പോലീസ് എസ്.ഐ.യുടെ ആറ് ചുരുക്കപ്പട്ടികകളിലായി 1519 പേര്‍. ഇവര്‍ക്കുള്ള അഭിമുഖം മേയ് മൂന്നിനും ആരംഭിക്കും. സിവില്‍ പോലീസിനുള്ള മൂന്ന് കാറ്റഗറികളിലെ ചുരുക്കപ്പട്ടികയില്‍ 967 പേരാണുള്ളത്.

നേരിട്ട് നിയമനമുള്ള കാറ്റഗറിയില്‍ 845 പേരും കോണ്‍സ്റ്റാബുലറിയില്‍ 111 പേരും മിനിസ്റ്റീരിയലില്‍ 11 പേരും ഉള്‍പ്പെട്ടു.

ആംഡ് പോലീസിന്റെ രണ്ട് കാറ്റഗറികളിലായി 544 പേര്‍ ചുരുക്കപ്പട്ടികയിലുണ്ട്. നേരിട്ടുള്ള നിയമനത്തിന് 436 പേരും കോണ്‍സ്റ്റാബുലറിയില്‍ 108 പേരും ഉള്‍പ്പെട്ടു.

നാലാമത്തെ കാറ്റഗറി എസ്.സി.സി.സിയ്ക്കുള്ള എന്‍.സി. എ. വിജ്ഞാപനമാണ്. ഇതിന്റെ ചുരുക്കപ്പട്ടികയില്‍ ആകെ എട്ട് പേരാണുള്ളത്.

പ്രമാണ പരിശോധന പി.എസ്.സി. ആസ്ഥാന, മേഖലാ ഓഫീസുകളിലും അഭിമുഖം ആസ്ഥാന ഓഫീസിലുമാണ് നടത്തുന്നത്.

പട്ടികയിലുള്ളവര്‍ യോഗ്യത, ജനനത്തീയതി, തിരിച്ചറിയല്‍രേഖ, നോണ്‍ ക്രീമീലെയര്‍/ജാതി സര്‍ട്ടിഫിക്കറ്റ്, വെയിറ്റേജ് എന്നിവ തെളിയിക്കുന്ന രേഖകള്‍ പ്രൊഫൈലില്‍ അപ്ലോഡ് ചെയ്തശേഷം അസല്‍ രേഖകള്‍ സഹിതമാണ് പരിശോധനയ്ക്ക് ഹാജരാകേണ്ടത്.

ഇതിനുള്ള വ്യക്തിഗത സന്ദേശം ഉദ്യോഗാര്‍ഥികള്‍ക്ക് പ്രൊഫൈലിലും മൊബൈലിലും പി.എസ്.സി. അയച്ചിട്ടുണ്ട്.

അഭിമുഖത്തിനുള്ള അഡ്മിഷന്‍ ടിക്കറ്റ് ഏപ്രില്‍ 26 മുതല്‍ പ്രൊഫൈലില്‍ ലഭിക്കും. അഭിമുഖത്തിന് ഏഴ് ബോര്‍ഡുകളാണ് ആസ്ഥാന ഓഫീസില്‍ പി.എസ്.സി ഒരുക്കുന്നത്.

സെക്രട്ടേറിയറ്റ്/പി.എസ്.സി. അസിസ്റ്റന്റ് റാങ്ക്പട്ടികയില്‍ 2,091 പേര്‍

സെക്രട്ടേറിയറ്റ്/പി.എസ്.സി./ഓഡിറ്റ് വകുപ്പ് അസിസ്റ്റന്റ്/ഓഡിറ്റര്‍ റാങ്ക്പട്ടികയില്‍ 2,091 പേര്‍. മുഖ്യപട്ടികയില്‍ 961 പേരും സംവരണവിഭാഗം ഉപപട്ടികയില്‍ 1,033 പേരും ഭിന്നശേഷിപ്പട്ടികയില്‍ 97 പേരും ഉള്‍പ്പെട്ടു.

രണ്ട് ഘട്ട പരീക്ഷയിലൂടെയാണ് ഇത്തവണത്തെ റാങ്ക്പട്ടിക തയ്യാറാക്കിയത്.
2021 ഒക്ടോബര്‍, നവംബര്‍ മാസങ്ങളിലാണ് പ്രാഥമികപരീക്ഷ നടത്തിയത്.

ഇതിലെ മാര്‍ക്കിന്റെ അടിസ്ഥാനത്തില്‍ 11,206 പേരുടെ അര്‍ഹതാപട്ടിക പ്രസിദ്ധീകരിച്ചു. ഇവര്‍ക്കുള്ള മുഖ്യപരീക്ഷ കഴിഞ്ഞ ഡിസംബര്‍ 21-ന് നടത്തി. രണ്ട് പരീക്ഷയും ഒ.എം.ആര്‍. രീതിയിലായിരുന്നു. ഏപ്രില്‍ 12-ന് റാങ്ക്പട്ടിക നിലവില്‍ വന്നു.

പുനഃപരിശോധന

അപേക്ഷകര്‍ക്ക് ഉത്തരക്കടലാസ് പുനഃപരിശോധനയ്ക്കും പകര്‍പ്പിനും അപേക്ഷിക്കാം. പുനഃപരിശോധനയ്ക്ക് 85 രൂപയാണ് ഫീസ്. 0051-PSC-105 State PSC-99 Examination Fee എന്ന ട്രഷറി അക്കൗണ്ട് ഹെഡ്ഡില്‍ ഫീസടച്ച രസീത് സഹിതം നിര്‍ദിഷ്ടമാതൃകയില്‍ അപേക്ഷിക്കണം.

ഉത്തരക്കടലാസിന്റെ ഫോട്ടോകോപ്പിക്ക് 335 രൂപയാണ് ഫീസ്. 0051-PSC-800-State PSC-99 Other Receipts എന്ന ട്രഷറി അക്കൗണ്ട് ഹെഡ്ഡിലാണ് ഫീസടയ്‌ക്കേണ്ടത്. അപേക്ഷിക്കാനുള്ള അവസാന തീയതി മേയ് 15 ആണ്. വിലാസം The Deputy Secretary (Examinations)-2, Kerala Public Service Commission, Pattom P.O., Thiruvananthapuram-695 004.