കണിച്ചാർ:കണിച്ചാർ ഗ്രാമപഞ്ചായത്തും ആരോഗ്യ വകുപ്പും സംയുക്തമായി ആഹ്വാനം ചെയ്ത കുടുംബ ഹർത്താൽ ഞായറാഴ്ച നടക്കും.രാവിലെ പത്ത് മണി മുതൽ ഉച്ചക്ക് 12 മണി വരെയാണ് പഞ്ചായത്തിലെ മുഴുവൻ വീടുകളും അടച്ചിട്ടിട്ട് കുടുംബ ഹർത്താൽ നടത്തുക.മഴക്കാലപൂർവ രോഗ പ്രതിരോധ പ്രവർത്തന ത്തിന്റെ ഭാഗമായാണ് വ്യത്യസ്തമായ ഈ ഹർത്താൽ നടത്തുന്നത്. 10 മണി മുതൽ 12 മണി വരെ വീട്ടുകാർ പുറത്തിറങ്ങി പരിസരങ്ങൾ വൃത്തിയാക്കണം. മാലിന്യങ്ങൾ ശേഖരിച്ച് ഹരിത കർമ്മ സേനയക്ക് കൈമാറണം. ഹർത്താൽ പ്രവർത്തനങ്ങൾ നിരീക്ഷിക്കുവാൻ ആശ പ്രവർത്തകരെയും ആരോഗ്യ പ്രവർത്തകരെയും ചുമതലപ്പെടുത്തിയിട്ടുണ്ട്. ഹർത്താലിനോട് സഹകരിക്കാത്ത വീടുകാരുടെ പേരുവിവരങ്ങൾശേഖരിക്കുവാനും പ്രത്യേകം നിർദ്ദേശം നൽകിയിട്ടുണ്ട്.

കുടുംബ ഹർത്താലിന്റെ വിജയത്തിനായുള്ള വാഹന വിളംബര ജാഥ കണിച്ചാർ ടൗണിൽ ഹരിത കേരളം മിഷൻ ജില്ലാ കോർഡിനേറ്റർ ഇ.സോമശേഖരൻ ഉദ്ഘാടനം ചെയ്തു.പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ അധ്യക്ഷത വഹിച്ചു.പഞ്ചായത്ത് സെക്രട്ടറി എൻ.പ്രദീപൻ ,പഞ്ചായത്ത് മെമ്പർമാരായ ഷാന്റി തോമസ്, തോമസ് വടശ്ശേരി, ജോജൻ എടത്താഴെ ,സുരേഖ സജി, ഷാജറ്റ് ചന്ദ്രൻ കുന്നേൽ, സുനി ജസ്റ്റിൻ എന്നിവർ ആശംസകൾ നേർന്നു. ആശ പ്രവർത്തകരും ‘ഹരിത കർമ്മ സേനാംഗങ്ങളും, ജൂനിയർ ഹെല്ത്ത് ഇൻസ്‌പെക്ടർമാരായ പി.ഷൈനേഷ്, എം .സന്തോഷ് കുമാർ, ജെ.പി.എച്ച്.എൻ.സീന എന്നിവരും പങ്കെടുത്തു.

വീടുകളിൽ നിന്നുള്ള ചെറിയ വെള്ളക്കെട്ടിൽ നിന്നാണ് മുഴുവൻ കൊതുക് ജന്യ രോഗങ്ങളും ഉണ്ടാകുന്നതെന്ന ബോധ്യത്തിന്റെ അടിസ്ഥാനത്തിലാണ് വ്യത്യസ്തമായ ഈ ഹർത്താലിന് ആഹ്വാനം നൽകിയതെന്ന് പദ്ധതി വിശദീകരിച്ചു കൊണ്ട് ഈ പരിപാടിക്ക് നേതൃത്വം നൽകുന്ന കണിച്ചാർ പ്രാഥമിക ആരോഗ്യ കേന്ദ്രം ഹെല്ത്ത് ഇൻസ്‌പെക്ടർ .ഇ .ജെ .അഗസ്റ്റിൻ അറിയിച്ചു.