തിരുവനന്തപുരം∙ പി.എസ്‌.സി ചുരുക്കപ്പട്ടികയുടെ വലുപ്പം കൂട്ടണമെന്ന ആവശ്യം നിലനിൽക്കില്ലെന്ന് കേരള അഡ്മിനിസ്ട്രേറ്റീവ് ട്രൈബ്യൂണൽ. ചുരുക്കപ്പട്ടിക സംബന്ധിച്ച പി.എസ്‍.സി തീരുമാനം നിയമാനുസൃതമാണെന്ന് അംഗീകരിച്ച ട്രൈബ്യൂണൽ, പട്ടിക വിപുലീകരിക്കണമെന്ന ആവശ്യം തള്ളിയെന്നും പി.എസ്‍.സി സെക്രട്ടറി അറിയിച്ചു.

മലപ്പുറം ജില്ലയിൽ എൽ.പി. സ്കൂൾ ടീച്ചർ തസ്തികയിലേക്ക് കഴിഞ്ഞ ഓഗസ്റ്റ് 26ന് പ്രസിദ്ധീകരിച്ച ചുരുക്കപ്പട്ടികയിൽ ഉദ്യോഗാർഥികളുടെ എണ്ണം നിശ്ചയിച്ചതു നിയമാനുസൃതമാണെന്നും ട്രൈബ്യൂണൽ വ്യക്തമാക്കി. കഴിഞ്ഞ ഡിസംബർ 8ന് ആണ് ഇതു സംബന്ധിച്ച ഉത്തരവ് ഇറക്കിയത്. മലപ്പുറം ജില്ലയിൽ ചുരുക്കപ്പട്ടിക തയാറാക്കിയപ്പോൾ 477 ഒഴിവ് ഉണ്ടായിരുന്നുവെന്നും അതനുസരിച്ച് ഉദ്യോഗാർഥികളെ ഉൾപ്പെടുത്തിയില്ലെന്നും പട്ടികയുടെ വലുപ്പം കൂട്ടാൻ ഉത്തരവിടണമെന്നും ആവശ്യപ്പെട്ടു 3 ഉദ്യോഗാർഥികളാണ് ട്രൈബ്യൂണലിനെ സമീപിച്ചത്.

സമാന വിഷയങ്ങളിലെ മുൻ ഉത്തരവുകളും പി.എസ്‍.സി നടപടിക്രമങ്ങളും പരിശോധിച്ച ട്രൈബ്യൂണൽ, പി.എസ്‍.സിയുടെ തീരുമാനം നിയമവിധേയമാണെന്നു കണ്ടെത്തി. റിപ്പോർട്ട് ചെയ്ത ഒഴിവുകൾ നികത്താൻ ആവശ്യമായ ഉദ്യോഗാർഥികളെ ചുരുക്കപ്പട്ടികയിൽ ഉൾപ്പെടുത്താനുള്ള അധികാരം പി.എസ്‍.സി.ക്കുണ്ട്. മലപ്പുറം ജില്ലയിൽ എൽ.പി. സ്കൂൾ ടീച്ചർ തസ്തികയിലേക്ക് റിപ്പോർട്ട് ചെയ്ത ഒഴിവു നികത്താനുള്ള ഉദ്യോഗാർഥികളെ മുഖ്യപട്ടികയിലും സപ്ലിമെന്ററി പട്ടികയിലും ഉൾപ്പെടുത്തിയിട്ടുണ്ടെന്നും ട്രൈബ്യൂണൽ കണ്ടെത്തി. 

തിരഞ്ഞെടുപ്പ് പ്രക്രിയ തുടർനടപടിയാണെന്നും നിലവിലെ റാങ്ക്‌പട്ടികയിൽ ഉൾപ്പെട്ടവരെ മാത്രമല്ല, ഭാവിയിൽ അർഹത നേടുന്നവരെയും തുല്യനീതിയോടെ കാണണമെന്നാണ് ട്രൈബ്യൂണൽ നിർദേശമെന്നും പി.എസ്‍.സി സെക്രട്ടറി അറിയിച്ചു.