽപ്പന്നം കണ്ടെത്തി പ്രോത്സാഹിപ്പിക്കണമെന്നും ഒരു പഞ്ചായത്തിൽ ഒരു കാർഷിക വിപണി ഉണ്ടാവണമെന്നും മുഖ്യമന്ത്രി പറഞ്ഞു.

തലശേരി ബ്ലോക്കിനെ പൂർണമായും തരിശുരഹിത ബ്ലോക്കാക്കി മാറ്റാനുള്ള പ്രവർത്തനങ്ങൾ നടത്തണം. കൃഷിക്കൂട്ടങ്ങൾക്കൊപ്പം ഓരോ ബ്ലോക്കിലും കാർഷിക കർമസേന രൂപീകരിക്കും. തലശേരി ബ്ലോക്കിൽ നാലുവർഷത്തിനകം മൂന്നുകോടിരൂപയുടെ നിക്ഷേപ സമാഹരണം നടത്തുമെന്നും മുഖ്യമന്ത്രി പറഞ്ഞു. കൃഷി മന്ത്രി പി പ്രസാദ് അധ്യക്ഷനായി. അഞ്ചരക്കണ്ടി പുഴയെ പുനരുജ്ജീവിപ്പിക്കാൻ കൃഷിവകുപ്പ് ജില്ലാ പഞ്ചായത്തുമായി ചേർന്ന് പ്രവൃത്തിക്കുമെന്നും ഇതിനായി ജലസേചന മന്ത്രിയുമായി സംയുക്തയോഗം ചേരുമെന്നും മന്ത്രി പറഞ്ഞു.

വന്യജീവി ആക്രമണത്തിനിരയാകുന്ന കർഷകർക്ക് തദ്ദേശ സ്ഥാപനങ്ങളുമായി ചേർന്ന് ആർകെവിവൈ പദ്ധതിയിൽ ഉൾപ്പെടുത്തി സൗരോർജ വേലി പദ്ധതി നടപ്പാക്കാൻ കൃഷിവകുപ്പ് സഹായം നൽകുമെന്ന് മന്ത്രി പറഞ്ഞു. പന്നിശല്യം രൂക്ഷമായ ഇടങ്ങളിൽ അവയെ വെടിവച്ച് കൊല്ലാനുള്ള നടപടി സ്വീകരിക്കാൻ നിർദേശം നൽകി.
വന്യമൃഗശല്യം ഇല്ലാതാക്കാൻ തലശേരി ബ്ലോക്കിന് 6.875 ലക്ഷം രൂപയുടെ പാക്കേജ്‌ പ്രഖ്യാപിച്ചു. ഒരുലക്ഷം തൊഴിൽദാന പദ്ധതിയിൽ കുടിശ്ശിക ഉണ്ടായ 72 പേരുടെ പെൻഷൻ തുകയും ഗ്രാറ്റ്വിവിറ്റിയും അനുവദിച്ചു.

ആഫ്രിക്കൻ ഒച്ചിന്റെ ശല്യമുള്ള കൃഷിയിടങ്ങളിൽ കൃഷി വിജ്ഞാൻ കേന്ദ്രത്തിന്റെ സഹായത്തോടെ ബോധവൽക്കരണത്തിനും നിയന്ത്രണ മാർഗങ്ങൾക്കുമായി പ്രത്യേക പദ്ധതി നടപ്പാക്കും. മുഖ്യമന്ത്രിയുടെ മണ്ഡലം പ്രതിനിധി പി ബാലനെ ചടങ്ങിൽ മന്ത്രി പി പ്രസാദ് ആദരിച്ചു.കൃഷിദർശന്റെ ഭാഗമായുള്ള അവാർഡുകളുടെ വിതരണവും കൃഷിമന്ത്രി നിർവഹിച്ചു.

രാമചന്ദ്രൻ കടന്നപ്പള്ളി എം.എൽ.എ, ജില്ലാ പഞ്ചായത്ത്‌ പ്രസിഡന്റ്‌ പി .പി.ദിവ്യ, സി .പി .അനിത, കെ .കെ രാജീവൻ, പി ബാലൻ, കലക്ടർ എസ് ചന്ദ്രശേഖർ, കാർഷിക സർവകലാശാല എക്സ്റ്റൻഷൻ ഡയറക്ടർ ജേക്കബ് ജോൺ, കൃഷി സെക്രട്ടറി ഡോ. ബി അശോക്, കൃഷി ഡയറക്ടറുടെ ചുമതല വഹിക്കുന്ന ജോർജ് അലക്സാണ്ടർ എന്നിവർ സംസാരിച്ചു.