തിരുവനന്തപുരം: സോഫ്‌റ്റ്‌വേർ അപ്‌ഡേഷനുശേഷം മൊബൈൽ ഫോൺ ഡിസ്‌പ്ലേയിൽ വരകൾ പ്രത്യക്ഷപ്പെടുകയും ഡിസ്‌പ്ലേ അവ്യക്തമാവുകയും ചെയ്‌തതിന്‌ നഷ്ടപരിഹാരം നൽകാൻ ജില്ലാ ഉപഭോക്‌തൃ തർക്കപരിഹാര കമീഷൻ വിധി. തിരുവനന്തപുരം സ്വദേശി അഡ്വ. കെ ആർ ദിലീപ്‌ സമർപ്പിച്ച പരാതിയിലാണിത്‌.42,999 രൂപയ്‌ക്ക്‌ വാങ്ങിയ വൺപ്ലസ്‌ ഫോണിന്റെ സ്‌ക്രീനിൽ പിങ്ക്‌ലൈൻ പ്രത്യക്ഷപ്പെടുകയായിരുന്നു. അംഗീകൃത സർവീസ്‌ സെന്ററിൽ സമീപിച്ചപ്പോൾ സ്‌ക്രീൻ സൗജന്യമായി മാറ്റിത്തരാമെന്നും ഓർഡർ ചെയ്‌തതായും അറിയിച്ചു. പിന്നീട്‌ നിരന്തരം സമീപിച്ചപ്പോൾ 19,000 രൂപയ്‌ക്ക്‌ തിരിച്ചെടുക്കുകയോ ഡിസ്‌പ്ലേ വരുന്നതുവരെ കാത്തിരിക്കാനോ ആവശ്യപ്പെട്ടു. പിന്നീടും സ്‌ക്രീനിൽ പിങ്ക്‌ലൈൻ വന്നതോടെയാണ്‌ കമീഷനെ സമീപിച്ചത്‌.നിർമാണത്തിലെ അപാകമാണെന്ന്‌ കണ്ടെത്തിയ പി വി ജയരാജൻ അധ്യക്ഷനും വി.ആർ വിജു, പ്രീതാ ജി നായർ എന്നിവർ അംഗങ്ങളുമായ കമീഷൻ നഷ്ടപരിഹാരം നൽകാൻ വിധിക്കുകയായിരുന്നു. ഫോണിന്റെ വിലയായ 42,999 രൂപ തിരികെ നൽകാനും കോടതി ചെലവ്‌, നഷ്ടപരിഹാരം എന്നിവയായി 12,500 രൂപ നൽകാനുമാണ്‌ ഉത്തരവ്‌. പരാതിക്കാരനുവേണ്ടി അഡ്വ. ശ്രീവരാഹം എൻ ജി മഹേഷ്‌, ഷീബ ശിവദാസൻ എന്നിവർ ഹാജരായി.

ബെംഗളൂരു: ജര്‍മനിയിലെ ഇന്റര്‍സിറ്റി ബസ് സര്‍വീസ് ദാതാക്കളായ ഫ്‌ലിക്സ് ബസ് ബെംഗളൂരുവില്‍നിന്ന് ആലുപ്പുഴയിലേക്ക് സര്‍വീസ് ആരംഭിച്ചു. രാത്രി 8.35-ന് ബെംഗളൂരുവില്‍നിന്ന് പുറപ്പെട്ട് പിറ്റേദിവസം രാവിലെ 10.5-ന് ആലപ്പുഴയിലെത്തും. തിരിച്ച് ആലപ്പുഴയില്‍നിന്ന് രാത്രി 7.30-ന് പുറപ്പെട്ട് പിറ്റേദിവസം രാവിലെ 9.25-ന് ബെംഗളൂരുവിലെത്തും.കൃഷ്ണഗിരി, സേലം, ഈറോഡ്, തിരുപ്പൂര്‍, കോയമ്പത്തൂര്‍, പാലക്കാട്, തൃശ്ശൂര്‍, കൊച്ചി എന്നിവിടങ്ങളില്‍ സ്റ്റോപ്പുണ്ട്. ഫ്‌ലിക്സ് ബസ് വെബ്സൈറ്റ് വഴി ബുക്ക് ചെയ്യുമ്പോള്‍ 1400 രൂപയാണ് നിരക്ക്.ദക്ഷിണേന്ത്യയില്‍ ചുവടുറപ്പിക്കുന്നതിന്റെ ഭാഗമായി ഗോവയിലേക്കും സര്‍വീസ് ആരംഭിച്ചിട്ടുണ്ട്. ബെംഗളൂരുവില്‍നിന്ന് ഗോവയിലേക്ക് 1600 രൂപയാണ് നിരക്ക്.

രാജ്യത്തെ പ്രധാന ടൂറിസം കേന്ദ്രങ്ങളായ ഗോവയെയും കേരളത്തെയും ബെംഗളൂരുവുമായി ബന്ധിപ്പിക്കുന്ന ബസ് സര്‍വീസുകള്‍ ആരംഭിക്കുന്നതില്‍ സന്തോഷമുണ്ടെന്ന് ഫ്‌ലിക്സ്ബസ് ഇന്ത്യ എം.ഡി. സൂര്യ ഖുറാന പറഞ്ഞു. മിതമായ നിരക്കില്‍ സുഖകരവും പ്രകൃതിസൗഹൃദവുമായ യാത്രാസൗകര്യങ്ങള്‍ ഒരുക്കുമെന്നും അദ്ദേഹം പറഞ്ഞു.ദക്ഷിണേന്ത്യന്‍ സംസ്ഥാനങ്ങളില്‍ ഗതാഗതരംഗത്ത് വിപണിസാന്നിധ്യം വികസിപ്പിക്കാനുള്ള കമ്പനിയുടെ തീരുമാനത്തിന്റെ ഭാഗമാണ് പുതിയ ബസ് സര്‍വീസുകള്‍.സ്ഥിരംയാത്രക്കാരുള്ള പ്രത്യേക സീസണുകളും ആഘോഷദിവസങ്ങളുംകൂടി കണക്കിലെടുത്താണ് ഈ രണ്ട് റൂട്ടുകളിലും ബസുകള്‍ ഇറക്കിയത്. കഴിഞ്ഞ സെപ്റ്റംബറില്‍ ബെംഗളൂരുവില്‍നിന്ന് ചെന്നൈ, ഹൈദരാബാദ്, മധുര, കോയമ്പത്തൂര്‍ എന്നിവിടങ്ങളിലേക്ക് സര്‍വീസ് ആരംഭിച്ചിരുന്നു. ഭാവിയില്‍ കേരളത്തിലുള്‍പ്പെടെ 33 നഗരങ്ങളിലേക്ക് സര്‍വീസ് ആരംഭിക്കും.പ്രാദേശിക ബസ് ഓപ്പറേറ്റര്‍മാരുമായി സഹകരിച്ചാകും സര്‍വീസ് നടത്തുന്നത്. വടക്കേ ഇന്ത്യയില്‍ സര്‍വീസ് വിജയകരമായി നടപ്പാക്കിയശേഷമാണ് ദക്ഷിണേന്ത്യയിലേക്ക് വ്യാപിപ്പിക്കുന്നത്.

കോഴിക്കോട്: മലബാറുകാരുടെ യാത്രാപ്രശ്‌നമെന്നത് പുതുമയുള്ള കാര്യമല്ലെങ്കിലും അതു കൂട്ടുകയാണ് റെയില്‍വേ. തീവണ്ടികളുടെ ടൈംടേബിളിലെ സമയമാറ്റമാണ് പുതിയ ഇരുട്ടടി. ഇതോടെ കോഴിക്കോട്ടുനിന്ന് വടക്കോട്ടുള്ള യാത്രക്കാരുടെ ദുരിതം ഇരട്ടിയായി. ഇരുന്ന് പോവാമെന്ന പ്രതീക്ഷ പണ്ടേ പലരും ഉപേക്ഷിച്ചെങ്കിലും ഇപ്പോള്‍ തീവണ്ടിയില്‍ കാലുകുത്താന്‍പോലുമാവാത്ത സ്ഥിതിയാണ്.കോഴിക്കോട്ടുനിന്ന് ഉച്ചയ്ക്ക് 1.25-ന് കോയമ്പത്തൂര്‍ പാസഞ്ചര്‍, 2.05-ന് ഷൊര്‍ണൂര്‍-കണ്ണൂര്‍ പാസഞ്ചര്‍, 2.15-ന് ചെന്നൈ-മംഗളൂരു എഗ്മോര്‍ എക്‌സ്പ്രസ് എന്നിവ പുറപ്പെടുന്ന രീതിയിലാണ് പുതിയ സമയമാറ്റം. ഏതാണ്ട് മുക്കാല്‍മണിക്കൂറിനിടെ മൂന്നു തീവണ്ടികള്‍. അതുകഴിഞ്ഞാല്‍ പിന്നെ കണ്ണൂരിന് വടക്കോട്ടുള്ള തീവണ്ടി പരശുറാം എക്‌സ്പ്രസ് പുറപ്പെടുന്നത് അഞ്ചുമണിക്കാണ്. അതായത് രണ്ടേമുക്കാല്‍ മണിക്കൂര്‍ കാത്തിരിക്കണം.നേരത്തേ എഗ്മോര്‍-മംഗളൂരു എക്‌സ്പ്രസ് 2.45-നായിരുന്നു കോഴിക്കോട്ടുനിന്ന് പുറപ്പെട്ടിരുന്നത്. വൈകുന്നേരമാവുമ്പോഴാണ് പൊതുവേ യാത്രക്കാര്‍ കൂടുന്നത്. അപ്പോഴാണ് ഉണ്ടായിരുന്ന ഒരു തീവണ്ടി അരമണിക്കൂര്‍ നേരത്തേയാക്കിയത്. അതോടെ, നേരത്തേത്തന്നെ യാത്രക്കാര്‍ ശ്വാസംമുട്ടിപ്പോയിരുന്ന പരശുറാമില്‍ ഇപ്പോള്‍ മിക്കദിവസവും കയറിപ്പറ്റാന്‍പോലുമാവാത്ത സ്ഥിതിയായി.

ഷൊര്‍ണൂര്‍-കണ്ണൂര്‍ സ്‌പെഷ്യല്‍ ട്രെയിന്‍ കോഴിക്കോട്ടുനിന്ന് പുറപ്പെടുന്ന സമയം ക്രമീകരിച്ചാല്‍ ചെറുവത്തൂര്‍വരെയുള്ള യാത്രക്കാര്‍ക്കെങ്കിലും ഉപകരിക്കുമെന്ന നിര്‍ദേശം സമയമാറ്റത്തില്‍ റെയില്‍വേ കണക്കിലെടുത്തില്ല. ഷൊര്‍ണൂര്‍-കണ്ണൂര്‍ പാസഞ്ചറിനെ സ്ഥിരമായി വടകരയ്ക്കു മുന്‍പ് പിടിച്ചിടുന്ന പതിവും തുടരും. കണ്ണൂരില്‍നിന്ന് അഞ്ചരയ്ക്ക് ചെറുവത്തൂര്‍ പാസഞ്ചറായി ഓടുന്ന ട്രെയിനാണിത്.

ഏതാണ്ട് നാലോടെ കോഴിക്കോട്ടെത്തുന്ന പരശുറാം അഞ്ചിനാണ് കോഴിക്കോട്ടു നിന്ന് വിടുന്നത്. പതിനഞ്ച് മിനിറ്റ് വ്യത്യാസത്തില്‍ മംഗള എക്‌സ്പ്രസ് കൂടി വരും. റിസര്‍വേഷനില്ലാത്ത യാത്രക്കാര്‍ കയറാവുന്ന കോച്ചുകള്‍ ഇതില്‍ കുറവുമാണ്. 6.05-ന് നേത്രാവതി എക്‌സ്പ്രസ് പോയാല്‍പ്പിന്നെ രാത്രി 1.15-ന് വെസ്റ്റ് കോസ്റ്റ് എക്‌സ്പ്രസാണ് മംഗളൂരുവിലേക്കുള്ള സ്ഥിരംതീവണ്ടി. ഇടയിലുള്ള സ്റ്റേഷനുകളില്‍ സ്റ്റോപ്പില്ലാത്തതിനാല്‍ വന്ദേഭാരത് ഈ യാത്രാപ്രശ്‌നം പരിഹരിക്കുന്നുമില്ല.വൈകീട്ട് ട്രെയിനില്ലാത്ത സമയത്തെ ഇടവേള കുറച്ച് ഷൊര്‍ണൂര്‍-കണ്ണൂര്‍ സ്‌പെഷ്യല്‍ ട്രെയിന്‍ മംഗളൂരുവരെ നീട്ടിയാല്‍ യാത്രക്കാര്‍ക്ക് ഏറെ ആശ്വാസമാവുമായിരുന്നു. വടക്കന്‍ ജില്ലകളിലെ എം.പി.മാര്‍ ഇടപെട്ടാല്‍ കുറേ പ്രശ്‌നങ്ങള്‍ക്കെങ്കിലും പരിഹാരമുണ്ടാക്കാവുന്നതാണ്. മലബാറിലെ യാത്രാപ്രശ്‌നപരിഹാരത്തിന് റെയില്‍വേ പ്രൊട്ടക്ഷന്‍ ഫോറം പ്രതിനിധികളും നിര്‍ദേശങ്ങള്‍ മുന്നോട്ടുവെച്ചിട്ടുണ്ട്.