തിരുവനന്തപുരം : സംസ്ഥാനത്തെ പൊതു വിദ്യാലയങ്ങളുടെ ഗുണനിലവാരം വ്യക്തമാക്കുന്ന ഗ്രേഡിങ് സമ്പ്രദായം നടപ്പാക്കുമെന്ന് മന്ത്രി വി.ശിവൻകുട്ടി. ഗ്രേഡിങ്ങിനുള്ള മാനദണ്ഡങ്ങൾ എസ്‌.സി.ഇ.ആർ.ടി നിർണയിക്കുമെന്നും അധ്യാപക സംഘടനകളുടെ യോഗത്തിൽ അദ്ദേഹം അറിയിച്ചു.

‘അവധിക്കാലത്ത് വിദ്യാർഥികൾക്കായി മിനി കലോത്സവം നടത്തുന്നത് സർക്കാർ പരിഗണനയിലാണ്. പ്രീ-പ്രൈമറി അധ്യാപകരുടെ 3 മാസത്തെ ഓണറേറിയം കുടിശിക എത്രയും വേഗം കൊടുത്തു തീർക്കാൻ ധനവകുപ്പുമായി ചർച്ച നടത്തിക്കഴിഞ്ഞു. വിദ്യാഭ്യാസ വകുപ്പിൽ കെട്ടിക്കിടക്കുന്ന ഫയലുകൾ തീർപ്പാക്കി പ്രശ്നങ്ങൾ പരിഹരിക്കാൻ അദാലത്തുകൾ തുടരും. ഫയലുകൾ അനാവശ്യമായി പിടിച്ചുവച്ചിരിക്കുന്ന ഉദ്യോഗസ്ഥർക്കെതിരെ നടപടിയുണ്ടാകും. ഇതിനായി വിജിലൻസ് ഇടപെടലും ശക്തമാക്കും. 

ഹയർ സെക്കൻഡറി പ്രിൻസിപ്പൽമാരുടെ ജോലി ഭാരം കുറയ്ക്കാൻ സർക്കാർ ഉത്തരവിട്ട നടപടികൾ അടുത്ത അധ്യയന വർഷം നടപ്പാക്കും. പ്രിൻസിപ്പൽമാർ‌ പഠിപ്പിക്കേണ്ട പീരിയഡുകളുടെ എണ്ണം കുറയ്ക്കുന്നതിനുള്ള നടപടിയാകും സ്വീകരിക്കുക. സ്കൂൾ പി.ടി.എ.കളുടെ പ്രവർത്തനത്തിന് ഏകീകൃത രൂപം നൽകും’– മന്ത്രി അറിയിച്ചു.

ഹയർ സെക്കൻഡറി മൂല്യനിർണയ ക്യാംപിൽ ഒരു സെഷനിൽ മൂല്യനിർണയം നടത്തേണ്ട ചോദ്യ പേപ്പറുകളുടെ എണ്ണം വർധിപ്പിച്ചത് പിൻവലിക്കണമെന്ന് എ.എച്ച്.എസ്.ടി.എ ആവശ്യപ്പെട്ടു.