കോൺഗ്രസിനെ ഖാർഗെ നയിക്കും, കരുത്തുകാട്ടി തരൂർ
ന്യൂഡൽഹി: മല്ലികാർജുൻ ഖാർഗെ കോൺഗ്രസ് അദ്ധ്യക്ഷൻ. എണ്ണായിരത്തിനടുത്ത് വോട്ടുകൾ നേടിയാണ് ഖാർഗെയുടെ വിജയം. 1072 വോട്ടുകളാണ് എതിർ സ്ഥാനാർത്ഥിയായ ശശി തരൂർ നേടിയതെന്നാണ് പുറത്തുവരുന്ന റിപ്പോർട്ടുകൾ. ഔദ്യോഗിക പ്രഖ്യാപനം വന്നിട്ടില്ല.ഒന്നിച്ച് മുന്നേറാമെന്നാണ് പത്ത് ശതമാനത്തിലധികം വോട്ടുനേടിയ തരൂരിന്റെ പ്രതികരണം. 68 ബാലറ്റ് പെട്ടികളിലെ 9,497 വോട്ടുകളാണ് എണ്ണിയത്.
ആകെ 9915 വോട്ടർമാരായിരുന്നു ഉണ്ടായിരുന്നത്. രണ്ട് പതിറ്റാണ്ടിന് ശേഷമാണ് കോൺഗ്രസിന് നെഹ്റു – ഗാന്ധി കുടുംബത്തിന് പുറത്തുനിന്നുള്ള അദ്ധ്യക്ഷൻ വരുന്നത്.വോട്ടെണ്ണൽ പുരോഗമിക്കുന്നതിനിടെ തിരഞ്ഞെടുപ്പിൽ ക്രമക്കേട് നടന്നതായി ശശി തരൂർ ആരോപിച്ചിരുന്നു. ഉത്തർപ്രദേശിലെ തിരഞ്ഞെടുപ്പ് പ്രക്രിയയിൽ ക്രമക്കേടുണ്ടെന്നായിരുന്നു ആരോപണം. അതേസമയം, കോൺഗ്രസിൽ ഇനി തീരുമാനങ്ങൾ പുതിയ അദ്ധ്യക്ഷന്റേതാണെന്ന് രാഹുൽ ഗാന്ധി പ്രതികരിച്ചു.
പാർട്ടിയിലെ തന്റെ സ്ഥാനം ഖാർഗേ ജി തീരുമാനിക്കുമെന്നും അദ്ദേഹം കൂട്ടിച്ചേർത്തു.കർണാടകയിൽ നിന്നുള്ള മുതിർന്ന നേതാവാണ് ഖാർഗെ. കോൺഗ്രസ് അദ്ധ്യക്ഷ സ്ഥാനത്തേക്ക് മത്സരിക്കുന്നതിന് മുൻപ് അദ്ദേഹം രാജ്യസഭാ പ്രതിപക്ഷ നേതാവ് സ്ഥാനം രാജിവച്ചിരുന്നു.
