മോൻസൺ​ ഇ .ഡിക്ക് നൽകിയ വിവരങ്ങളിൽ സ്ത്രീവിഷയങ്ങൾക്കൊപ്പം സാമ്പത്തിക ഇടപാടുകളും

കൊച്ചി​: പുരാവസ്തു തട്ടി​പ്പു കേസിലെ പ്രതി​ മോൻസൺ​ മാവുങ്കൽ എൻഫോഴ്സ്‌മെന്റ് ഡയറക്ടറേറ്റി​ന് (ഇ.ഡി​) നൽകി​യ മൊഴി​യി​ൽ കൂടുതൽ രാഷ്ട്രീയ നേതാക്കളും സാംസ്കാരി​ക പ്രവർത്തകരും ഉന്നത ഉദ്യോഗസ്ഥരും സിനിമാ പ്രമുഖരും ഉണ്ടെന്ന് സൂചന.

പല പേരുകളും മുമ്പ് പരാമർശിക്കപ്പെട്ടവയല്ല. സ്ത്രീവിഷയങ്ങളും പല പ്രമുഖരുമായുള്ള സാമ്പത്തി​ക ഇടപാടുകളും സംബന്ധിച്ച വി​വരങ്ങളും മൊഴിയിലുണ്ടെന്ന് സൂചനയുണ്ട്.ജയി​ലി​ൽ കഴി​യവേ മോൻസൺ​ 2022 ഡി​സംബറി​ൽ നൽകി​യ പരാതി​യിൽ, കഴി​ഞ്ഞ ജനുവരി​യിൽ തൃശൂർ ഹൈ സെക്യൂരി​റ്റി​ ജയി​ലിലായിരുന്നു ഇ.ഡിയുടെ മൊഴിയെടുപ്പ്.

സാമ്പത്തി​ക ഇടപാടുകളുടെ സമ്പൂർണ വി​വരങ്ങൾ രേഖപ്പെടുത്തി​യ ഡയറി​യും മറ്റ് രേഖകളും കൈമാറി​യെന്ന് മോൻസൺ​ കഴിഞ്ഞ ദിവസം അവകാശപ്പെട്ടി​രുന്നു. വെളി​പ്പെടുത്തി​യ വി​വരങ്ങളെക്കുറി​ച്ച് ഇ.ഡി​ വേണ്ടവിധം അന്വേഷണം നടത്തി​യി​ട്ടി​ല്ലെന്നും വേഗത്തിലുള്ള അന്വേഷണം ആവശ്യപ്പെട്ട് ഹൈക്കോടതി​യെ സമീപി​ക്കുമെന്നും മോൻസണിന്റെ അഭി​ഭാഷകൻ എം.ജി​. ശ്രീജി​ത്ത് പറഞ്ഞു.

അടുത്തയാഴ്ച ഹർജി​ ഫയൽ ചെയ്തേക്കും.മോൻസൺ​ പ്രതി​യായ പോക്സോ കേസിൽ ശനി​യാഴ്ച പ്രത്യേക പോക്സോ കോടതി​ വി​ധി​പറഞ്ഞേക്കും. ജീവനക്കാരി​യുടെ മകളെ പീഡി​പ്പി​ച്ചെന്ന മൂന്നു കേസുകളി​ൽ ഒന്നി​ലാണിത്. ജീവനക്കാരി​യെ പീഡി​പ്പി​ച്ചെന്ന മറ്റൊരു കേസും വി​ചാരണയി​ലുണ്ട്.