ചെടിക്കമ്പ് മുറിച്ച തൊണ്ണൂറുകാരിയെ മരുമകൾ ക്രൂരമായി മർദിച്ചു, ദൃശ്യങ്ങൾ എത്തിയത് പൊലീസുകാരുൾപ്പടെയുള്ള വാട്സാപ്പ് ഗ്രൂപ്പിൽ

വിഴിഞ്ഞം: ചെടിക്കമ്പ് മുറിച്ചതിന് 90കാരിക്ക് മരുമകളുടെ ക്രൂര മർദ്ദനം. വിഴിഞ്ഞം തെരുവിൽ കൃഷ്ണമ്മയ്ക്കാണ് മർദ്ദനമേറ്റത്.

ചെടിക്കമ്പ് മുയലിന് തീറ്റയായി നൽകി എന്ന പേരിലാണ് വൃദ്ധയെ മർദ്ദിച്ചത്.സംഭവത്തിൽ ഇളയ മകന്റെ ഭാര്യ വിഴിഞ്ഞം തെരുവ് പുതുവൽ വീട്ടിൽ സന്ധ്യ(41)ക്കെതിരെ കേസെടുത്തതായി വിഴിഞ്ഞം എസ്.എച്ച്.ഒ പ്രജീഷ് ശശി അറിയിച്ചു.

ഇന്നലെ വൈകിട്ടായിരുന്നു സംഭവം.ആദ്യം വീട്ടു മുറ്റത്തു വച്ചും പിന്നീട് വീടിനുള്ളിലും വൃദ്ധയെ മർദ്ദിച്ചെന്നു ബന്ധുക്കൾ പറഞ്ഞു.മൂത്ത മകൻ വിജയമൂർത്തിയുടെ പരാതിയിലാണ് കേസ്.മുൻപും അമ്മായി അമ്മയെ ഇവർ മർദ്ദിക്കാറുണ്ടെന്ന് ബന്ധുക്കൾ പറഞ്ഞു.

മർദ്ദന ദൃശ്യങ്ങൾ പൊലീസുകാർ ഉൾപ്പെടെയുളള വാട്‌സാപ്പ് ഗ്രൂപ്പിൽ വന്നതോടെ വിഴിഞ്ഞം പൊലീസ് അന്വേഷണം നടത്തി.ഇവരുടെ വീട്ടിലെത്തി വൃദ്ധയുടെ മൊഴിയെടുത്തു. തുടർന്നാണ് ബന്ധുക്കൾ പൊലീസിൽ പരാതി നൽകിയത്.