ബാധയൊഴിപ്പിക്കൽ: ട്രാൻസ്‌വുമണിന്റെ കൈയിൽ കർപ്പൂരം കത്തിച്ച് പൊള്ളിച്ചു
കൊച്ചി: ഇടപ്പള്ളിയില്‍ ട്രാന്‍സ്‌ജെന്‍ഡര്‍ യുവതിയെ മറ്റൊരു ട്രാന്‍സ്‌ജെന്‍ഡര്‍ യുവതി പൊള്ളലേല്‍പ്പിച്ചതായി പരാതി. മഹാരാജാസ് കോളേജിലെ ഒന്നാംവര്‍ഷ ബിരുദ വിദ്യാര്‍ഥി അഹല്യ കൃഷ്ണയാണ് ഒപ്പം താമസിച്ചിരുന്ന അര്‍പ്പിതയ്‌ക്കെതിരേ പരാതിയുമായി പോലീസിനെ സമീപിച്ചിരിക്കുന്നത്. കഴിഞ്ഞ ഡിസംബറില്‍ അര്‍പ്പിത ബലമായി കൈയില്‍ കര്‍പ്പൂരം കത്തിച്ച് പൊള്ളലേല്‍പ്പിച്ചെന്നാണ് അഹല്യയുടെ പരാതി.
സംഭവത്തില്‍ ഏപ്രില്‍ രണ്ടാം തീയതിയാണ് അഹല്യ തൃക്കാക്കര പോലീസില്‍ പരാതി നല്‍കിയത്. ഭയന്നിട്ടാണ് ഇത്രയുംനാള്‍ പരാതി നല്‍കാന്‍ വൈകിയതെന്നാണ് ഇവരുടെ വിശദീകരണം.
ഭയന്നിട്ടാണ് പരാതി നല്‍കാന്‍ വൈകിയത്. അവരുടെ കൂടെയായിരുന്നു എന്റെ താമസം. ഞാന്‍ പരാതി നല്‍കിയാല്‍ കൂട്ടത്തിലുള്ളവര്‍ ഒറ്റപ്പെടുത്തുമെന്ന ഭയവും ഉണ്ടായിരുന്നു. അവരുടെ അടുത്തുനിന്ന് താമസം മാറി. തുടര്‍ന്ന് ട്രാന്‍സ് കമ്മ്യൂണിറ്റിയിലുള്ളവരോട് വിവരം പറഞ്ഞു. അവരെല്ലാം ഒപ്പം നില്‍ക്കാമെന്ന് പറഞ്ഞു. അങ്ങനെയാണ് പരാതി നല്‍കിയത്. ഇപ്പോഴും ഭയമുണ്ടെന്നും അഹല്യ പ്രതികരിച്ചു.
